ଆଜି ରସଗୋଲା ଦିବସ : ରସଗୋଲା ବିଷୟରେ ଜାଣନ୍ତୁ କିଛି କଥା

ଭୁବନେଶ୍ୱର, ଜୁଲାଇ ୪ (ଲୋକାଲ ୱାୟାର) : ଶ୍ରୀ ଜୀଉଙ୍କ ପବିତ୍ର ନିଳାଦ୍ରିବିଜେ ଅବସରରେ ରାଜ୍ୟରେ ଶନିବାର ରସଗୋଲା ଦିବସ ପାଳନ ହେଉଛି ।

କରୋନା କଟକଣା ଯୋଗୁଁ ଚଳିତଥର ନିରାଡମ୍ବରରେ ରସଗୋଲା ଦିବସ ପାଳିଛନ୍ତି ରାଜ୍ୟବାସୀ । ରସଗୋଲାକୁ ନେଇ ଆସନ୍ତୁ ଜାଣିବା କିଛି କଥା ।

୧- ରସଗୋଲା ଦିବସ ପ୍ରତିବର୍ଷ ମହାପ୍ରଭୁଙ୍କ ନିଳାଦ୍ରିବିଜେ ଦିନ ପାଳିତ ହୁଏ ।

୨- ରଥଯାତ୍ରାରେ ମହାଲକ୍ଷ୍ମୀଙ୍କୁ ସାଙ୍ଗରେ ନ ନେଇ ପ୍ରଭୁ ଜଗନ୍ନାଥ, ଭାଇ ଓ ଭଉଣୀଙ୍କ ସହ ଗୁଣ୍ଡିଚା ମନ୍ଦିରକୁ ଚାଲିଯାଇଥାନ୍ତି ।

ଯାହାକୁ ନେଇ ମା’ ଲକ୍ଷ୍ମୀ କାଳିଆ ଠାକୁରଙ୍କ ଉପରେ ଅଭିମାନ କରିଥାନ୍ତି । ଅଭିମାନରେ ଜୟବିଜୟ ଦ୍ୱାର ବନ୍ଦ କରି ଦେଇଥାନ୍ତି ।

ମା’ ଲକ୍ଷ୍ମୀଙ୍କ ମାନଭଞ୍ଜନ କରିବା ଲାଗି ମହାପ୍ରଭୁଙ୍କ ପକ୍ଷରୁ ରସଗୋଲା ଅର୍ପଣ କରାଯାଇଥାଏ ।

୩- ୨୦୧୫ ଜୁଲାଇ ୩୦ ତାରିଖରେ ଏହି ରସଗୋଲା ଦିବସ ପ୍ରଥମ କରି ପାଳନ ହୋଇଥିଲା ।

୪- ରସଗୋଲା ଉତ୍ପତ୍ତିକୁ ନେଇ ପଶ୍ଚିମବଙ୍ଗ ଓ ଓଡ଼ିଶା ମଧ୍ୟରେ ଦୀର୍ଘଦିନ ବିବାଦ ପରେ ୨୦୧୯ ମସିହା ଜୁଲାଇ ୨୯ ତାରିଖରେ ଭାରତ ସରକାର ପକ୍ଷରୁ ଜିଆଇ (ଜିଓଗ୍ରାଫିକାଲ ଇଣ୍ଡିକେସନ) ଟ୍ୟାଗ ମାନ୍ୟତା ମିଳିଥିଲା ।

୫- ‘ଜଗନ୍ନାଥଙ୍କ ରସଗୋଲା’ ନାମରେ ଚେନ୍ନାଇ ଜିଆଇ ରେଜିଷ୍ଟର ପକ୍ଷରୁ ଜିଆଇ ଟ୍ୟାଗ ପ୍ରଧାନ କରାଯାଇଥିଲା ।

୬- ଏହା ପୂର୍ବରୁ ପଶ୍ଚିମବଙ୍ଗର ରସଗୋଲାକୁ ‘ବଙ୍ଗଳା ରସଗୋଲା’ର ମାନ୍ୟତା ମିଳି ସାରିଛି ।

୭- ରସଗୋଲା ଓଡ଼ିଶାର ପୁରୀ ସହରରୁ କ୍ଷୀରମୋହନ ଭାବେ ଜନ୍ମିଥିବାର ଜଣାଯାଏ । ହେଲେ ପ୍ରମାଣର ଅଭାବ ହେତୁ ସଠିକ୍ ମସିହା ଲିପିବଦ୍ଧ ହୋଇ ପାରିନାହିଁ ।

୮- ପୁରୀରୁ ଆରମ୍ଭ ହୋଇ ପରେ ଏହା କଟକର ସାଲେପୁର ଓ ଭୁବନେଶ୍ୱରର ପାହାଳ ଠାରେ ପରମ୍ପରାଗତ ବେଉସାରେ ପରିଣତ ହୋଇଛି ।

୯- ପ୍ରସିଦ୍ଧ ରସଗୋଲା ଭିତରେ ରହିଛି ବିକଳାନନ୍ଦ କରଙ୍କ ସାଲେପୁର ରସଗୋଲା ଓ ପାହାଳାରେ ପ୍ରସ୍ତୁତ ରସଗୋଲା ଭାରତ ସମେତ ଭାରତ ବାହାରେ ବେଶ୍ ପରିଚିତ ।

୧୦- ଉନ୍ନବିଂଶ ଶତାଦ୍ଦୀର ଶେଷାର୍ଦ୍ଧ ବେଳକୁ “କେଳୁ ଚରଣ ବେହେରା’’ ପାହାଳ ଠାରେ ରସଗୋଲା ପ୍ରସ୍ତୁତ କରି ବ୍ୟବସାୟ ଆରମ୍ଭ କରିଥିଲେ ।

୧୧- ରସଗୋଲା ଓଡ଼ିଶା ପରମ୍ପରା ସହ ୭୦୦ ବର୍ଷ ହେବ ଯୋଡି ହୋଇଥିବା ବେଳେ କଲିକତାରେ ମାତ୍ର ଦେଢ ଶହ ବର୍ଷ ପୂର୍ବେ ପ୍ରଥମ ଥର ପାଇଁ ରସଗୋଲା ତିଆରି ହୋଇଥିଲା ବୋଲି ବିଶେଷଜ୍ଞମାନେ ମତ ଦେଇଛନ୍ତି ।

ଲୋକାଲ ୱାୟାର