ଭୁବନେଶ୍ୱର, ଜାନୁଆରୀ ୧୬(ଲୋକାଲ ୱାୟାର): ଭାରତ ସ୍ୱାଧୀନ ହେବା ପରେ ଦେଶର ଅନ୍ୟତମ ବଡ ଅଭିଯାନ କୋଭିଡ-୧୯ ଟିକାକରଣର ଶୁଭାରମ୍ଭ ହୋଇଥିବା ବେଳେ ଶନିବାର ଏହି ଅଭିଯାନରେ ଶିକ୍ଷା ଓ ଅନୁସନ୍ଧାନ (ସୋଆ) ପରିଚାଳିତ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନସେସ୍ ଆଣ୍ଡ ସମ୍ ହସ୍ପିଟାଲ୍ ମଧ୍ୟ ସାମିଲ ହୋଇଛି ।
ଏହି ମହାମାରୀକୁ ପ୍ରତିହତ କରିବା ପାଇଁ ଆରମ୍ଭ ହୋଇଥିବା ସବୁଠାରୁ ବଡ଼ ଟିକାକରଣ ଅଭିଯାନ ଏକ ଆନନ୍ଦ ଏବଂ ଆଶ୍ୱସ୍ଥିକର ବାତାବରଣ ସୃଷ୍ଟି କରିଥିବା ବେଳେ ସୋଆ କୁଳପତି ତଥା ବିଶିଷ୍ଟ ନୁ୍ୟରୋସର୍ଜନ ପ୍ରଫେସର (ଡଃ) ଅଶୋକ କୁମାର ମହାପାତ୍ର ଟିକାର ପ୍ରଥମ ଡୋଜ ଗ୍ରହଣ କରିଛନ୍ତି ।
ଟିକା ଗ୍ରହଣ ପରେ ପ୍ରଫେସର ମହାପାତ୍ର ଗଣମାଧ୍ୟମକୁ କହିଛନ୍ତି, ଏହି ଦିନ ପାଇଁ ଆମେ ଦୀର୍ଘ ୬ ମାସରୁ ଅଧିକ ସମୟ ଅପେକ୍ଷା କରିଥିଲୁ ।
ଟିକା ଗ୍ରହଣ କରିଥିବାରୁ ମୁଁ ଖୁବ୍ ଖୁସି । ପୂର୍ବରୁ ଆମ ହସ୍ପିଟାଲ୍ କୋଭାକ୍ସିନ୍ ଟିକାର ପରୀକ୍ଷଣ ନିମନ୍ତେ ମନୋନୀତ ହୋଇଥିବାରୁ ଏହା ମଧ୍ୟ ଖୁବ୍ ଗର୍ବର ବିଷୟ ।
ଟିକା ଗ୍ରହଣ କରିବା ପରେ ପ୍ରଫେସର ମହାପାତ୍ରଙ୍କୁ ୩୦ ମିନିଟ୍ ନିରୀକ୍ଷଣ ନିମନ୍ତେ ରଖାଯାଇଥିଲା ।
ଟିକାର ପ୍ରଥମ ଡୋଜ୍ ଗ୍ରହଣ ପରେ ସେ କିପରି ଅନୁଭବ କରୁଛନ୍ତି ବୋଲି ପ୍ରଶ୍ନର ଉତ୍ତର ଦେଇ ପ୍ରଫେସର ମହାପାତ୍ର କହିଥିଲେ ଯେ ସେ ସମ୍ପୂର୍ଣ୍ଣ ସୁସ୍ଥ ଅଛନ୍ତି ।
ଏହି ଟିକାର କୌଣସି ପାର୍ଶ୍ଵ ପ୍ରତିକି୍ରୟା ନାହିଁ । ଏହି ଟିକା ମୃତ ଭାଇରସକୁ ନେଇ ତିଆରି ହୋଇଛି ଏବଂ ଖୁବ୍ ପ୍ରଭାବଶାଳୀ ।
ଏହି କରୋନା ମହାମାରୀ ଆମ ଜୀବନ ଉପରେ ଗଭୀର ପ୍ରଭାବ ପକାଇ ଥିବା ପ୍ରଚ୍ଛଦପଟ୍ଟରେ କୌଣସି ଭୟ ନ କରି ଟିକା ଗ୍ରହଣ କରି କରୋନା ସହ ଯୁଦ୍ଧ କରିବା ଆବଶ୍ୟକ ବୋଲି ପ୍ରଫେସର ମହାପାତ୍ର କହିଥିଲେ ।
୨୮ ଦିନ ପରେ ସେ ଟିକାର ଦ୍ୱିତୀୟ ଡୋଜ ନେବେ ବୋଲି ସୂଚନା ଦେଇଥିଲେ ।
ପ୍ରଥମ ଦିନ ପ୍ରାୟ ୧୦୦ ଜଣ ଡାକ୍ତର, ନର୍ସ, ପାରାମେଡିକ୍ସ ଓ ସଫେଇ କର୍ମଚାରୀଙ୍କ ଭଳି ସ୍ୱାସ୍ଥ୍ୟ ସେବାକର୍ମୀଙ୍କୁ ଆଇଏମଏସ୍ ଆଣ୍ଡ ସମ୍ ହସ୍ପିଟାଲରେ ଟିକା ପ୍ରଦାନ କରାଯାଇଛି ।
ରାଜଧାନୀରେ ଆଇଏମଏସ୍ ଆଣ୍ଡ ସମ୍ ହସ୍ପିଟାଲ୍ ସହ ୬ଟି ସ୍ୱାସ୍ଥ୍ୟସେବା କେନ୍ଦ୍ରକୁ ଟିକାକରଣ ନିମନ୍ତେ ସାମିଲ କରାଯାଇଛି ।
ଓଡ଼ିଶାରେ ୨ଟି ଭାକ୍ସିନ୍, କୋଭାକ୍ସିନ୍ ଓ କୋଭିସିଲ୍ଡ ବ୍ୟବହାର କରାଯାଉଥିବା ବେଳେ ଆଇଏମଏସ୍ ଆଣ୍ଡ ସମ୍ ହସ୍ପିଟାଲ୍ ସମେତ ବିଏମସି ଅଧୀନରେ ଥିବା ଅଂଚଳଗୁଡ଼ିକରେ କୋଭାକ୍ସିନ୍ ଟିକା ପ୍ରଦାନ କରାଯାଉଛି ।
ଏହି ଟିକାକରଣ କାର୍ଯ୍ୟକ୍ରମରେ ପ୍ରଫେସର ମହାପାତ୍ରଙ୍କ ସମେତ ଆଇଏମଏସ୍ ଆଣ୍ଡ ସମ୍ ହସ୍ପିଟାଲ୍ ଓ ସମ୍ ଅଲ୍ଟିମେଟ ମେଡିକେୟାରର ଅନେକ ଡାକ୍ତର ସାମିଲ୍ ଥିଲେ ।
ଟିକାକରଣ କାର୍ଯ୍ୟକ୍ରମ ନିମନ୍ତେ ୬ଟି ଅସ୍ଥାୟୀ ହଲ୍ ପ୍ରସ୍ତୁତ କରାଯାଇଥିବା ବେଳେ ୨ଟି ହଲ୍କୁ ରେଜିଷ୍ଟ୍ରେସନ୍, ୨ଟିକୁ ଟିକାକରଣ ଏବଂ ୨ଟି ହଲକୁ ଟିକା ଗ୍ରହଣ କରିବା ବ୍ୟକ୍ତି ୩୦ ମିନିଟ୍ ବିଶ୍ରାମ ନେବା ନିମନ୍ତେ ପ୍ରସ୍ତୁତ କରାଯାଇଛି ।
ଲୋକାଲ ୱାୟାର
Leave a Reply