ଏପ୍ରିଲ ୨୯ରେ ପୃଥିବୀର ନିକଟତର ହେବ ଗ୍ରହାଣୁ, ବିପଦ ନାହିଁ

ଭୁବନେଶ୍ୱର,ଏପ୍ରିଲ ୨୪(ଲୋକାଲ ୱାୟାର): ଗ୍ରହାଣୁ ଧକ୍କାରେ ପୃଥିବୀ ନଷ୍ଟ ହୋଇଯିବ ।

ଏଭଳି ଏକ ଖବର ସାମାଜିକ ଗଣମାଧ୍ୟମରେ ଏ ସମ୍ପର୍କିତ ପ୍ରକାଶିତ ଖବର ଏବେ ଲୋକଙ୍କ ନିଦ ହଜାଇ ଦେଇଛି ।

କିନ୍ତୁ ଏହାଦ୍ୱାରା ଯେ ପୃଥିବୀ ପ୍ରତି ବିପଦ ରହିଛି ଏଭଳି ପ୍ରଚାରକୁ ଖଣ୍ଡନ କରିଛନ୍ତି ଭୁବନେଶ୍ୱରର ପଠାଣି ସାମନ୍ତ ପ୍ଲାନେଟାରିୟମ୍ ଉପନିଦେ୍ର୍ଦଶକ ଡ ଶୁଭେନ୍ଦୁ ପଟ୍ଟନାୟକ ସେ କହିଛନ୍ତି, ଏକ ବଡ଼ ଗ୍ରହାଣୁ ଏପ୍ରିଲ ମାସ ଶେଷରେ ପୃଥିବୀର ନିକଟତର ହେବ ।

ଏହି ଗ୍ରହାଣୁକୁ ୧୯୯୮ ମସିହାରେ ଆବିଷ୍କାର କରାଯାଇଥିଲା । ଏପ୍ରିଲ ୨୯ ଭାରତୀୟ ସମୟ ସକାଳ ୪ଟା ୨୮ରେ ଏହା ପୃଥିବୀର ସବୁଠାରୁ ନିକଟତର ହେବ ।

ସେତେବେଳେ ଏହାର ଦୂରତା ପ୍ରାୟ ୬ ନିୟୁତ କିଲୋମିଟର ଅର୍ଥାତ ପୃଥିବୀ-ଚନ୍ଦ୍ର ଦୂରତାର ୧୬ଗୁଣ ରହିବ । ଏହା ଚଳିତ ବର୍ଷ ପୃଥିବୀର ନିକଟତମ ହେଉଥିବା ସବୁଠାରୁ ବଡ଼ ଗ୍ରହାଣୁ ଅଟେ ।

ବୈଜ୍ଞାନିକ ଓ ଜ୍ୟୋତିର୍ବିଜ୍ଞାନୀମାନେ ଏହି ଗ୍ରହାଣୁ ଓ ପୃଥିବୀ ମଧ୍ୟରେ କୌଣସି ଧକ୍କା ହେବ ନାହିଁ ବୋଲି ସ୍ପଷ୍ଟ କରିଛନ୍ତି ।

ଯଦିଓ ଏହାକୁ ସମ୍ଭାବ୍ୟ ବିପଜ୍ଜନକ ଗ୍ରହାଣୁର ଶ୍ରେଣୀଭୁକ୍ତ କରାଯାଇଛି । ତଥାପି ଏହା କିପରି ପୃଥିବୀକୁ କୌଣସି କ୍ଷତି ପହଞ୍ଚାଇବ ନହିଁ ସେ ଦିଗରେ ବୈଜ୍ଞାନିକମାନେ ତୀକ୍ଷଣ ଦୃଷ୍ଟି ରଖିଛନ୍ତି ।

୧୯୪ଟି ଦେଶର ଜ୍ୟୋତିର୍ବିଜ୍ଞାନୀ ଓ ବୈଜ୍ଞାନିକମାନେ ଏନେଇ ଅବିରତ କାମ କରୁଛନ୍ତି ।

ଆସନ୍ତା କିଛି ବର୍ଷ ଯାଏଁ ଏପରି କୌଣସି ପିଣ୍ଡ ଦ୍ୱାରା ପୃଥିବୀ ପ୍ରତି କିଛି ବିପତ୍ତି ନାହିଁ ବୋଲି ବୈଜ୍ଞାନିକମାନେ ଦାବି କରିଛନ୍ତି ।

ଶ୍ରୀ ପଟ୍ଟନାୟକ କହିଛନ୍ତି, ୨୦୨୦ ମସିହା ମାର୍ଚ୍ଚ ୫ ତାରିଖ ସୁଦ୍ଧା ଜ୍ୟୋତିର୍ବିଜ୍ଞାନୀ ଓ ବୈଜ୍ଞାନିକମାନଙ୍କ ଦ୍ୱାରା ପୃଥିବୀ ନିକଟରେ ଥିବା ୨୦ କୋଟିରୁ ଅଧିକ ଏପରି ପିଣ୍ଡମାନ ଠାବ କରାଯାଇ ସେମାନଙ୍କ ଆକାର ଗଠନ ତଥା କକ୍ଷପଥ ଗଣନା କରାଯାଉଛି ।

ପୃଥିବୀ ସହିତ ଧକ୍କା ହେବାର ସମ୍ଭାବନାକୁ ଆକଳନ କରାଯାଇ ସେମାନଙ୍କ ତାଲିକା ପ୍ରସ୍ତୁତ କରାଯାଉଛି ।

ବର୍ତ୍ତମାନ ସୁଦ୍ଧା ପ୍ରାୟ ୨ ହଜାର ଏପରି ପିଣ୍ଡ ଠାବ କରାଯାଇଛି ଯାହାକି ଭବିଷ୍ୟତରେ ପୃଥିବୀ ସହ ଧକ୍କା ହେବାର ସମ୍ଭାବନା ସୃଷ୍ଟି କରୁଛି । ସେସବୁ ଗ୍ରହାଣୁମାନଙ୍କର ଗତିବିଧି ଉପରେ ନଜର ରଖାଯାଉଛି ।

ସୂଚନା ଯୋଗ୍ୟ, ଆଜିକୁ ୧୧୨ ବର୍ଷ ତଳେ ୧୯୦୮ ମସିହା ଜୁନ୍ ୩୦ରେ ରୁଷୀୟ ଦେଶର ସାଇବେରିଆରେ ଏଭଳି ଏକ ଗ୍ରହାଣୁ ଖସିଥିବାର ନଜିର ରହିଛି ।

ତୁଙ୍ଗାସ୍କା ଅଞ୍ଚଳରେ ଖସିଥିବା ଏହି ଗ୍ରହାଣୁ ଯୋଗୁଁ ସେଠାରେ ପ୍ରାୟ ୨ ହଜାର ବର୍ଗ କିଲୋମିଟର ଜଙ୍ଗଲ ନଷ୍ଟ ହୋଇଯିବା ସହ ୮ କୋଟିରୁ ବେଶୀ ଗଛ ଓ ସେଠାରେ ଥିବା ଜୀବଜଗତ ନଷ୍ଟ ହୋଇଯାଇଥିଲେ ।

ଏହି ଗ୍ରହାଣୁ ପାଖାପାଖି ୨୦୦ରୁ ୪୦୦ ଫୁଟ୍ ଲମ୍ବା ହୋଇଥିବା ବେଳେ ଏହାର ସଂଘାତରୁ ଉତ୍ପନ୍ନ ହୋଇଥିବା ଶକ୍ତି ହିରୋସୀମାରେ ପଡ଼ିଥିବା ବୋମାର ଶକ୍ତିଠାରୁ ପ୍ରାୟ ହଜାରେ ଗୁଣ ଅଧିକ ବୋଲି ଆକଳନ କରାଯାଉଛି ।

ଅନେକ ଗୁଡ଼ିଏ ଗ୍ରହାଣୁ, ମଙ୍ଗଳ ଓ ବୃହସ୍ପତି ଗ୍ରହର କକ୍ଷ ମଧ୍ୟରେ ସୂର୍ଯ୍ୟକୁ ପରିକ୍ରମା କରୁଛନ୍ତି ।

ଏମାନଙ୍କ ସଂଖ୍ୟା ଲକ୍ଷ ଲକ୍ଷ ଓ ଆକାର ଏକ ମିଟରରୁ କେତେ ଶହ କିଲୋମିଟର ପର୍ଯ୍ୟନ୍ତ ପରିବ୍ୟାପ୍ତ ।

ଲକ୍ଷ ଲକ୍ଷ ସଂଖ୍ୟାରେ ରହିଥିବା ଏହି ଗ୍ରହାଣୁ ଗୁଡ଼ିକ ବେଳେ ବେଳେ ପୃଥିବୀର ମାଧ୍ୟାକର୍ଷଣ ଶକ୍ତି ଦ୍ୱାରା ପୃଥିବୀ ଆଡ଼କୁ ଆକର୍ଷିତ ହୋଇଥାନ୍ତି ।

ସେଗୁଡିକ ମଧ୍ୟରୁ ୯୯ ପ୍ରତିଶତ ପୃଥିବୀ ପୃଷ୍ଠରେ ପଡ଼ିବା ପୂର୍ବରୁ ବାୟୂମଣ୍ଡଳରେ ପୋଡ଼ି ପାଉଁଶ ହୋଇଯାଇଥାଏ ବୋଲି ସେ କହିଛନ୍ତି ।

ଲୋକାଲ ୱାୟାର