କରୋନା: ଦୁଗ୍ଧଜାତ ଦ୍ରବ୍ୟ ବ୍ୟବସାୟୀଙ୍କ ବହୁ କ୍ଷତି

ଭୁବନେଶ୍ୱର, ଏପ୍ରିଲ ୨୦(ଲୋକାଲ ୱାୟାର): ମହାମାରୀ କରୋନା ମାଡ଼ରେ ଦୁଗ୍ଧଜାତ ଦ୍ରବ୍ୟ ବ୍ୟବସାୟୀ ଧରାଶାୟୀ । ସମସ୍ତଙ୍କ ଆର୍ଥିକ ମେରୁଦଣ୍ଡ ବଙ୍କା କରି ଦେଇଛି କରୋନା ।

ମାସେରୁ ଅଧିକ ସମୟ କାରବାର ବନ୍ଦ ରହିବା ପରେ ଏହି ବ୍ୟବସାୟ କରି ଘର ଚଳାଉଥିବା ଚାଷୀ ଓ ବ୍ୟବସାୟୀଙ୍କ ଅବସ୍ଥା ଭାରି ଖରାପ ।

ବିଶେଷ କରି ଭୁବନେଶ୍ୱର ସହରକୁ ଦୈନିକ କ୍ଷୀର, ଦହି, ଛେନା, ରାବିଡ଼ି, ଛେନା ପୋଡ଼ ଯୋଗାଉଥିବା ଏହି ବ୍ୟବସାୟୀମାନେ ବେପାର ବନ୍ଦ ଯୋଗୁ ଅକଳରେ ପଡ଼ିଛନ୍ତି ।

ଘର ଚଳାଇବା ସେମାନଙ୍କ ପକ୍ଷରେ କଷ୍ଟକର ହୋଇପଡ଼ିଛି । ସେଥିପାଇଁ ସେମାନେ ସରକାରୀ ସହାୟତା ପ୍ରଦାନ କରିବାକୁ ସରକାରଙ୍କୁ ନିବେଦନ କରିଛନ୍ତି ।

ଏ ସମ୍ପର୍କରେ ଖୋର୍ଦ୍ଧା ଜିଲ୍ଲା ଦୁଗ୍ଧଚାଷୀ ବ୍ୟବସାୟୀ ସଂଘ ସଭାପତି ଦିଲ୍ଲୀପ ହାଲି କହିଛନ୍ତି, ରାଜ୍ୟରେ ହଜାର ହଜାର ଚାଷୀ ଓ ବ୍ୟବସାୟୀ କ୍ଷତିଗ୍ରସ୍ତ ।

ସରକାର ଅନ୍ୟମାନଙ୍କ ପରି ଏହିମାନଙ୍କୁ ମଧ୍ୟ କିଛି ସହାୟତା ଯୋଗାଇ ଦିଅନ୍ତୁ । ବିଶେଷକରି ଖୋର୍ଦ୍ଧା ଜିଲ୍ଲା ସଂଘରେ ୨୫୦ରୁ ୨୭୦ ଚାଷୀ, ବ୍ୟବସାୟୀ ପଞ୍ଜିକୃତ ।

ଯେଉଁମାନେ ଦୈନିକ ଦୁଗ୍ଧଜାତ ଦ୍ରବ୍ୟ ଗ୍ରାହକମାନଙ୍କୁ ଯୋଗାଇଥାନ୍ତି । ଅନେକ ଘର ଘର କ୍ଷୀର ଦେଇଥାନ୍ତି ।

କିଛି ରାଜଧାନୀ ଭୁବନେଶ୍ୱର ଓ ଏହାର ଆଖପାଖ ଅଞ୍ଚଳର ବିଭିନ୍ନ ଜନଗହଳିପୂର୍ଣ୍ଣ ସ୍ଥାନରେ ସନ୍ଧ୍ୟାରେ ଛେନା, ରାବିଡ଼ି ଓ ଛେନାପୋଡ଼ ବିକ୍ରି କରିଥାନ୍ତି ।

ଅନେକ ସହରର ବଡ଼ ହୋଟେଲରୁ ଛୋଟ ମିଠା ଦୋକାନ ପର୍ଯ୍ୟନ୍ତ ସମସ୍ତଙ୍କୁ କୁଇଣ୍ଟାଲ୍ କୁଇଣ୍ଟାଲ୍ ଛେନା ଯୋଗାଇଥାନ୍ତି । ଯାହା କଟକଣା ଯୋଗୁ ଲକ୍ ଡାଉନ୍ ପ୍ରଭାବରେ ସବୁ ବନ୍ଦ ହୋଇଯାଇଛି ।

ଅତି କମ୍ ଛୋଟ ବ୍ୟବସାୟୀଟିଏ ଏହି ଦୁଗ୍ଧଜାତ ଦବ୍ର୍ୟ ବିକ୍ରି କରି ୩ହଜାରୁ ୪ହଜାର ଟଙ୍କା ଦୈନକ ରୋଜଗାର କରିଥାଏ । ବର୍ତ୍ତମାନ ତା’ର ସେତକ ବନ୍ଦ । ଅର୍ଥ ଅଭାବରୁ ଘରେ ଖାଇବାକୁ ନାହିଁ ।

ଏଣେ ନିଜେ ଖାଇପାରୁନି କି ଯେଉଁ ଗାଈଗୋରୁଙ୍କୁ ରଖିଛି ସେମାନଙ୍କୁ ବି ଆହାର ଗଣ୍ଡେ ଦେଇ ପାରୁନି । ତେଣୁ ସରକାର ତୁରନ୍ତ ଏ ଦିଗରେ ବିଚାର କରନ୍ତୁ ଏବଂ ପଦକ୍ଷେପ ଗ୍ରହଣ କରନ୍ତୁ ।

ଶ୍ରୀ ହାଲି ଏହା ବି କହିଛନ୍ତି କି, ସଂଘ ପକ୍ଷରୁ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ୨୧ହଜାର ଟଙ୍କା ପ୍ରଦାନ କରାଯାଇଛି ।

ଏହି ଅବସରରେ ସହରକୁ ଛେନା, କ୍ଷୀର ଆଦି ଯୋଗାଇବାକୁ ପ୍ରାଥମିକ ପର୍ଯ୍ୟାୟରେ ୬୦ଜଣ ବ୍ୟବସାୟୀଙ୍କୁ ବିକ୍ରିବଟା ପାସ୍ ପ୍ରଦାନ କରିବାକୁ ନିବେଦନ କରାଯାଇଛି ।

ସରକାର ଏ ସମ୍ପର୍କରେ ବିଚାର କରି ପାସ୍ ପ୍ରଦାନ କଲା ପରେ ପୁଣିଥରେ ଦିନେ ଦୁଇଦନ ଭିତରେ ବ୍ୟବସାୟ ପୂର୍ବପରି ଆରମ୍ଭ ହେବ ।

ଏହାଦ୍ୱାରା ବ୍ୟବସାୟୀ, ଚାଷୀ ଆଶ୍ୱସ୍ତ ହେବା ସହ ଲୋକମାନେ ବି ସହଜରେ ଦୁଗ୍ଧଜାତ ଦବ୍ର୍ୟ ପାଇପାରିବେ ।

ଲୋକାଲ ୱାୟାର