ଆସୁଛି ୪ ଲକ୍ଷ ୮ ହଜାର କରୋନା ଟିକା ଡୋଜ୍, ବୟସ୍କ ସ୍ୱାସ୍ଥ୍ୟକର୍ମୀଙ୍କୁ ପ୍ରଥମେ

ଭୁବନେଶ୍ୱର, ଜାନୁଆାରୀ ୧୨(ଲୋକାଲ ୱାୟାର): ରାଜ୍ୟକୁ ଆସୁଛି କରୋନା ଟିକାର ୪ ଲକ୍ଷ ୮ ହଜାର ଡୋଜ୍ ଏବଂ ବୟସ୍କ ସ୍ୱାସ୍ଥ୍ୟକର୍ମୀମାନଙ୍କୁ ଏହା ପ୍ରଥମେ ଦିଆଯିବ ବୋଲି ମଙ୍ଗଳବାର କହିଛନ୍ତି ସ୍ୱାସ୍ଥ୍ୟ ବିଭାଗ ଅତିରିକ୍ତ ମୁଖ୍ୟ ସଚିବ ପ୍ରଦୀପ୍ତ କୁମାର ମହାପାତ୍ର ।

ସେ କହିଛନ୍ତି, ଆଜି ଅପରାହ୍ଣ ପ୍ରାୟ ୪ଟା ୨୫ରେ ସ୍ପାଇସ ଜେଟ ବିମାନରେ ପୁନେରୁ କରୋନା ଟିକା ଆସି ଭୁବନେଶ୍ୱରର ବିଜୁ ପଟ୍ଟନାୟକ ଆନ୍ତର୍ଜାତିକ ବିମାନବନ୍ଦରରେ ପହଞ୍ଚିବ ।

ମୋଟ ୪୦ ହଜାର ୮ ଶହ ଟିକା ଶିଶି ଆସୁଛି । ଗୋଟିଏ ଶିଶିରେ ୧୦ଟି ଡୋଜ୍ ରହୁଛି ।

ଅର୍ଥାତ୍ କୋଭିସିଲ୍ଡ କରୋନା ଟିକା ୪ ଲକ୍ଷ ୮ ହଜାର ଡୋଜ୍ ଆସୁଛି । ଏଥିସହ କୋଭାକ୍ସିନର ୨୦ ହଜାର ଡୋଜ୍ ମଧ୍ୟ ଆସୁଥିବା କେନ୍ଦ୍ର ସରକାର ଅବଗତ କରାଇଛନ୍ତି ।

ଭୁବନେଶ୍ୱର ବିମାନବନ୍ଦରରେ ଟିକା ପହଞ୍ଚିବା ପରେ ସେଠାରୁ ତୁରନ୍ତ ଟିକାଗୁଡ଼ିକୁ ରାଜ୍ୟ ଟିକା କେନ୍ଦ୍ର୍ରକୁ ନେଇ ମହଜୁଦ୍ ରଖାଯିବ ।

ଏହାପରେ ରାଜ୍ୟର ୯ଟି ଆଞ୍ଚଳିକ ଟିକା କେନ୍ଦ୍ର (ଭୁବନେଶ୍ୱର, କଟକ, ଗଞ୍ଜାମ, ବାଲେଶ୍ୱର,ସୁନ୍ଦରଗଡ଼, ସମ୍ବଲପୁର, ବଲାଙ୍ଗିର, କନ୍ଧମାଳ ଏବଂ କୋରାପୁଟ)କୁ ତାହା ପଠାଯିବ ।

ସେଠାରୁ ସବୁ ଜିଲ୍ଲାପାଳମାନଙ୍କୁ ଭ୍ୟାକ୍ସିନ ଗାଡ଼ି ପଠାଇ ଟିକା ନେଇ ଯିବାକୁ କୁହାଯାଇଛି ।

ଆସନ୍ତା ୧୬ ତାରିଖରୁ ସ୍ୱାସ୍ଥ୍ୟ କର୍ମୀ ଓ ଅଙ୍ଗନବାଡ଼ି କର୍ମୀମାନଙ୍କ ଟିକାକରଣ ଆରମ୍ଭ ହୋଇଯିବ ।

ତେବେ ବୟସ୍କ ବୟସ୍କ ସ୍ୱାସ୍ଥ୍ୟକର୍ମୀଙ୍କ ଟିକାକରଣକୁ ପ୍ରାଧାନ୍ୟ ଦିଆଯିବ । ଯେଉଁ ସସବୁ ଅଞ୍ଚଳରେ କରୋନାର ସର୍ବାଧିକ ପ୍ରଭାବ ରହିଛି ସେସବୁ ସ୍ଥାନକୁ ତୁରନ୍ତ ତାହା ପଠାଯିବ ।

୩ ଲକ୍ଷ ୨୮ ହଜାର ସ୍ୱାସ୍ଥ୍ୟ କର୍ମୀଙ୍କୁ ପ୍ରଥମ ପର୍ଯ୍ୟାୟରେ ଟିକା ଦେବାକୁ ସ୍ଥିର ହୋଇଛି ।

ଜାନୁଆରୀ ୨୫ ତାରିଖ ସୁଦ୍ଧା ଦ୍ୱିତୀୟ ପର୍ଯ୍ୟାୟ ଟିକାକରଣ ପାଇଁ ଡାଟା ଅପଲୋଡ କରାଯିବ ବୋଲି ସେ କହିଛନ୍ତି ।

ଉଲ୍ଲେଖଯୋଗ୍ୟ, ରାଜଧାନୀ ଭୁବନେଶ୍ୱରରେ ମଧ୍ୟ ୧୬ ତାରିଖରୁ ଟିକାକରଣ ଆରମ୍ଭ ହେବ ।

୧୬ ତାରିଖରେ ରାଜଧାନୀର ୫ଟି ସ୍ଥାନ (କ୍ୟାପିଟାଲ ହସପିଟାଲ, ୟୁନିଟ-୪ ସରକାରୀ ହସପିଟାଲ, ବିଏମସି ହସପିଟାଲ, ସମ୍ ଓ କିମ୍ସ ହସପିଟାଲ)ରେ ଟିକାର ଶୁଭାରମ୍ଭ କରାଯିବ ।

କ୍ୟାପିଟାଲ ହସପିଟାଲକୁ ମିଶାଇ ମୋଟ ୨୭ଟି ସରକାରୀ ଓ ୧୮ଟି ଘରୋଇ ହସପିଟାଲରେ ଟିକାକରଣ କେନ୍ଦ୍ର କରାଯିବ ।

ମୋଟ ୨୧ ହଜାର ଡାକ୍ତର, ସ୍ୱାସ୍ଥ୍ୟକର୍ମୀ ଓ ଆଗଧାଡ଼ିର କରୋନା ଯୋଦ୍ଧାଙ୍କ ଟିକାକରଣ ପାଇଁ ପ୍ରଥମ ପର୍ଯ୍ୟାୟରେ ଲକ୍ଷ୍ୟ ଥିବା କହିଛନ୍ତି ବିଏମସି କମିଶନର ପ୍ରେମଚନ୍ଦ୍ର ଚୌଧୁରୀ ।

ଲୋକାଲ ୱାୟାର