ଅଣ୍ଟା ସଳଖୁଛି ସବାଇ ଘାସ ଶିଳ୍ପ

କେନ୍ଦ୍ରାପଡା, ଜାନୁଆରୀ ୪ (ଲୋକାଲ ୱାୟାର): ଲକଡାଉନ ଯୋଗୁଁ ସବାଇ ଘାସ କଳା ବିପନ୍ନ ହୋଇ ପଡ଼ିଥିଲା ।

ପ୍ରସ୍ତତ ସାମଗ୍ରୀଗୁଡିକ ବିକ୍ରି ହେଉ ନଥିବାରୁ କାରିଗରମାନେ କାମ ବନ୍ଦ କରି ଦେଇଥିଲେ । ତେବେ ଓଡ଼ିଶା ଜୀବିକା ମିଶନର ହସ୍ତକ୍ଷେପ ଯୋଗୁଁ ଅକ୍ଟୋବର ଠାରୁ ସ୍ଥିତି ବଦଳିବାରେ ଲାଗିଛି ।

ଆର୍ଥିକ ସହାୟତା ପ୍ରଦାନ ସହ ପ୍ରସ୍ତୁତ ସାମଗ୍ରୀଗୁଡ଼ିକ କିଣି ନେଉଥିବାରୁ କାରିଗରମାନେ ପୁଣି ସବାଇ ଘାସ ସାମଗ୍ରୀ ପ୍ରସ୍ତୁତିରେ ଲାଗି ପଡ଼ିଲେଣି ବୋଲି କହିଛନ୍ତି ଓଡ଼ିଶା ଜୀବିକା ମିଶନ, କେନ୍ଦ୍ରାପଡ଼ା ଜିଲ୍ଲା ପ୍ରକଳ୍ପ ପ୍ରବନ୍ଧକ ସତ୍ୟଭାମା ପ୍ରଧାନ ।

୧୫ ଜଣ ମହିଳାଙ୍କୁ ନେଇ ଗଠିତ ଆମ ସ୍ୱୟଂ ସହାୟକ ଗୋଷ୍ଠୀ ସବାଇ ଘାସର ଟୋପି, ଝୁଡି, ହାତପଙ୍ଖା ଭଳି ସାମଗ୍ରୀ ପ୍ରସ୍ତୁତ କରୁଛି । କୋଭିଡ-୧୯ ଯୋଗୁଁ ସାମଗ୍ରୀ ପ୍ରସ୍ତୁତି ପ୍ରାୟ ବନ୍ଦ ହୋଇ ଯାଇଥିଲା ।

ହେଲେ ଏବେ ପୁଣି ଆମେ କାମରେ ଲାଗି ପଡିଛୁ ବୋଲି ବାରୋ ଗାଁର ସ୍ୱର୍ଣ୍ଣଲତା ଜେନା କହିଛନ୍ତି ।

ବାରୋ, ଜଜାଙ୍ଗ ଓ ଅନ୍ୟ ଗାଁର ୩ ହଜାରରୁ ଅଧିକ ମହିଳା ପ୍ରାୟ ୧୦୦ଟି ଏସଏଚଜି ଗଢ଼ି ସବାଇ ଘାସ ଶିଳ୍ପକୁ ବଞ୍ଚାଇ ରଖିଛନ୍ତି ।

ସବାଇ ଘାସ ତିଆରି ସାମଗ୍ରୀଗୁଡ଼ିକ ଦୀର୍ଘସ୍ଥାୟୀ ଓ ମଜବୁତ ହୋଇଥିବାରୁ ସେଗୁଡ଼ିକର ବଜାର ଚାହିଦା ରହିଛି । ପ୍ଲାଷ୍ଟିକ ବଦଳରେ ଲୋକେ ସବାଇ ସାମଗ୍ରୀ ପସନ୍ଦ କରୁଛନ୍ତି ।

ଲକଡାଉନ ଯୋଗୁଁ ଚାକିରି ଚାଲି ଯିବାରୁ ୬ ମାସ ପୂର୍ବେ ଜଜାଙ୍ଗ ଗାଁର କନକ ବେହେରା (୨୮)ଙ୍କ ସ୍ୱାମୀ ଚେନ୍ନାଇରୁ ଫେରି ଆସିଥିଲେ ।

ପରିବାର ଚଳାଇବା ଚିନ୍ତା ତାଙ୍କୁ ଘାରିଥିଲା । ତେବେ ମା ପାର୍ବତୀ ଏସଏଚଜିରେ ଯୋଗ ଦେବା ପରେ କନକଙ୍କ ପରିବାର ଖୁସିରେ ଚଳୁଛି ।

ସବାଇ ଘାସ ସାମଗ୍ରୀ ପ୍ରସ୍ତୁତ କରି କନକ ମାସକୁ ୪ରୁ ୬ ହଜାର ଟଙ୍କା ରୋଜଗାର କରୁଛନ୍ତି । କାମ ଅନ୍ୱେଷଣରେ ସ୍ୱାମୀ ଆଉ ଓଡିଶା ବାହାରକୁ ନଯିବାକୁ ନିଷ୍ପତ୍ତି ନେଇଛନ୍ତି ବୋଲି କନକ କହିଛନ୍ତି ।

ପୁରୁଷ ଅଧ୍ୟୁଷିତ ସମାଜରେ ଶହ ଶହ ମହିଳାଙ୍କୁ ଆର୍ଥିକ ଓ ସାମାଜିକ ସଶକ୍ତିକରଣରେ ସହାୟତା କରୁଛି ସବାଇ ଘାସ ଶିଳ୍ପ ।

ଲୋକାଲ ୱାୟାର