ଆଇଓସିଏଲ ତ୍ରିପାକ୍ଷିକ ଆଲୋଚନା ବିଫଳ, ବିରୋଧ ଜାରି ରଖିବେ ଢିଙ୍କିଆ ପଞ୍ଚାୟତବାସୀ

ପାରାଦୀପ, ଡିସେମ୍ବର ୧୨ (ଲୋକାଲୱେର): ଆଇଓସିଏଲ, ଜିଲ୍ଲା ପ୍ରଶାସନ ଓ ଢିଙ୍କିଆ ପଞ୍ଚାୟତବାସୀଙ୍କ ମଧ୍ୟରେ ଗୋଚର ଜମିରେ ପାରାଦୀପ- ହାଇଦ୍ରାବାଦ ପ୍ରଡକ୍ଟ ପାଇପଲାଇନ (ପିଏଚପିଏଲ) ବିଛାଇବାକୁ ନେଇ ହୋଇଥିବା ଆଲୋଚନା ବିଫଳ ହୋଇଛି । ଫଳରେ ପଞ୍ଚାୟତବାସୀ ଆନେ୍ଦାଳନ ତୀବ୍ର କରିବାକୁ ଧମକ ଦେଇଛନ୍ତି ।

ନଭେମ୍ବର ୨୯ରେ ଗ୍ରାମବାସୀମାନେ ଗୋଚର ଜମିରେ ପିଏଚପିଏଲ ପାଇପ ଲାଇନ ବିଛାଇବାକୁ ବିରୋଧ କରିଥିଲେ ।

ଅଚଳାବସ୍ଥା ଦୂର ପାଇଁ ଜିଲ୍ଲା ପ୍ରଶାସନ ପକ୍ଷରୁ ଜଗତସିଂହପୁର ଜିଲ୍ଲାପାଳଙ୍କ କାର୍ଯ୍ୟାଳୟରେ ତ୍ରିପାକ୍ଷିକ ଆଲୋଚନା ହୋଇଥିଲା ।

ବୈଠକରେ ଜିଲ୍ଲାପାଳ ସରୋଜ କୁମାର ମିଶ୍ର, ଏସପି ପ୍ରକାଶ ଆର, ଉପଜିଲ୍ଲାପାଳ ଧର୍ମେନ୍ଦ୍ର ମଲ୍ଲିକ, ଆଇଓସିଲର ପ୍ରବନ୍ଧକ (ମାନବ ସମ୍ବଳ) ଦିଲ୍ଲୀପ ମହାନ୍ତି ଓ ଗ୍ରାମବାସୀଙ୍କ ପକ୍ଷରୁ ୭ ପ୍ରତିନିଧି ଉପସ୍ଥିତ ଥିଲେ ।

୨୦୧୮ରେ ଆଇଓସିଏଲ ଏରସମା ତହସିଲଦାରଙ୍କ ଠାରେ ଆରଓଡବ୍ଲୁ (ରାଇଟ ଅଫ ୱେ) ପାଇଁ ଆବେଦନ କରିଥିଲା ।

ଏହି ଆବେଦନ ଏବେ ରାଜସ୍ୱ ଓ ବିପର୍ଯ୍ୟୟ ପ୍ରବନ୍ଧନ ବିଭାଗର ବିଚାରାଧୀନ ଥିବା ସତ୍ୱେ ଆଇଓସିଲ ଢିଙ୍କିଆର ଗୋଚର ଜମିରେ ପାଇପ ଲାଇନ ବିଛାଇବା କାମ ଆରମ୍ଭ କରିଥିଲା ।

ଜମି ଅସଂରକ୍ଷିତ ହୋଇନଥିବା ତଥା ଗ୍ରାମବାସୀଙ୍କ ମତାମତ ନିଆ ଯାଇ ନଥିବାରୁ ଲୋକେ କାମକୁ ବିରୋଧ କରିଥିଲେ ।

ପାନୀୟ ଜଳ ଯୋଗାଣ, ରାସ୍ତା ଯୋଗାଯୋଗ, ଷ୍ଟ୍ରିଟ ଲାଇଟ, ସ୍ୱାସ୍ଥ୍ୟ ସେବା, ଭୂମିହୀନଙ୍କୁ ଜମି ପ୍ରଦାନ, ମିଛ ମାମଲା ପ୍ରତ୍ୟାହାର ଆଦି ଛଅ ଦଫା ଦାବିରେ ଗତ ନଭେମ୍ବର ୨୯ରୁ ବିରୋଧ ପ୍ରଦର୍ଶନ କରାଯାଉଛି ।

ହେଲେ ପ୍ରଶାସନ ପକ୍ଷରୁ ପାଇପ ଲାଇନ ବିଛାଇବା ପରେ ସମସ୍ୟା ସମାଧାନ ହେବ ବୋଲି ପ୍ରସ୍ତାବ ଦିଆ ଯାଇଥିଲା ।

ଏଥିରେ ଗ୍ରାମବାସୀ ରାଜି ନହେବାରୁ ଆଲୋଚନା ନିଷ୍ଫଳ ହୋଇଥିଲା ବୋଲି ପଂଚାୟତ ସମିତି ସଦସ୍ୟ ଦେବେନ୍ଦ୍ର ସ୍ୱାଇଁ କହିଛନ୍ତି ।

ଲୋକାଲ ୱାୟାର