ଆସନ୍ତାକାଲି ଠାରୁ ପୁଣି ଟିକାକରଣ, ସବୁ ମେଡିକାଲ କଲେଜରେ ଦିନକୁ ହଜାରେ ଡୋଜ୍ ଦିଆଯିବ

ଭୁବନେଶ୍ୱର, ଜାନୁଆରୀ ୧୭(ଲୋକାଲ ୱାୟାର): ଆଜି ରବିବାର ବନ୍ଦ ଥିବା କୋଭିଡ ଟିକାକରଣ ପୁଣି ଆସନ୍ତାକାଲି ଠାରୁ ପୁରା ଦମରେ ଚାଲିବ ଏବଂ ସମସ୍ତ ମେଡିକାଲ କଲେଜରେ ୫ଟି ସେସନ ଟିକାକରଣ କରିବାକୁ ନିର୍ଦ୍ଦେଶ ଦିଆଯାଇଥିବା କହିଛନ୍ତି ରାଜ୍ୟ ସ୍ୱାସ୍ଥ୍ୟ ବିଭାଗର ବରିଷ୍ଠ ଅଧିକାରୀ ।

ସ୍ୱାସ୍ଥ୍ୟ ବିଭାଗ ନିଦେ୍ର୍ଦଶକ ବିଜୟ ପାଣିଗ୍ରାହୀ କହିଛନ୍ତି, ପ୍ରତ୍ୟେକ ମେଡିକାଲ କଲେଜରେ ପ୍ରତ୍ୟେକ ଦିନ ୧ ହଜାର ଲୋକଙ୍କ ଟିକାକରଣ ଲକ୍ଷ୍ୟ ରହିଛି ।

୫ଟି ସେସନରେ ଟିକାକରଣ ହେବ ଏବଂ ପ୍ରତ୍ୟେ ସେସନରେ ୨ଶହ ଡୋଜ୍ ଦିଆଯିବ ।

ପ୍ରତ୍ୟେକ ଜିଲ୍ଲା ହସପିଟାଲ ଓ ଉପଖଣ୍ଡ ହସପିଟାଲ ଗୁଡ଼ିକରେ ଦୈନିକ ୨ ଶହ ଜଣଙ୍କର ଟିକାକରଣ ଲକ୍ଷ୍ୟ ଧାର୍ଯ୍ୟ କରାଯାଇଛି ।

ଏସବୁ ହସପିଟାଲରେ ଦୈନିକ ଦୁଇଟି ଲେଖାଏଁ ସେସନ୍ ହେବ ଏବଂ ପ୍ରତ୍ୟେକ ସେସନରେ ଶହେ ଡୋଜ୍ ଦିଆଯିବ ।

ସେହିପରି ପ୍ରତ୍ୟେକ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଏବଂ ସହରାଞ୍ଚଳ ସ୍ୱାସ୍ଥ୍ୟ କେନ୍ଦ୍ରରେ ଦୈନିକ ଶହେ ଜଣଙ୍କ ଟିକାକରଣ ପାଇଁ ନିଦେ୍ର୍ଦଶ ଦିଆଯାଇଛି ।

ପ୍ରତ୍ୟେକ ଟିକାକରଣ କେନ୍ଦ୍ର ଦାୟିତ୍ୱରେ ୬ ଜଣ ସୁପରଭାଇଜରଙ୍କୁ ରଖାଯାଇଛି ।

ଉଲ୍ଲେଖଯୋଗ୍ୟ, କୋଭିଡ ଟିକାକରଣ ଅଭିଯାନର ପ୍ରଥମ ଦିନରେ ଶନିବାର ରାଜ୍ୟରେ ମୋଟ ୧୩ ହଜାର ୯୮୦ ଜଣ ସ୍ୱାସ୍ଥ୍ୟକର୍ମୀଙ୍କ ଟିକାକରଣ ହୋଇଛି ।

ଆସନ୍ତା ୨୫ ତାରିଖ ପୂର୍ବରୁ ସ୍ୱାସ୍ଥ୍ୟ ବିଭାଗ ପୋର୍ଟାଲରେ ପଂଜିକୃତ ହୋଇଥିବା ୩.୨୮ ଲକ୍ଷ ସ୍ୱାସ୍ଥ୍ୟକର୍ମୀଙ୍କ ଟିକାକରଣ ପାଇଁ ଲକ୍ଷ୍ୟ ରହିଛି ।

ପ୍ରଥମ ପର୍ଯ୍ୟାୟରେ ୧ ଲକ୍ଷ ୯୨ ହଜାର ୫୫୫ ଜଣ ସ୍ୱାସ୍ଥ୍ୟ କର୍ମୀଙ୍କୁ ପ୍ରଥମ ଡୋଜ୍ ଦିଆଯିବ ଏବଂ ୨୮ ଦିନ ପରେ ସେମାନଙ୍କୁ ଦ୍ୱିତୀୟ ଡୋଜ୍ ଦିଆଗଲେ ପ୍ରକ୍ରିୟା ଶେଷ ହେବ ।

ଉଲ୍ଲେଖଯୋଗ୍ୟ, ରାଜ୍ୟର ୩୦ଟି ଜିଲ୍ଲାର ୧୬୧ଟି କେନ୍ଦ୍ରରେ ଟିକାକରଣ କରାଯାଉଛି ।

ରାଜ୍ୟ ସରକାରଙ୍କ କେନ୍ଦ୍ରରୁ ମିଳିଥିବା ୪.୦୮ ଲକ୍ଷ ଡୋଜ୍ କୋଭିସିଲ୍ଡ ଓ ୨୦ ହଜାର ଡୋଜ୍ କୋଭାକ୍ସିନ୍ ଟିକାକୁ କୋଲ୍ଡ ଚେନ୍ ଅନୁସାରେ ବିଭିନ୍ନ କେନ୍ଦ୍ରକୁ ପଠାଯାଇଛି ।

ଲୋକାଲ ୱାୟାର