ଅଦିନିଆ ବର୍ଷାରେ ଫସଲ ନଷ୍ଟ, ଚାଷୀ ଚିନ୍ତାରେ

କେନ୍ଦ୍ରାପଡ଼ା, ଏପ୍ରିଲ ୨୭(ଲୋକାଲ ୱାୟାର): ରାଜ୍ୟରେ ଗତ ଦୁଇଦିନ ହେଲାଣି ହୋଇଥିବା ବର୍ଷା ଯୋଗୁଁ ଏବେ କେନ୍ଦ୍ରାପଡ଼ା ଜିଲ୍ଲା ଉପକୂଳବର୍ତ୍ତୀ ଅଞ୍ଚଳର ଚାଷୀକୁଳ ଚିନ୍ତାରେ ।

ଜିଲ୍ଲାର ଚାଷୀମାନେ ଏହି ସମୟରେ ପନିପରିବା ଓ ମୁଗଚାଷ କରୁଥିବା ବେଳେ ଅଦିନିଆ ବର୍ଷା ଏସବୁକୁ ନଷ୍ଟ କରିଦେଇଛି ।

ଜିଲ୍ଲାର ମହାକାଳପଡ଼ା, ରାଜନଗର, ମାର୍ଶାଘାଇ, ଗରଦପୁର ବ୍ଲକ୍ ଆଦି ଅଞ୍ଚଳର ଅଧିକାଂଶ ଗାଁରେ ବର୍ଷା ଯୋଗୁଁ ପନିପରିବା ଓ ମୁଗ ଫସଲ ନଷ୍ଟ ହୋଇଥିବାର ଚାଷୀମାନେ ଅଭିଯୋଗ କରିଛନ୍ତି ।

ବିଶେଷ କରି ଶୁକ୍ରବାର ଓ ଶନିବାର ଦିନର ବର୍ଷା ଜିଲ୍ଲାରେ ଅଧିକ ପରିମାଣରେ ଫସଲ ନଷ୍ଟ କରି ଦେଇଛି ।

କୃଷକ ନେତା ଉମେଶ ଚନ୍ଦ୍ର ସିଂହ ବର୍ଷା ଯୋଗୁଁ ହୋଇଥିବା ଫସଲ ନଷ୍ଟର ଆକଳନ କରି କ୍ଷତିଗ୍ରସ୍ତ ଚାଷୀଙ୍କୁ ଉପଯୁକ୍ତ ମୂଲ୍ୟ ଦେବାକୁ ସରକାରଙ୍କୁ ଅପିଲ କରିଛନ୍ତି ।

ଗରଦପୁର ଗାଁର ମୁଗ ଚାଷୀ ହରମୋହନ ବେହରା କହିଛନ୍ତି ଅଦିନିଆ ବର୍ଷା ଯୋଗୁଁ ମୁଗ ଫସଲ ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ତେଣୁ ଏବେ କିପରି ଆମେ ବ୍ୟାଙ୍କ ଋଣ ସୁଝିବା ତାହା ସବୁଠାରୁ ବଡ଼ ଚିନ୍ତାର ବିଷୟ ।

କେବଳ ମୁଗ ନୁହେଁ ଜିଲ୍ଲାର ଉପକୂଳବର୍ତ୍ତୀ ଅଞ୍ଚଳରେ ବାଇଗଣ, ବିଲାତି, ଭେଣ୍ଡି ଓ ପାନ ବରଜ ମଧ୍ୟ ବ୍ୟାପକ କ୍ଷତି ହୋଇଛି ।

ଆସନ୍ତା ଏକ ସପ୍ତାହ ଭିତରେ ଯଦି ଜମିରୁ ପାଣି ବାହାର କରାନଯାଏ ତେବେ ଫସଲ ଆହୁରି ନଷ୍ଟ ହୋଇଯିବ ବୋଲି ପଟ୍ଟାମୁଣ୍ଡାଇ ଅଞ୍ଚଳର ଚାଷୀ ସଂଗ୍ରାମ ଦାଶ ସୂଚନା ଦେଇଛନ୍ତି ।

ରାଜକନିକା ଅଞ୍ଚଳର ଚାଷୀ ମହାଦେବ ଦାଶ କହିଛନ୍ତି କେବଳ ଫସଲ ନଷ୍ଟ ହୋଇଛି ତା ନୁହେଁ ଏବେ ମୁଗସବୁ ବର୍ଷା ପାଣିରେ ବତୁରି ହୋଇ ରହିବା ଦ୍ୱାରା ତା’ର ଗୁଣାତ୍ମକମାନ ମଧ୍ୟ ନଷ୍ଟ ହୋଇଯିବ । ଫଳରେ ଗ୍ରାହକ ଏସବୁ କିଣିବାରେ ଆଗ୍ରହ ନେବେନି ।

ଏବେ ବର୍ଷାକୁ ନେଇ ପାଣିପାଗ ବିଭାଗର ପୂର୍ବାନୁମାନ ଚାଷୀଙ୍କୁ ବ୍ୟତିବ୍ୟସ୍ତ କରିଛି । ପାଣିପାଗ ବିଭାଗ ପକ୍ଷରୁ ମିଳିଥିବା ସୂଚନା ଅନୁସାରେ ଦକ୍ଷିଣ ପୂର୍ବ ବଙ୍ଗୋପସାଗରରେ ଏକ ଲଘୁଚାପ ସୃଷ୍ଟି ହେଉଛି ।

ତେଣୁ ଏପ୍ରିଲ ୨୯ ତାରିଖ ପର୍ଯ୍ୟନ୍ତ ଓଡ଼ିଶାର ବିଭିନ୍ନ ସ୍ଥାନରେ ବର୍ଷାର ସମ୍ଭବାନା ଦେଖାଦେଇଛି ।

ଗୋଟିଏ ପଟେ ଦେଶବ୍ୟାପୀ ଲକ୍ ଡାଉନ୍ ଯୋଗୁଁ ଜିଲ୍ଲାର ଅଧିକାଂଶ ଚାଷୀ ନିଜ ଫସଲର ଉଚିତ ମୂଲ୍ୟ ପାଇ ପାରୁନଥିବା ବେଳେ ଗାଁ ଲୋକଙ୍କୁ କମ୍ ଦାମରେ ବିକ୍ରି କରିବାକୁ ବାଧ୍ୟ ହେଉଛନ୍ତି ।

ପରିସ୍ଥିତି ଏପରି ହେଉଛି ଯେ ଜୀବଜନ୍ତୁଙ୍କୁ ଖାଇବାକୁ ବି ଦେଇ ଦେଉଛନ୍ତି । ଅପରପକ୍ଷେ ଏବେ ରାଜ୍ୟରେ ଦେଖାଦେଉଥିବା ଅଦିନିଆ ବର୍ଷା ଚାଷୀଙ୍କ ବୋଝ ଉପରେ ନଳିତା ବିଡ଼ା ସାବ୍ୟସ୍ତ ହେଉଛି ବୋଲି କେନ୍ଦ୍ରାପଡା ଅଞ୍ଚଳର ଚାଷୀ ମହମ୍ମଦ ସକିଲ କହିଛନ୍ତି ।

ପାନ ଚାଷୀ ଶଙ୍କର ମଣ୍ଡଳ କହିଛନ୍ତି ବର୍ଷା ଯୋଗୁଁ ପାନ ବରଜ ସବୁ ନଷ୍ଟ ହୋଇଯାଇଛି । ବର୍ଷା ଓ ପବନରେ ପାନ ଗଛସବୁ ଭାଙ୍ଗି ଯାଇଥିବା ବେଳେ ତା ଉପରେ ପାଣି ମାଡି ଯାଇଛି ।

ପ୍ରତିବର୍ଷ ବନ୍ୟା, ଅଦିନିଆ ବର୍ଷା ଓ ମରୁଡ଼ି ଯୋଗୁଁ ଏହି ଅଞ୍ଚଳର ଚାଷୀମାନେ ଫସଲ ନଷ୍ଟ ହାନିର ସମ୍ମୁଖୀନ ହୋଇଥାନ୍ତି ।

ମାତ୍ର ସରକାର ସୀମିତ ସହାୟତା ପ୍ରଦାନ କରିଥାନ୍ତି ବୋଲି ଜିଲ୍ଲା କୃଷକ ସଭା ସଭାପତି ଗୟାଧର ଧଳ ସୂଚନା ଦେଇଛନ୍ତି ।

ଜିଲ୍ଲା ମୁଖ୍ୟ କୃଷି ଅଧିକାରୀ ଅଶୋକ ମହାସୁଆର କହିଛନ୍ତି ଜିଲ୍ଲାରେ ଅଦିନିଆ ବର୍ଷା ଯୋଗୁଁ ହୋଇଥିବା କ୍ଷୟକ୍ଷତିର ଆକଳନ କରି ଏକ ରିପୋର୍ଟ ଦେବାକୁ ମୁଁ ସମସ୍ତ ବ୍ଲକ୍ କୃଷି ଅଧିକାରୀଙ୍କୁ ନିଦେ୍ର୍ଦଶ ଦେଇଛି ।

ସମସ୍ତ କୃଷି ଅଧିକାରୀ କ୍ଷୟକ୍ଷତିର ଆକଳନ କରୁଛନ୍ତି । ରିପୋର୍ଟ ପାଇବା ପରେ ଆମେ ଏଦିଗରେ କାର୍ଯ୍ୟାନୁଷ୍ଠାନ ନେବୁ ।

ଲୋକାଲ ୱାୟାର