ଆଠ ଦିନ ପରେ ବି ଚିନ୍ତାରେ କେନ୍ଦ୍ରାପଡ଼ାର ବନ୍ୟା କ୍ଷତିଗ୍ରସ୍ତ

କେନ୍ଦ୍ରାପଡ଼ା, ସେପ୍ଟେମ୍ବର ୪(ଲୋକାଲ ୱାୟାର): କେନ୍ଦ୍ରାପଡ଼ା ଜିଲ୍ଲା ରାଜକନିକା, ଆଳି, ପଟ୍ଟାମୁଣ୍ଡାଇ ଓ ଡେରାବିଶ ବ୍ଲକ୍ ଆଦି ଅଞ୍ଚଳରେ ହୋଇଥିବା ବନ୍ୟା ପରିସ୍ଥିତି ଆଜି ୮ ଦିନରେ ପହଞ୍ଚିଛି । ବନ୍ୟା ଯୋଗୁଁ ଘର ହରାଇଥିବା ବହୁ ସଂଖ୍ୟକ ଗ୍ରାମବାସୀ ଏବେ ଦୁଃଖଦ ଭବିଷ୍ୟତ ନେଇ ଚିନ୍ତାରେ ।

ବେନିପୁର ଗାଁର ପରମେଶ୍ୱର ଜେନା (୫୪) କହିଛନ୍ତି, ଆମେ କେବେ ଭାବିନଥିଲୁ ଗାଁରେ ବନ୍ୟା ଜଳ ପଶିବ । କିନ୍ତୁ ଦୁର୍ଭାଗ୍ୟବଶତଃ ଗାଁରେ ବନ୍ୟା ପାଣି ପଶିଲା ।

ଆହୁରି ମଧ୍ୟ ବିରୁପା ନଦୀ ଗାଁ ନିକଟରେ ବନ୍ଧ ଭାଙ୍ଗିଥିବା ବେଳେ ଗାଁ ଭିତରକୁ ପାଣି ପଶି ଆସିଛି । ଯଦିଓ ବର୍ତ୍ତମାନ ଗାଁରୁ ବନ୍ୟା ପାଣି ଧୀରେ ଧୀରେ କମୁଛି ହେଲେ ଆମେମାନେ ବନ୍ୟାରେ ନିଜ ଘର ହରାଇ ଦେଇଛୁ ।

ଏଭଳି ପରିସ୍ଥିତିରେ ସରକାର ହସ୍ତକ୍ଷେପ କରି ତୁରନ୍ତ ଆମମାନଙ୍କ ରହିବା ବ୍ୟବସ୍ଥା କରନ୍ତୁ ।

ବେନିପୁର ଗାଁର ନଳିନୀକାନ୍ତ ମଲ୍ଲିକ କହିଛନ୍ତି, ଆମ ଗାଁ ଆଗରୁ କେବେ ବନ୍ୟା ଦ୍ୱାରା ପ୍ରଭାବିତ ହୋଇଥିଲା, କିନ୍ତୁ ଏଥର ବିରୁପା ନଦୀରେ ଆସିଥିବା ବନ୍ୟା ଜଳ ଗାଁ ଭିତରକୁ ପଶିବା ସହ ସର୍ବସାଧାରଣ ଜୀବନ ଯାତ୍ରା ବ୍ୟାହତ କରିଛି ।

ଏହାସହ ଗାଁର ମାଟିଘର ଓ ଚାଷ ଜମି ନଷ୍ଟ ହୋଇଯାଇଛି । ଅଧିକାଂଶ ଗାଁ ଲୋକଙ୍କ ସବୁ କିଛି ନଷ୍ଟ ହୋଇ ସାରିଛି । ତେଣୁ ପୁଣି ଥରେ ଘର କରିବାକୁ ଆମକୁ ଅନ୍ତତଃପକ୍ଷେ ବାଉଁଶ ଓ ନଡ଼ା ଦରକାର ।

ଏ ନେଇ ଆଳି ବ୍ଲକ୍ ଗୋବିନ୍ଦପୁର ଗାଁର ଭରତ ଦାସ କହିଛନ୍ତି ଆସିଥିବା ରିଲିଫ୍ ସାମଗ୍ରୀ ବନ୍ୟା ପ୍ରପୀଡ଼ିତ ଅଞ୍ଚଳରେ ବଣ୍ଟନ କରାଯାଇଛି ।

ଆଉ ଏବେ ଗାଁର ସବୁ ଲୋକ ପୁନଃନିର୍ମାଣ ଓ ପୁନଃ ଥଇଥାନ ପାଇଁ ଅପେକ୍ଷା କରିଛନ୍ତି ।

ବନ୍ୟା ଦ୍ୱାରା ଅଧିକ କ୍ଷତିଗ୍ରସ୍ତ ହୋଇଥିବା ନଦୀକୂଳ ଲୋକଙ୍କୁ ଧ୍ୟାନ ଦିଆଯିବାକୁ ସରକାର ଯୋଜନା କରିଛନ୍ତି । ଏସବୁ ସ୍ଥାନରେ ପ୍ରାଥମିକ ପର୍ଯ୍ୟାୟରେ ସର୍ଭେ କାମ ଆରମ୍ଭ ହୋଇଛି ।

ସ୍ଥାନୀୟ ସାମାଜିକ କର୍ମୀ ବିରଜା ପତି କହିଛନ୍ତି, ଜିଲ୍ଲାରେ ଦେଖାଦେଇଥିବା ବନ୍ୟା ପରିସ୍ଥିତି ସମସ୍ତଙ୍କ ପାଇଁ ଏକ ଦୁଃଖଦ ଅନୁଭୂତି । ଏହି ମାନସିକ ଦୁଃଶ୍ଚିନ୍ତା ଏତେ ଶୀଘ୍ର କାହାରି ମୁଣ୍ଡରୁ ବାହାରିବନି ।

ବନ୍ୟା ଯୋଗୁଁ ଏବେ ନିଜସ୍ୱ ଘର ହରାଇଥିବା ଅଧିକାଂଶ ଲୋକ ବାତ୍ୟା ଆଶ୍ରୟସ୍ଥଳୀ ଓ ପଲିଥିନ୍ ଘର ଓ ଗାଁର ଅନ୍ୟ ଲୋକଙ୍କ ପକ୍କା ଘରେ ଆଶ୍ରୟ ନେଉଛନ୍ତି ।

ଆଳି ବ୍ଲକ୍ ପାତ୍ରପୁର ଗାଁର ପ୍ରକାଶ ନାୟକ କହିଛନ୍ତି ଚଳିତ ବନ୍ୟାରେ ଆମେ ସବୁକିଛି ହରାଇ ଦେଇଛୁ । ତେଣୁ ଆମେ ଗାଁରେ ଆଉଥରେ ଜୀବନ ଆରମ୍ଭ କରିବାକୁ ଚିନ୍ତା କରିଛୁ ।

ଆଳି ବ୍ଲକ୍ ମୋହନପୁର ଗାଁର ଅଜୟ ମଲ୍ଲିକ କହିଛନ୍ତି, ବନ୍ୟା ପୂର୍ବରୁ ଯଦିଓ ମୁଁ ଗରିବ ଥିଲି ହେଲେ ମୋ ପାଖରେ ୬ କୋଠରୀ ବିଶିଷ୍ଟ ଘର ଥିଲା । ତା ସାଙ୍ଗକୁ ୪ଟି ଗାଈ ଓ ୧୦ଟି ଛୋଳି ଥିଲା ।

ହେଲେ ବନ୍ୟା ସବୁକିଛି ଭସାଇ ନେଲା । ବନ୍ୟା ପାଣିରେ କଚ୍ଚା ଘର ଧୋଇଯିବା ସହ ଦୁଇଟି ଗାଈ ମରିଗଲେ । ଏବେ ସରକାର ବନ୍ୟା ପ୍ରପୀଡ଼ିତଙ୍କୁ କିପରି କ୍ଷତିପୂରଣ ମିଳିବ ସେ ଦିଗରେ ଚିନ୍ତା କରିବା ସମୟ ଆସିଛି ।

ଏ ବାବଦରେ ଜିଲ୍ଲା ଜରୁରୀକାଳୀନ ଅଧିକାରୀ ସମ୍ବିତ ଶତପଥୀ କହିଛନ୍ତି,ବନ୍ୟା ଯୋଗୁଁ ୨୧୭ଟି ଗାଁର ୩ ଲକ୍ଷ ୪୩ ହଜାର ୯୫୯ ଲୋକ ପ୍ରଭାବିତ ହୋଇଛନ୍ତି । ଜିଲ୍ଲା ପ୍ରଶାସନ ଏବେ ପ୍ରଭାବିତ ଲୋକଙ୍କୁ ସାହାଯ୍ୟ କରିବା ପାଇଁ କାର୍ଯ୍ୟ ଆରମ୍ଭ କରିଛି ।

ଲୋକାଲ ୱାୟାର