ଏନଆଇଟିର ୧୭ତମ ସମାବର୍ତ୍ତନ ଉତ୍ସବରେ ୧୧ ବିଶିଷ୍ଟ ବ୍ୟକ୍ତି ସମ୍ମାନିତ

ରାଉରକେଲା, ଜାନୁଆରୀ ୧୮(ଲୋକାଲ ୱାୟାର): ରାଉରକେଲା ସ୍ଥିତ ଜାତୀୟ ପ୍ରଯୁକ୍ତି ପ୍ରତିଷ୍ଠାନ (ଏନଆଇଟି)ର ୧୭ତମ ସମାବର୍ତ୍ତନ ଉତ୍ସବ ଶନିବାର ଅନୁଷ୍ଠିତ ହୋଇଥିବା ବେଳେ ୧୧ ଜଣ ବିଶିଷ୍ଟ ବ୍ୟକ୍ତି, ଯେଉଁମାନେ କି ଉକ୍ତ ଶିକ୍ଷାନୁଷ୍ଠାନର ପୁରାତନ ଛାତ୍ରଛାତ୍ରୀ ସେମାନଙ୍କୁ ସମ୍ମାନିତ କରାଯାଇଛି ।

ଏନଆଇଟି ପୁରାତନ ଛାତ୍ରଛାତ୍ରୀଙ୍କ ମଧ୍ୟରୁ ୧୧ଜଣ ବିଶିଷ୍ଟ ବ୍ୟକ୍ତିଙ୍କୁ ଉତ୍ସବରେ ସମ୍ବର୍ଦ୍ଧିତ କରାଯାଇଥିଲା ।

ସେମାନେ ହେଲେ ପ୍ରଫେସର ମନୋଜରଞ୍ଜନ ନାୟକ, ପ୍ରଫେସର ପ୍ରଭାସ ରଞ୍ଜନ ମହାପାତ୍ର, ପ୍ରଫେସର ସିଆର ଦାସ, ପ୍ରଫେସର ବିକେ ମିଶ୍ର, ପ୍ରଫେସର ସରିତ କୁମାର ଦାସ, ଇଂ. ଏସପି ରାଓ, ଇଂ. ଅରୁଣ କୁମାର ରଥ, ପ୍ରଫେସର ସୁକାନ୍ତ କେ. ମହାପାତ୍ର, ଦେବ ଭଟ୍ଟାଚାର୍ଯ୍ୟ, ଲଲାଟେନ୍ଦୁ ରଥ ଏବଂ ଇଂ. ଦୀପ୍ତିରଞ୍ଜନ ପଟ୍ଟନାୟକ ।

ଶିକ୍ଷାନୁଷ୍ଠାନର ଏନସିସି ଗ୍ରାଉଣ୍ଡରେ ଆୟୋଜିତ ସମାବର୍ତ୍ତନ ଉତ୍ସବରେ ମୁଖ୍ୟ ଅତିଥି ଭାବେ ନାକ୍ ର କାର୍ଯ୍ୟକାରୀ ଅଧ୍ୟକ୍ଷ ପଦଶ୍ରୀ ଡ. ବିରେନ୍ଦ୍ର ସିଂହ ଯୋଗ ଦେଇ ଦୀକ୍ଷାନ୍ତ ଭାଷଣରେ କହିଥିଲେ, ଶିକ୍ଷାର ସ୍ୱରୂପ, ରାଷ୍ଟ୍ରଗଠନରେ ବିଦ୍ୟାର୍ଥୀମାନଙ୍କ ଗୁରୁ ଦାୟିତ୍ୱ ।

ଉତ୍ତମ ଶିକ୍ଷା ଓ ସଫଳତାର ସୂତ୍ର ସମ୍ପର୍କରେ ସ୍ୱାମୀ ବିବେକାନନ୍ଦ ଦେଇଥିବା ବାଣୀକୁ ସମସ୍ତେ ଗ୍ରହଣ କରିବା ଉଚିତ ବୋଲି କହିଥିଲେ ।

ଏନଆଇଟି ପରିଚାଳନା ସମିତିର ଅଧ୍ୟକ୍ଷ ଡ. ସନ୍ତୃପ୍ତ ବି. ମିଶ୍ର ଉଦବୋଧନ ଦେଇ ବର୍ତ୍ତମାନର ଶିକ୍ଷା ବ୍ୟବସ୍ଥା ଏବଂ ଏନଆଇଟି ରାଉରକେଲାର ଶିକ୍ଷା ବ୍ୟବସ୍ଥା ସମ୍ପର୍କରେ ଆଲୋଚନା କରିଥିଲେ ।

ଉତ୍ସବରେ ମୋଟ ୧୭୧୮ ସ୍ନାତକ, ୬୦୬ ସ୍ନାତକୋତ୍ତର ଓ ୧୪୧ ଜଣ ପିଏଚଡି ଡିଗ୍ରୀଧାରୀଙ୍କୁ ଡିଗ୍ରୀ ପ୍ରଦାନ କରାଯାଇଛି ବୋଲି ସେ ତାଙ୍କ ବିରଣୀରେ ସୂଚନା ପ୍ରଦାନ କରିଥିଲେ ।

କୁଳ ସଚିବ ପ୍ରଫେସର ପ୍ରଦୀପ୍ତ କୁମାର ଦାସଙ୍କ ସମେତ ଡିନ୍ ଏକାଡେମିକ ପ୍ରଫେସର ସରୋଜ କୁମାର ପଟେଲ ଉପସ୍ଥିତ ଥିଲେ ।

୧୩ଜଣଙ୍କୁ ସ୍ୱର୍ଣ୍ଣ ପଦକ ସହିତ ସର୍ବଶ୍ରେଷ୍ଠ କୃତୀ ଛାତ୍ରୀ ଭାବେ ଶ୍ରୀୟା ସାଇନାଥଙ୍କୁ ଏନଆଇଟି ସ୍ୱର୍ଣ୍ଣପଦକ ସହ ପ୍ରଫେସର ବି.ବେହେରା ମେମୋରିଆଲ ସ୍ୱର୍ଣ୍ଣ ପଦକ ମଧ୍ୟ ପ୍ରଦାନ କରାଯାଇଛି ।

ଲୋକାଲ ୱାୟାର