ଆସନ୍ତା ଶୁକ୍ରବାରରୁ ରମଜାନ : ଲକ ଡାଉନ ଯୋଗୁ ଜାରି ହେଲା କଟକଣା

କଟକ,ଏପ୍ରିଲ ୨୧(ଲୋକାଲ ୱାୟାର): ଆସନ୍ତା ଶୁକ୍ରବାର ଠାରୁ ମୁସଲିମ ଧର୍ମାବଲମ୍ବୀଙ୍କ ପବିତ୍ର ରମଜାନ ମାସ ଆରମ୍ଭ ହେଉଥବାରୁ ଲକ ଡାଉନ ସମୟରେ ସମୁହ ନମାଜ ପାଠକୁ ବାରଣ କରାଯାଇଥିବା କମିଶନରେଟ ପୁଲିସର ଜଣେ ଅଧିକାରୀ ସୋମବାର ଦିନ କହିଛନ୍ତି।

ଏ ନେଇ ସୋମବାର ଦିନ କଟକ ଡିସିପି ଅଖିଳେଶ୍ୱର ସିଂହଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ବୈଠକରେ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନିଆଯାଇଛି।

ଏହି ବୈଠକରେ ସହରର ବିଭିନ୍ନ ମୁସଲିମ ସାହିର ପ୍ରାୟ ୨୦ ଜଣ ମୁରବୀ ଓ ମୌଲବୀ ଯୋଗ ଦେଇଥିଲେ।

ନିଆଯାଇଥିବା ନିଷ୍ପତ୍ତି ଅନୁଯାୟୀ ସମୂହ ନ ମାଜ ପାଠ ଉପରେ କଟକଣା ଜାରି କରାଯାଇଥିବା ବେଳେ ରମଜାନ ସମୟରେ ମୌଲବୀଙ୍କୁ ମିଶାଇ ମୋଟ ତିନି ଜଣ ମସଜିଦକୁ ପ୍ରାର୍ଥନା ପାଇଁ ଯାଇ ପାରିବେ।

ରମଜାନ ପାଳନ ସମୟରେ ପରିବାର ସଦସ୍ୟଙ୍କ ବ୍ୟତୀତ ଅନ୍ୟ ସମ୍ପର୍କୀୟଙ୍କୁ ଘର ପ୍ରବେଶ ଉପରେ କଟକଣା ଜାରି କରାଯାଇଛି।ମୌଲବୀମାନେ ପ୍ରାର୍ଥନା କରିବା ଲାଗି ବ୍ୟକ୍ତିଗତ ଭାବେ କାହା ଘରକୁ ଯାଇପାରିବେ ନାହିଁ।

ରମଜାନ ସମୟରେ ସହର ବାହାରେ ରହୁଥିବା ବ୍ୟକ୍ତି ଯଦି ନିଜ ସାହି ଓ ବସ୍ତିକୁ ଆସନ୍ତି ତେବେ ତୁରନ୍ତ ଏ ବିଷୟରେ ପ୍ରଶାସନକୁ ଜଣାଇବା ଲାଗି ନିର୍ଦ୍ଦେଶ ଦିଆଯାଇଛି।

ଲୋକାଲ ୱାୟାର