ଅଶାନ୍ତ ଆସାମରେ ଫସି ରହିଛନ୍ତି ବ୍ରହ୍ମପୁରର ୬୫ ଏନସିସି କ୍ୟାଡେଟ୍

ବ୍ରହ୍ମପୁର, ଡିସେମ୍ବର ୧୮(ଲୋକାଲ ୱାୟାର): ନାଗରିକତା ସଂଶୋଧନ ଆଇନ (ସିଏଏ)କୁ ବିରୋଧ କରି ଆସାମରେ ଆନ୍ଦୋଳନ ଯୋଗୁ କ୍ୟାମ୍ପକୁ ଯାଇଥିବା ବ୍ରହ୍ମପୁରର ୬୫ ଜଣ ଏନସିସି କ୍ୟାଡେଟ ସେଠାରେ ଫସି ରହିଥିବା ବ୍ରହ୍ମପୁର ୟୁନିଟର ଜଣେ ଅଧିକାରୀ ସୂଚନା ଦେଇଛନ୍ତି ।

ଏହି କ୍ୟାଡେଟ ମାନେ ଡିସେମ୍ବର ୯ ତାରିଖରେ ଆସାମ ଅଭିମୁଖେ ଯାଇଥିଲେ । ମେଘାଳୟର ଶିଲଂଠାରେ ଏକ ସପ୍ତାହବ୍ୟାପୀ (ଡିସେମ୍ବର ୧୧ରୁ ୧୮) ଟ୍ରେକିିଂ କ୍ୟାମ୍ପରେ ସେମାନେ ଯୋଗ ଦେବାର କାର୍ଯ୍ୟକ୍ରମ ଥିଲା ।

ଡିସେମ୍ବର ୧୧ ତାରିଖରେ ସେମାନେ ଗୁଆହାଟିରେ ପହଞ୍ଚିବା ବେଳକୁ ସିଏଏ ବିରୋଧରେ ଆନ୍ଦୋଳନ ବ୍ୟାପକ ହୋଇ କର୍ଫ୍ୟୁ ଜାରି ହୋଇ ସାରିଥିଲା । ତେଣୁ କ୍ୟାଡେଟମାନେ ଶିଲଂ ଅଭିମୁଖେ ଯିବା ସମ୍ଭବ ହୋଇ ନଥିଲା ।

ସେମାନଙ୍କୁ ପ୍ରଶାସନ କଡ଼ା ସୁରକ୍ଷାରେ ନେଇ ଆର୍ମିର ଟ୍ରାଞ୍ଜିଟ୍ କ୍ୟାମ୍ପରେ ୧୪ ତାରିଖ ପର୍ଯ୍ୟନ୍ତ ରଖିଥିଲା । ୧୫ ତାରିରୁ ସେମାନଙ୍କୁ ଟ୍ରାଞ୍ଜିଟ କ୍ୟାମ୍ପରୁ ୧୫ କିଲୋମିଟର ଦୂର ନାରଙ୍ଗୀ ଆର୍ମି କ୍ୟାଣ୍ଟନମେଣ୍ଟ ଏରିଆର ପ୍ରି-ଆରଡିସି କ୍ୟାମ୍ପରେ ରଖାଯାଇଛି ।

କ୍ୟାଡେଟ ମାନେ ନିରାପଦରେ ରହିଥିଲେ ମଧ୍ୟ ଟ୍ରେକିଂ କ୍ୟାମ୍ପକୁ ଯିବା ସମ୍ଭବ ହୋଇନାହିଁ । ଗତକାଲି ସେମାନେ ଏକ ଟ୍ରେନରେ ଓଡ଼ିଶା ଫେରିବାର ଥିଲା, କିନ୍ତୁ ଟ୍ରେନଟି ବାତିଲ ହୋଇ ଯାଇଥିଲା ।

ଶୀଘ୍ର କ୍ୟାଡେଟମାନଙ୍କୁ ଅନ୍ୟ ଏକ ସ୍ପେଶାଲ ଟ୍ରେନରେ ଓଡ଼ିଶା ଫେରାଇ ଆଣିବାର ବ୍ୟବସ୍ଥା କରାଯାଉଥିବା ସୂଚନା ଦେଇଛନ୍ତି ବ୍ରହ୍ମପୁରସ୍ଥିତ ଏନସିସି ବାଟାଲିଅନର ଚିଫ୍ ଅପରେଟିଂ ଅଫିସର ଗୋପଳ କୃଷ୍ଣ ମିଶ୍ର ।

ଲୋକାଲ ୱାୟାର