କରୋନା କବଜାରେ ଏସସିବି; ଶତାଧିକ ଡାକ୍ତର ନର୍ସ ସଂକ୍ରମିତ

କଟକ, ଅଗଷ୍ଟ ୨୨(ଲୋକାଲ ୱାୟାର): ରାଜ୍ୟବ୍ୟାପୀ କରୋନା ସଂକ୍ରମଣ ବଢ଼ି ଚାଲିଥିବା ବେଳେ କଟକର ଶ୍ରୀରାମଚନ୍ଦ୍ରଭଞ୍ଜ ମେଡିକାଲ କଲେଜ ଆାଣ୍ଡ ହସପିଟାଲ (ଏସସିବି) ମଧ୍ୟ ଏଥିରୁ ବାଦ୍ ପଡ଼ିନାହିଁ ।
ମେଡିକାଲର ଗୋଟିଏ କି ଦୁଇଟି ବିଭାଗ ନୁହେଁ ଅନେକ ବିଭାଗରେ ଡାକ୍ତର ଓ ନର୍ସ ଜଣେ ପରେ ଜଣେ ଆତଙ୍କିତ ହେବାରେ ଲାଗିଛନ୍ତି ।

ଏସସିବିର ପ୍ରଫେସର, ସହକାରୀ ପ୍ରଫେସର, ପିଜି ଡାକ୍ତର, ଏସଆର୍, ହାଉସସର୍ଜନ ଓ ଡାକ୍ତରୀ ଛାତ୍ରଛାତ୍ରୀଙ୍କୁ ମିଶାଇ ୪୦ଜଣ କରୋନାରେ ଆକ୍ରାନ୍ତ ହୋଇସାରିଲେଣି ।

ନର୍ସ, ଆଟେଣ୍ଡାଣ୍ଟ ଏବଂ ଅନ୍ୟ କର୍ମଚାରୀଙ୍କ ମିଶାଇ ପ୍ରାୟ ୮୦ ପଜିଟିଭ୍ ହୋଇସାରିଲେଣି ।

ମେଡିକାଲ୍ କଲେଜ୍ ଅଧ୍ୟକ୍ଷ ଓ ଅଧୀକ୍ଷକଙ୍କ କାର୍ଯ୍ୟାଳୟରେ ୨୦ଜଣ ପାଖାପାଖି କର୍ମଚାରୀ କରୋନାରେ ଆକ୍ରାନ୍ତ ହେବା ପରେ ରୋଗୀ ଓ ଆଟେଣ୍ଡାଣ୍ଟମାନେ ଆତଙ୍କିତ ହୋଇପଡ଼ିଛନ୍ତି ।

ନେଫ୍ରୋଲୋଜି ବିଭାଗ ପ୍ରଫେସର, ମାଇକ୍ରୋବାୟୋଲୋଜି ବିଭାଗର ସହକାରୀ ପ୍ରଫେସର, ପଲୁ୍ୟମନାରୀ ବିଭାଗର ଡାକ୍ତରଙ୍କ ସମେତ ସର୍ଜରୀ, ମେଡିସିନ୍, କାର୍ଡିଓଲୋଜି, ନୁ୍ୟରୋସର୍ଜରୀ ଓ ଦନ୍ତରୋଗ ବିଭାଗର ଡାକ୍ତରମାନେ କରୋନାରେ ଆକ୍ରାନ୍ତ ହୋଇଛନ୍ତି ।

ଏସସିବିରେ ଅଦ୍ୟାବଧି ୨୦ଜଣ କରୋନା ପଜିଟିଭ ରୋଗୀଙ୍କ ମୃତ୍ୟୁ ଘଟିଥିବା ସରକାରୀଭାବେ କୁହାଯାଇଛି ।

ଉଲ୍ଲେଖଯୋଗ୍ୟ, ଏସସିବିରେ କରୋନା ମୁକାବିଲା ପାଇର୍ ୩୫୨ ବେଡ୍ ବିଶିଷ୍ଟ ଆଇସୋଲେସନ ୱାର୍ଡ, ୬୦୦ ବେଡ୍ ବିଶିଷ୍ଟ ସଙ୍ଗରୋଧ ୱାର୍ଡ ଓ ୧୨ ଟି ଆଇସିୟୁ ବେଡ୍ ରହିଛି ।

ଡାକ୍ତର, ସ୍ୱାସ୍ଥ୍ୟକର୍ମୀ, କର୍ମଚାରୀଙ୍କ ପାଇଁ ୭୮୦୫ ପିପିଇ କିଟ୍, ୫୩୩୬ ଏନ-୯୫ ମାସ୍କ, ୩ଲକ୍ଷ ୬୧ହଜାର ୩୫୦ ୩-ଲେୟାର ମାସ୍କ ଓ ୭୪୭୮ ହାଣ୍ଡ ସାନିଟାଇଜର ମହଜୁଦ୍ ଥିବା ମେଡିକାଲ ପକ୍ଷରୁ କୁହାଯାଇଛି ।

ଏସସିବିରେ ଏବେ ୬୦ ଆଇସିୟୁ ଓ ୨୦୦ ସାଧାରଣ ବେଡ୍ ବିଶିଷ୍ଟ ଏକ କରୋନା ୱାର୍ଡ ଖୋଲାଯିବାକୁ ବ୍ୟବସ୍ଥା ହେଉଥିବା କହିଛନ୍ତି ଡିଏମଇଟି ପ୍ରଫେସର ଡାକ୍ତର ସିବିକେ ମହାନ୍ତି ।

ଅପରପକ୍ଷରେ ଏସସିବିର କରୋନା ନୋଡାଲ ଅଫିସର ପ୍ରଫେସର ଡାକ୍ତର ମନୋରଞ୍ଜନ ପଟ୍ଟନାୟକ କହିଛନ୍ତି ଏସସିବି ଉପରେ ଏବେ ରୋଗୀଙ୍କ ଭାର ବଢ଼ି ଚାଲିଥିବାରୁ ଏପରି ସ୍ଥିତି ହୋଇଛି । ତେବେ ପରିସ୍ଥିତି ନିୟନ୍ତ୍ରଣରେ ଅଛି, କେହି ଆତଙ୍କିତ ହେବାର କାରଣ ନାହିଁ ।

ଲୋକାଲ ୱାୟାର