ଆସନ୍ତା ୨୦ରୁ ଫେବ୍ରୁଆରୀ ୧୭ ହସ୍ତତନ୍ତ ମେଳା

ଭୁବନେଶ୍ୱର, ଜାନୁଆରୀ ୧୯(ଲୋକାଲ ୱାୟାର): ବୁଣାକାରମାନଙ୍କ ଉନ୍ନତି ପାଇଁ ଓଡ଼ିଶା ସରକାରଙ୍କ ପ୍ରାୟୋଜନରେ ବୟନିକା ଦ୍ୱାରା ଇଡ଼୍କୋ ପ୍ରଦର୍ଶନୀ ପଡ଼ିଆରେ ଜାତୀୟସ୍ତରୀୟ ହସ୍ତତନ୍ତ ମେଳାର ଆୟୋଜନ କରାଯାଉଛି ।

ଏହି ମେଳା ଆସନ୍ତା ୨୦ତାରିଖଠାରୁ ଫେବ୍ରୁଆରୀ ୧୭ ତାରିଖ ପର୍ଯ୍ୟନ୍ତ ଆୟୋଜିତ ହେବ ।

ଏହି ମେଳାକୁ ହସ୍ତତନ୍ତ ଓ ବୟନ ମନ୍ତ୍ରୀ ପଦ୍ମିନୀ ଦିଆନ ଉଦଘାଟନ କରିବେ । ଏହି ଉଦ୍ଘାଟନୀ ଉତ୍ସବରେ ବିଭାଗୀୟ କମିଶନର ତଥା ଶାସନ ସଚିବ ଶୁଭା ଶର୍ମା, ବୟନଶିଳ୍ପ ନିଦେ୍ର୍ଦଶକ ଜ୍ୟୋତି ପ୍ରକାଶ ଦାସ ପ୍ରମୁଖ ଯୋଗ ଦେବେ ।

ଏହି ପ୍ରଦର୍ଶନୀରେ ଭାରତର ବିଭିନ୍ନ କୋଣ ଅନୁକୋଣରେ ପ୍ରସ୍ତୁତ ସୂତା, ସିଲକ୍, ଟସର, ଏରି ଓ ବିଭିନ୍ନ ଡିଜାଇନ୍ର ଶାଢି, ଡ୍ରେସ୍, ଡ୍ରେସ୍ ମ୍ୟାଟେରିଆଲ୍, ପରଦା କପଡ଼ା, ଲୁଙ୍ଗି, ଧୋତି, ଟାୱେଲ୍, ଫର୍ନିସିଙ୍ଗ୍ କପଡ଼ା ଇତ୍ୟାଦି ଗ୍ରାହକଙ୍କ ପାଇଁ ଉପଲବ୍ଧ ହେବ ।

ଏହି ମେଳା ପ୍ରତ୍ୟହ ଦିନ ସାଢେ୧୧ଟାରୁ ରାତି ସାଢେ୯ଟା ପର୍ଯ୍ୟନ୍ତ ଚାଲିବ । ମେଳାରେ ଓଡ଼ିଶାର ପ୍ରତ୍ୟେକ ଷ୍ଟଲରେ ପ୍ରତ୍ୟେକ ବସ୍ତ୍ର ବିକ୍ରି ଉପରେ ସ୍ୱତନ୍ତ୍ର ରିହାତି ଦେବାର ବ୍ୟବସ୍ଥା କରାଯାଇଛି ।

ମେଳାରେ ମୋଟ ୧୧୭ଟି ଷ୍ଟଲର ଆୟୋଜନ ହୋଇଛି । ସେଥି ମଧ୍ୟରୁ ୮୫ଟି ଷ୍ଟଲ ଓଡ଼ିଶାର ବିଭିନ୍ନ ପ୍ରମୁଖ ସଂସ୍ଥା ଯଥା ବୟନିକା, ସମ୍ବଲପୁରୀ ବସ୍ତ୍ରାଳୟ, ଉକ୍ରଳିକା ଓ ସେରିଫେଡ୍ ତଥା ଅନ୍ୟାନ୍ୟ ପ୍ରାଥମିକ ତନ୍ତୁବାୟ ସହଯୋଗ ସମିତିମାନଙ୍କ ପାଇଁ ସଂରକ୍ଷିତ ରହିଛି ।

ଓଡ଼ିଶା ବ୍ୟତିତ ଅନ୍ୟ ୧୬ଟି ରାଜ୍ୟର ହସ୍ତତନ୍ତ ସଂସ୍ଥା ଓ ସମିତିମାନେ ଅଂଶଗ୍ରହଣ କରୁଛନ୍ତି ।

ଲୋକାଲ ୱାୟାର