ଆଜିଠୁ ବଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟ, ଶ୍ରୀମନ୍ଦିର ଟଙ୍କା ହେବ ମୁଖ୍ୟ ପ୍ରସଙ୍ଗ

ଭୁବନେଶ୍ୱର, ମାର୍ଚ୍ଚ ୧୧(ଲୋକାଲ ୱାୟାର): ଆଜିଠୁ ବିଧାନସଭା ବଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟ ଆରମ୍ଭ ହେଉଥିବା ବେଳେ ୟେସ୍ ବ୍ୟାଙ୍କରେ ଶ୍ରୀମନ୍ଦିର ଟଙ୍କା ରଖାଯିବା ଘଟଣା ହିଁ ମୁଖ୍ୟ ପ୍ରସଙ୍ଗ ହେବ ବୋଲି କଂଗ୍ରେସ ଓ ବିଜେପିର ବରିଷ୍ଠ ନେତାମାନେ ସୂଚନା ଦେଇଛନ୍ତି ।

ଉଲ୍ଲେଖଯୋଗ୍ୟ, ରାଜ୍ୟ ବିଧାନସଭାର ଦୁଇ ପର୍ଯ୍ୟାୟ ବିଶିଷ୍ଟ ବଜେଟ ଅଧିବେଶନ ଫେବ୍ରୁଆରୀ ୧୪ ତାରିଖରେ ଆରମ୍ଭ ହୋଇଥିଲା ।

ପ୍ରଥମ ପର୍ଯ୍ୟାୟ ଫେବ୍ରୁଆରୀ ୨୬ ତାରିଖରେ ଶେଷ ହୋଇଥିବା ବେଳେ ଏହି ଅବଧିରେ ରାଜ୍ୟ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ବଜେଟ ଆଗତ କରିଥିଲେ ।

ପ୍ରଥମ ପର୍ଯ୍ୟାୟରେ ଧାନ କ୍ରୟରେ ଅବ୍ୟବସ୍ଥା, ଆଇନ ଶୃଙ୍ଖଳା ବ୍ୟବସ୍ଥା ଇତ୍ୟାଦି ପ୍ରସଙ୍ଗ ହୋଇଥିଲା ।

ଅଧିବେଶନର ଦ୍ୱିତୀୟ ପର୍ଯ୍ୟାୟ ମାର୍ଚ୍ଚ ୧୧ (ଆଜିଠୁ) ଆରମ୍ଭ ହେଉଥିବା ବେଳେ ଏପ୍ରିଲ ୯ ତାରିଖରେ ଶେଷ ହେବାର କାର୍ଯ୍ୟକ୍ରମ ରହିଛି ।

ତେବେ ଦ୍ୱିତୀୟ ପର୍ଯ୍ୟାୟ ଆରମ୍ଭ ହେବା ପୂର୍ବରୁ ଶ୍ରୀମନ୍ଦିର ଟଙ୍କା ପ୍ରସଙ୍ଗରେ ରାଜନୀତି ସରଗରମ ରହିଛି ।

ୟେସ୍ ବ୍ୟାଙ୍କ ଏକ ବେସରକାରୀ ବ୍ୟାଙ୍କ ହୋଇଥିଲେ ମଧ୍ୟ ଶ୍ରୀନ୍ଦିରର ୫୪୫ କୋଟି ଟଙ୍କା କାହା ନିର୍ଦ୍ଦେଶରେ ସେଠାରେ ରଖାଯାଇଥିଲା ଏବଂ ଏବେ ରିଜର୍ଭ ବ୍ୟାଙ୍କ ଅଫ ଇଣ୍ଡିଆ ବ୍ୟାଙ୍କକୁ ନିଜ କବ୍ଚାକୁ ନେଇ ସାରିଥିବା ବେଳେ ଟଙ୍କାର ଭବିଷ୍ୟତ କ’ଣ ବୋଲି ବିରୋଧୀ ମାନେ ପ୍ରଶ୍ନ ଉଠାଇଛନ୍ତି ।

ଏପରିକି ୟେସ୍ ବ୍ୟାଙ୍କ ଅନିୟମିତତା କଥା ପଦାକୁ ଆସିବା ପରେ ତିରୁପତି ତିରୁମାଲା ମନ୍ଦିର ଟ୍ରଷ୍ଟ ରଖିଥିବା ଅର୍ଥ ତୁରନ୍ତ ଉଠାଇ ନେବାରେ ସଫଳ ହୋଇଛି । କିନ୍ତୁ ଶ୍ରୀମନ୍ଦିର କର୍ତ୍ତୃପକ୍ଷ ଚୁପ୍ ଚାପ୍ କାହିଁକି ବସିଥିଲେ ବୋଲି ବିରୋଧୀ ପ୍ରଶ୍ନ କରିଛନ୍ତି ।

ଏହି ପ୍ରସଙ୍ଗରେ ଦିନେ ତଳେ ରାଜ୍ୟ ସରକାରଙ୍କୁ କଡ଼ା ସମାଲୋଚନା କରିଥିବା କଂଗ୍ରେସ ନେତା ନରସିଂହ ମିଶ୍ର କହିଛନ୍ତି, ବିଧାନସଭାରେ ଏହି ପ୍ରସଙ୍ଗକୁ ତାଙ୍କ ଦଳ ଉଠାଇବ ।

ଏଥିପାଇଁ କିଏ ଦାୟୀ ତାହା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରକାଶ କରିବାକୁ ସେ ଦାବି କରିଛନ୍ତି ।

ସେହିପରି ଚିଟଫଣ୍ଡ ସ୍କାମର ତଦନ୍ତ କରୁଥିବା ଜଷ୍ଟିସ୍ ଏମଏମ ଦାସ କମିଶନଙ୍କ କାର୍ଯ୍ୟକାଳ ବୃଦ୍ଧି ନ ହେବା ଘଟଣାକୁ ମଧ୍ୟ ପ୍ରସଙ୍ଗ କରିବାକୁ ବିରୋଧୀ ଦଳ ଗୁଡ଼ିକ ପ୍ରସ୍ତୁତ ହେଉଥିବା ଜଣେ ବିଧାୟକ ସୂଚନା ଦେଇଛନ୍ତି ।

ଶ୍ରୀମନ୍ଦିର ଟଙ୍କା ପ୍ରସଙ୍ଗ ସହ ଧାନ କ୍ରୟରେ ଅବ୍ୟବସ୍ଥା ଯୋଗୁ ରାଜ୍ୟରେ ଚାଷୀମାନେ ହଇରାଣ ହେଉଥିବାରୁ ଏହି ପ୍ରସଙ୍ଗକୁ ମଧ୍ୟ ଗୃହରେ ଉଠାଯିବ ବୋଲି କହିଛନ୍ତି ବିଜେପି ବିଧାୟକ ବିଷ୍ଣୁ ଚରଣ ସେଠୀ ।

ଆଗକୁ ରାଜ୍ୟସଭା ନିର୍ବାଚନ ଥିବାରୁ ବିଧାନସଭାରେ ବିଜେପି-ବିଜେଡି ସମ୍ପର୍କକୁ ନେଇ ମଧ୍ୟ କଂଗ୍ରେସ ସଦସ୍ୟମାନେ କଡ଼ା ଟିପ୍ପଣୀ କରିବାର ସମ୍ଭାବନା ରହିଛି ।

ତେବେ ରାଜ୍ୟ ସଭା ନିର୍ବାଚନରେ କଂଗ୍ରେସ ଭୋଟ ଦାନ ନ କରିପାରେ ବୋଲି ପିସିସି ମୁଖ୍ୟ ନିରଞ୍ଜନ ପଟ୍ଟନାୟକ ସୂଚନା ଦେଇଥିବା ବେଳେ ବିଜେପି ମଧ୍ୟ ପ୍ରାର୍ଥୀ ଦେବ ନାହିଁ ବୋଲି ଦଳର ବରିଷ୍ଠ ନେତା କହି ସାରିଛନ୍ତି ।

ଏପରି କ୍ଷେତ୍ରରେ ବିଜେଡି ଘୋଷଣା କରିଥିବା ଚତୁର୍ଥ ପ୍ରାର୍ଥୀଙ୍କ ପ୍ରତି କାହାର ସମର୍ଥନ ମିଳିବ ତାହା ହିଁ ରାଜନୈତିକ ମହଲରେ ଏବେ ଆଲୋଚନାର ବିଷୟ ହୋଇଛି ।

ଲୋକାଲ ୱାୟାର