ଆସନ୍ତା ୬ରୁ ଧଉଳି-କଳିଙ୍ଗ ମହୋତ୍ସବ

ଭୁବନେଶ୍ୱର, ଜାନୁଆରୀ ୩୦(ଲୋକାଲ ୱାୟାର): ଆସନ୍ତା ଫେବ୍ରୁଆରୀ ୬ ରୁ ୮ ପର୍ଯ୍ୟନ୍ତ ତିନିଦିନବ୍ୟାପୀ ଐତିହାସିକ ଧଉଳି ପାହାଡ଼ ପାଦ ଦେଶରେ ଅନୁଷ୍ଠିତ ହେବ ସପ୍ତଦଶ ଧଉଳି-କଳିଙ୍ଗ ମହୋତ୍ସବ ।

ଓଡ଼ିଶା ପର୍ଯ୍ୟଟନ ବିଭାଗ ଆନୁକୂଲ୍ୟରେ ଓଡ଼ିଶା ଡ୍ୟାନ୍ସ ଏକାଡେମୀ ପକ୍ଷରୁ ଆର୍ଟ ଭିଜନ ସହଯୋଗରେ ଏହି ମହୋତ୍ସବ ହେବ ।

ଏହି ଅବସରରେ ଓଡ଼ିଶୀ ସଙ୍ଗୀତ ଗୁରୁ ପଣ୍ଡିତ ଗୋପାଳ ଚନ୍ଦ୍ର ପଣ୍ଡାଙ୍କୁ ବୁଦ୍ଧ ସମ୍ମାନ ପ୍ରଦାନ କରାଯିବ ।

ରୁଚି ପ୍ରତିଭା ଫାଉଣ୍ଡେସନ ଓ ଏକାଡେମୀ ପକ୍ଷରୁ ତାଙ୍କୁ ପୁରସ୍କାର ସ୍ୱରୂପ ୧ ଲକ୍ଷ ଟଙ୍କା, ମାନପତ୍ର, ଅଙ୍ଗବସ୍ତ୍ର ପ୍ରଦାନ କରାଯିବ । ସେହିପରି ୪ଜଣଙ୍କୁ ଗୁରୁ ଗଙ୍ଗାଧର ପ୍ରଧାନଙ୍କ ସ୍ମୃତି ସମ୍ମାନ ପ୍ରଦାନ କରାଯିବ ।

ସେମାନେ ହେଲେ ବୀଣା ବାଦକ କେ. ରାମାରାଓ ପାତ୍ରୋ, ନୃତ୍ୟ ଗୁରୁ ଡ. ସ୍ନେହପ୍ରଭା ସାମନ୍ତରାୟ, ବରିଷ୍ଠ ସାମ୍ବାଦିକ ଶ୍ୟାମହରି ଚକ୍ର ଏବଂ ମରଣୋତ୍ତର ଭାବେ ଶବ୍ଦ ଓ ସଙ୍ଗୀତ ସଂଯୋଜକ ତାରାକାନ୍ତ ପଣ୍ଡାଙ୍କୁ ସମ୍ମାନିତ କରାଯିବ ।

ଏହି ପୁରସ୍କାର ସ୍ୱରୂପ ୨୫ ହଜାର ଟଙ୍କା, ମାନପତ୍ର, ଅଙ୍ଗବସ୍ତ୍ର ଦିଆଯିବ । ପ୍ରତି ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ପରିବେଷିତ ହେବ ।

ପ୍ରଥମ ସନ୍ଧ୍ୟାରେ ଅରୁଣା ମହାନ୍ତିଙ୍କ ଓଡ଼ିଶା ଡ୍ୟାନ୍ସ ଏକାଡେମୀ ଓଡ଼ିଶୀ, ଅସୀମବନ୍ଧୁ ଭଟ୍ଟାଚାର୍ଯ୍ୟଙ୍କ ଉପାସନା ସେଣ୍ଟର୍ ଫର୍ ଡ୍ୟାନ୍ସ କୋଲକାତା କଥକ, ସଦାଶିବ ପ୍ରଧାନଙ୍କ ଆଙ୍ଗିକ ମୟୂରଭଞ୍ଜ ଛଉ, ଦ୍ୱିତୀୟ ସନ୍ଧ୍ୟାରେ ଇଲିଆନା ସିତାରିସ୍ତିଙ୍କ ଆର୍ଟ ଭିଜନ ଓଡ଼ିଶୀ, ଅନୀତା ଗୁହାଙ୍କ ଭାରତାଞ୍ଜଳୀ ଚେନ୍ନାଇ ଭାରତନାଟ୍ୟମ୍, ସୁଶାନ୍ତ ମାହାନ୍ତୋଙ୍କ ପୁରୁଳିଆ କାଳିପଦ ଛଉ ନୃତ୍ୟ ସମିତି ପୁରୁଳିଆ ଛଉ, ତୃତୀୟ ସନ୍ଧ୍ୟାରେ ସ୍ୱପ୍ନାରାଣୀ ସିହ୍ନାଙ୍କ ନୃତ୍ୟ ନିଳୟ ଅନୁଗୁଳ ଓଡ଼ିଶୀ, ବେଙ୍ଗାଲୁରୁରୁ ବୈଜୟନ୍ତୀ କାଶୀଙ୍କ ଶାମ୍ଭବୀ ସ୍କୁଲ୍ ଅଫ୍ ଡ୍ୟାନ୍ସର କଳାକାର କୁଚିପୁଡ଼ି, ନୂଆଦିଲ୍ଲୀ ଆଚାର୍ଯ୍ୟ ଛଉ ନୃତ୍ୟ ବିଚିତ୍ରର କଳାକାରମାନେ ଶଶଧର ଆଚାର୍ଯ୍ୟଙ୍କ ନିଦେ୍ର୍ଦଶନାରେ ଷଢ଼େଇକଳା ଛଉ ପରିବେଷଣ କରିବେ ।

କୋଭିଡ୍ କଟକଣା ପାଇଁ କମ୍ ସଂଖ୍ୟକ ଦର୍ଶକଙ୍କ ଲାଗି ବ୍ୟବସ୍ଥା ହୋଇଛି । ଅଧିକ ଦର୍ଶକଙ୍କୁ ଯୋଡ଼ିବା ପାଇଁ ପର୍ଯ୍ୟଟନ ବିଭାଗ ଏହାକୁ ଭର୍ଚୁଆଲ୍ ମୋଡରେ ପ୍ରସାରଣ କରିବେ । ଦୂରଦର୍ଶନ ପକ୍ଷରୁ ଲାଇଭ୍ ପ୍ରସାରଣ ହେବ ।

ଓଡ଼ିଶା ଡ୍ୟାନ୍ସ ଏକାଡେମୀ ଠାରେ ଆୟୋଜିତ ଏହି ସାମ୍ବାଦିକ ସମ୍ମିଳନୀରେ ପର୍ଯ୍ୟଟନ ନିଦେ୍ର୍ଦଶକ ସଚିନ ରାମଚନ୍ଦ୍ର ଯାଦବ, ସହଯୋଗୀ ନିଦେ୍ର୍ଦଶକ ରତିକାନ୍ତ ପଟ୍ଟନାୟକ, ଅରୁଣା ମହାନ୍ତି, ଇଲିଆନା ସିତାରିସ୍ତି ଉପସ୍ଥିତ ଥିଲେ ।
ଲୋକାଲ ୱାୟାର