ଅନଲାଇନରେ ହେବ ବଡ଼ଦିନ, ସ୍ୱତନ୍ତ୍ର କାର୍ଯ୍ୟକ୍ରମ ୱାଚ୍ ନାଇଟସ୍

ଭୁବନେଶ୍ୱର, ଡିସେମ୍ବର ୮(ଲୋକାଲ ୱାୟାର): ଏଥର ଅନଲାଇନରେ ହେବ ଖ୍ରୀଷ୍ଟ ମାସ ।

୮ ମାସ ହେଲାଣି କରୋନା ଯୋଗୁଁ ସବୁ ଧାର୍ମିକ ଅନୁଷ୍ଠାନ ବନ୍ଦ ରହିଥିବା ବେଳେ ଡିସେମ୍ବର ବେଳକୁ ସବୁ ସ୍ୱାଭାବିକ ହେବ ବୋଲି ଆଶା କରାଯାଉଥିଲା ।

ମାତ୍ର ଏବେ ଯାଏଁଁ କରୋନାର ଦ୍ୱିତୀୟ ଲହରି ଆସିବାର ଆଶଙ୍କା ରହିଥିବାରୁ ଧାର୍ମିକ ଅନୁଷ୍ଠାନକୁ ଖୋଲିବାକୁ ଅନୁମତି ମିଳିନାହିଁ ।

ଯାହା ଭକ୍ତମାନଙ୍କୁ ନିରାଶ କରିଛି । ଖ୍ରୀଷ୍ଟମାସ ପାଇଁ ମାସକ ଆଗରୁ ପ୍ରସ୍ତୁତି କରାଯାଉଥିବା ବେଳେ ଚଳିତ ବର୍ଷ କରୋନା ଯୋଗୁଁ ଏ ପର୍ଯ୍ୟନ୍ତ ଚର୍ଚ୍ଚ ପରିସର ଖାଁ ଖାଁ ରହିଛି ।

ଖ୍ରୀଷ୍ଟମାସ ପାଇଁ ଆଉ ଦିନ କେଇଟା ଥିଲେ ବି କୌଣସି ପ୍ରସ୍ତୁତି ଆରମ୍ଭ ହୋଇନି । ଏ ବାବଦରେ ଏକ ଚର୍ଚ୍ଚର ଫାଦର କହିଛନ୍ତି ଚଳିତ ବର୍ଷ ଅନଲାଇନରେ ଆମେ ସାମୁହିକ ପ୍ରାର୍ଥନା କରିବୁ ।

ଏଥିପାଇଁ ୱାଚ୍ ନାଇଟସ ନାମରେ ସ୍ୱତନ୍ତ୍ର କାର୍ଯ୍ୟକ୍ରମ କରାଯିବ । ଡିସେମ୍ବର ୨୪ ତାରିଖ ରାତି ସାଢେ ୧୧ଟାରୁ ଏହି ୱାଚ୍ ନାଇଟ୍ ମାସ୍ ହେବ । ସାମୂହିକ ପ୍ରାର୍ଥନା ମାଧ୍ୟମରେ ପ୍ରଭୁ ଯୀଶୁ ଧରାବତରଣ କରିବେ ।

ସେହିପରି ୨୫ ତାରିଖ ଦିନ ଫେସବୁକ୍ ଲାଇଭ୍, ୟୁ-ଟୁ୍ୟବ୍, ଜୁମ୍ ଆପ୍ ମାଧ୍ୟମରେ ପ୍ରାର୍ଥନା କରାଯିବ ।

ତା ଛଡ଼ା ବିଭିନ୍ନ ପ୍ରକାର ସାଂସ୍କୃତିକ କାର୍ଯ୍ୟକ୍ରମ ବିଭିନ୍ନ ଥିମ୍ ଅନୁସାରେ କରାଯିବାକୁ ସ୍ଥିର କରାଯାଇଥିବା ବେଳେ ଏସବୁ ବି ଅନ୍ ଲାଇନରେ ହେବ ।

ଏ ବାବଦରେ ଏକ କାଥୋଲିକ୍ ଚର୍ଚ୍ଚର ଫାଦର କହିଛନ୍ତି ଖ୍ରୀଷ୍ଟମାସ ପାଳନ ନେଇ ସରକାରଙ୍କ କୌଣସି ଗାଇଡ଼ଲାଇନ୍ ଆସିନାହିଁ ।

୮ମାସ ହେବ ଚର୍ଚ୍ଚ ବନ୍ଦ ରହିଛି । ଏଥର ଖ୍ରୀଷ୍ଟମାସ ପାଇଁ କୌଣସି ପ୍ରସ୍ତୁତି ଆରମ୍ଭ ହୋଇନାହିଁ । କାରଣ କୋଭିଡ଼ ପାଇଁ କେହି କାହା ଘରକୁ ଯିବାକୁ ଭୟ କରୁଛନ୍ତି ।

ହାତରେ କେକ୍ ଦେଲେ କେହି ଖାଇବେନି । ତେଣୁ କେକ୍ ମଧ୍ୟ କଟାଯିବାର ଯୋଜନା ନାହିଁ ।

ପୁରୁଣା ଖ୍ରୀଷ୍ଟମାସ ଟ୍ରି ବା ରେଡିମେଡ ଟ୍ରିରେ କାମ ଚଳାଯିବ । ଆସନ୍ତା ବର୍ଷ ଆମେ ଏହାକୁ ନିଶ୍ଚିତ ଭାବେ ଧୂମଧାମ୍ରେ ପାଳନ କରିବୁ ।

ଲୋକାଲ ୱାୟାର