ଏମଡିଏଚ-କିସ ଏମଓୟୁ ସ୍ୱାକ୍ଷର, କନ୍ଧମାଳରେ ଖୋଲିବ କିସ୍ ର ଶାଖା

ଭୁବନେଶ୍ୱର, ଡିସେମ୍ବର ୧୨(ଲୋକାଲ ୱାୟାର): କଳିଙ୍ଗ ଇନଷ୍ଟିଚ୍ୟୁଟ ଅଫ ସୋସିଆଲ ସାଇନ୍ସ (କିସ) ଏମଡିଏଚ ସହ ମିଶି କନ୍ଧମାଳରେ ଏକ ଶାଖା ଖୋଲିବ । ଏ ସଂକ୍ରାନ୍ତରେ ନୂଆଦିଲ୍ଲୀରେ ଉଭୟ ପକ୍ଷ ମଧ୍ୟରେ ବୁଝାମଣା ପତ୍ର ବା ଏମଓୟୁ ସ୍ୱାକ୍ଷର ହୋଇଛି ।

କିଟ୍ ଓ କିସ୍ ପ୍ରତିଷ୍ଠାତା ଡଃ ଅଚ୍ୟୁତ ସାମନ୍ତ କିସ୍ ତରଫରୁ ଏମଓୟୁରେ ହସ୍ତାକ୍ଷର କରିଥିବା ବେଳେ ଏମଡିଏଚ ପକ୍ଷରୁ ଏହାର ଅଧ୍ୟକ୍ଷ ପଦ୍ମ ଭୂଷଣ ଧରମପାଲ ଗୁଲାଟି ହସ୍ତାକ୍ଷର କରିଥିଲେ ।

କିସ୍ -କନ୍ଧମାଳ ପାଇଁ ଏମଡିଏଚ ସମସ୍ତ ଆର୍ଥିକ ସହାୟତା ଦେବ ।

କନ୍ଧମାଳ ଜିଲ୍ଲାର ୪ ହଜାର ଗରିବ ଆଦିବାସୀ ପିଲା କିସ୍ -କନ୍ଧମାଳରେ ରହିପାରିବେ ।

କିସ୍- କନ୍ଧମାଳ ନିର୍ମାଣ ବର୍ଷକ ଭିତରେ ସରିବ ବୋଲି ଡଃ ସାମନ୍ତ କହିଛନ୍ତି ।

ଫୁଲବାଣୀ ସହରରେ ଏକ ଶହ ଶଯ୍ୟା ବିଶିଷ୍ଟ ହସ୍ପିଟାଲ ସ୍ଥାପନ କରିବାକୁ ଏମଡିଏଚର ପ୍ରସ୍ତାବ ରହିଛି ।

କନ୍ଧମାଳର ବିଭିନ୍ନ ସ୍ଥାନରେ ତିନିଟି ମସଲା ଉତ୍ପାଦନ ୟୁନିଟ, ସ୍କୁଲ ଓ ହସ୍ପିଟାଲ ସ୍ଥାପନ ପାଇଁ ଗୁଲାଟି ସମ୍ମତ ହୋଇଛନ୍ତି ।

ଏହାବ୍ୟତୀତ କନ୍ଧମାଳର ଦାରିଙ୍ଗବାଡ଼ିରେ ୧୦୦ କୋଠରୀ ବିଶିଷ୍ଟ ହୋଟେଲ ତଥା ରିସର୍ଟ ସ୍ଥାପନ ପାଇଁ ଏମଡିଏଚ ନିଷ୍ପତ୍ତି ନେଇଛି । ଏହାଦ୍ୱାରା କନ୍ଧମାଳ ପର୍ଯ୍ୟଟନର ବିକାଶ ହେବ ବୋଲି ଡଃ ସାମନ୍ତ କହିଛନ୍ତି ।

ଭାରତର ବିଭିନ୍ନ ସ୍ଥାନ ବିଶେଷତଃ ଆଦିବାସୀ ଅଧ୍ୟୁଷିତ ଅଞ୍ଚଳରେ ଲୋକେ ଆଗେଇ ଆସି ଶିକ୍ଷା କ୍ଷେତ୍ରରେ ସହଯୋଗ କରିବାକୁ ଗୁଲାଟି କହିଛନ୍ତି ।

ଲୋକାଲ ୱାୟାର