ଐତିହାସିକ ବାଲିଯାତ୍ରା ଉଦଘାଟିତ : ଏଥର ୮ ଦିନ ପରିବର୍ତ୍ତେ ୧୦ ଦିନ

କଟକ,ନଭେମ୍ବର ୧୨ (ଲୋକାଲ ୱାୟାର): ମଙ୍ଗଳବାର ସନ୍ଧ୍ୟାରେ ଐତିହାସିକ କଟକ ବାଲିଯାତ୍ରାକୁ ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ଉଦଘାଟନ କରି ଏଥର ୮ ଦିନ ପରିବର୍ତ୍ତେ ୧୦ ଦିନ ପାଇଁ ଏହି ଯାତ୍ରା ଅନୁଷ୍ଠିତ ହେବ ବୋଲି ଘୋଷଣା କରିଛନ୍ତି ।

ରାଜ୍ୟ ସରକାର ଏହାକୁ ରାଜ୍ୟ ସ୍ତରୀୟ ମେଳାର ମାନ୍ୟତା ଦେଇଥିବା ବେଳେ ଏହାକୁ ଜାତୀୟ ବାଣିଜ୍ୟ ମେଳା ଭାବେ ଘୋଷଣା କରାଯିବା ଉଚିତ ବୋଲି ସେ କହିଥିଲେ ।

ଜିଲ୍ଲା ସଂସ୍କୃତି ବିଭାଗ ଅଧ୍ୟକ୍ଷ ତଥା ଜିଲ୍ଲାପାଳ ଭବାନୀ ଶଙ୍କର ଚୟନୀଙ୍କ ସଭାପତିତ୍ୱରେ ଅନୁଷ୍ଠିତ ଏହି ସଭାରେ ବିଶିଷ୍ଟ ନିମନ୍ତ୍ରିତ ଅତିଥି ଭାବେ ଇଣ୍ଡୋନେସିଆ ରାଷ୍ଟ୍ରଦୂତ ସିର୍ଦ୍ଧାର୍ଥୋ ରେଜା ସୂର୍ଯ୍ୟାଦିପୁର, ଇଣ୍ଡୋନେସିଆର ସଂସ୍କୃତି ବିଭାଗ ମୁଖ୍ୟ ମୁଦନା, ସମ୍ମାନୀତ ଅତିଥି ଭାବେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ, ପଞ୍ଚାୟତି ରାଜ ଓ ପାନୀୟ ଜଳ, ଆଇନ, ଗୃହ ଓ ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା, ପର୍ଯ୍ୟଟନ, ଜିଲ୍ଲା ଯୋଜନା କମିଟି ଅଧ୍ୟକ୍ଷ ତଥା ନିଆଳି ବିଧାୟକ ପ୍ରଫେସର ଡ. ପ୍ରମୋଦ କୁମାର ମଲ୍ଲିକ, କଟକ ଲୋକସଭା ସଦସ୍ୟ ଭର୍ତ୍ତୃହରି ମହାତାବ, ଜଗତସିଂହପୁର ଲୋକସଭା ସଦସ୍ୟ ଡା. ରଜଶ୍ରୀ ମଲ୍ଲିକ, ଜିଲ୍ଲା ପରିଷଦ ସଭାପତି ଜ୍ୟୋତିରେଖା ନାୟକ, ବାରବାଟୀ-କଟକ ବିଧାୟକ ମହମ୍ମଦ ମୋକିମ, କଟକ ସଦର ବିଧାୟକ ଚନ୍ଦ୍ର ସାରଥୀ ବେହେରା, ସାଲେପୁର ବିଧାୟକ ପ୍ରଶାନ୍ତ ବେହେରା, ବାଙ୍କୀ ବିଧାୟକ ଦେବୀରଞ୍ଜନ ତ୍ରିପାଠୀ, ଚୌଦ୍ୱାର-କଟକ ବିଧାୟକ ସୌଭିକ ବିଶ୍ୱାଳ, କେନ୍ଦ୍ରାଞ୍ଚଳ ରାଜସ୍ୱ ଆୟୁକ୍ତ ଅନିଲ କୁମାର ସାମଲ ପ୍ରମୁଖ ନିଜ ନିଜର ବକ୍ତବ୍ୟ ରଖିଥିଲେ ।

ଏହି ଅବସରରେ କଟକ ବାଲିଯାତ୍ରା ସ୍ମରଣିକା-୨୦୧୯ ଓ ‘ଆମ ବାଲିଯାତ୍ରା’ ଆପ ଉନ୍ମୋଚିତ ହୋଇଥିଲା । ଶେଷରେ ଅତିରିକ୍ତ ଜିଲ୍ଲାପାଳ ବିଜୟ କୁମାର ଖଣ୍ଡାୟତ ରାୟ ଧନ୍ୟବାଦ ଅର୍ପଣ କରିଥିଲେ । ମଞ୍ଚ ପରିଚଳାନା କରିଥିଲେ ଡ. ମୃତ୍ୟୁଞ୍ଜୟ ରଥ ।

ଲୋକାଲ ୱାୟାର