କାଳିଆ ଟଙ୍କା ଫେରାଇବାକୁ ବିଜ୍ଞପ୍ତି ଯୋଗୁଁ ଚିନ୍ତାରେ ଚାଷୀ

ଜଗତସିଂହପୁର, ଅଗଷ୍ଟ ୬(ଲୋକାଲ ୱାୟାର); କାଳିଆ ସହାୟତା ରାଶି ଫେରାଇବାକୁ ସରକାରୀ ବିଜ୍ଞପ୍ତି ଜାରି ହେବା ପରେ ଚାଷୀମାନେ ବିବ୍ରତ ହୋଇ ପଡିଛନ୍ତି ।

କରୋନା ମହାମାରୀ ଯୋଗୁଁ ଚାଷୀମାନଙ୍କ ସ୍ଥିତି ବିପନ୍ନ ହୋଇ ପଡ଼ିଥିବା ବେଳେ ଖରିଫ ଫସଲ ପାଇଁ ଋଣଭାରରେ ବୁଡି ରହିଛନ୍ତି ।

ଏପରି ସ୍ଥିତିରେ କାଳିଆ ଟଙ୍କା ଫେରାଇବାକୁ ସରକାରୀ ବିଜ୍ଞପ୍ତି ସେମାନଙ୍କ ପାଇଁ ବୋଝ ଉପରେ ନଳିତା ବିଡା ସଦୃଶ ହୋଇଛି ।

ମୁଁ ଜଣେ ଗରିବ ଚାଷୀ । କରୋନା ଯୋଗୁଁ ରୋଜଗାର ନଥିବାରୁ ବଞ୍ଚିବା କଷ୍ଟକର ହୋଇପଡିଛି ।

ମହାଜନ ଠାରୁ ହାତଉଧାରି ନେଇ ଧାନ ଚାଷ କରିଛି । କାଳିଆ ଯୋଜନାରେ ସହାୟତା ପାଇଁ ଆବେଦନ କରିନଥିଲେ ବି ଗତବର୍ଷ କାଳିଆ ଯୋଜନାରେ ୫ ହଜାର ଟଙ୍କା ମିଳିଥିଲା ।

ଚାଷକାମରେ ସେହି ଟଙ୍କା ଖର୍ଚ୍ଚ କରି ଦେଇଛି । ଏବେ ଟଙ୍କା ଫେରାଇବାକୁ ବିଜ୍ଞପ୍ତି ଜାରି ହୋଇଛି ।

ଗତ ବିଧାନସଭା ନିର୍ବାଚନ ବେଳେ ଚାଷୀଙ୍କୁ ଆକର୍ଷିତ କରିବାକୁ କାଳିଆ ସହାୟତା ଦିଆଯାଇଥିବା କହିଛନ୍ତି ଜଗତସିଂହପୁର ବ୍ଲକ ମଣ୍ଡାସାହି ଗାଁର ୭୦ ବର୍ଷୀୟ ଗୋପୀନାଥ ମହାରଣା ।

ସେହିପରି ସିଦ୍ଧଳ ଗାଁର ପ୍ରଦୀପ୍ତ କୁମାର ସେନାପତି କହିଛନ୍ତି ୨୦-୨୫ ଡେସିମିଲ ଜମିରେ ଭାଗ ଚାଷ କରିଛି ।

ରାସନ କାର୍ଡ ଥିବାରୁ କାଳିଆ ଯୋଜନାରେ ସହାୟତା ପାଇବାକୁ ମୁଁ ଯୋଗ୍ୟ । ଗତବର୍ଷ ମିଳିଥିବା କାଳିଆ ଟଙ୍କା ଚାଷବାସରେ ଖର୍ଚ୍ଚ କରିଥିଲି । ହେଲେ ଏବେ କାଳିଆ ଟଙ୍କା ଫେରାଇବାକୁ ବିଜ୍ଞପ୍ତି ମୋ ପ୍ରତି ଅନ୍ୟାୟ ।

ସରକାରୀ କର୍ମଚାରୀ ହୋଇଥିବାରୁ କାଳିଆ ଯୋଜନାରେ ଆବେଦନ କରିନଥିଲି ।

କୌଣସି ସହାୟତା ମିଳି ନଥିବା ବେଳେ ଫେରାଇବାକୁ ବିଜ୍ଞପ୍ତି ମୋତେ ଆଶ୍ଚର୍ଯ୍ୟ କରିଛି ବୋଲି ଚାନ୍ଦପୁର ଗାଁର ସରକାରୀ କର୍ମଚାରୀ ଦୈତାରୀ ରଥ କହିଛନ୍ତି ।

କାଳିଆ ଯୋଜନାରେ ସହାୟତା ପାଇବାକୁ ଯୋଗ୍ୟ ପ୍ରାୟ ୨୦ ଗରିବ ଚାଷୀଙ୍କୁ ଅଯୋଗ୍ୟ ଘୋଷଣା କରା ଯାଇଥିଲା ।

ହେଲେ ଏବେ ଟଙ୍କା ଫେରାଇବାକୁ ସେମାନଙ୍କୁ ନୋଟିସ ଜାରି ହେବା ଦୁର୍ଭାଗ୍ୟଜନକ । ଯୋଗ୍ୟ, ଅଯୋଗ୍ୟ ଚୟନ କରିଥିବା ଅଧିକାରୀଙ୍କ ଠାରୁ ଅର୍ଥ ଆଦାୟ ହେବା ଉଚିତ ବୋଲି ବିରିଡ଼ି ବ୍ଲକ ଉତରଶାସନ ପଞ୍ଚାୟତର ସରପଞ୍ଚ ଶିଳ୍ପା ସାହୁ କହିଛନ୍ତି ।

କରୋନା ମହାମାରୀ ବେଳେ ମାସକ ମଧ୍ୟରେ କାଳିଆ ଟଙ୍କା ଫେରାଇବା ନୋଟିସ ଜାରି ହେବାରୁ ଚାଷୀମାନେ ଆତଙ୍କିତ ହୋଇ ପଡିଛନ୍ତି । ତେଣୁ ତୁରନ୍ତ ବିଜ୍ଞପ୍ତି ପ୍ରତ୍ୟାହାର କରିବାକୁ ଦାବି ହୋଇଛି ।

ସରକାରୀ ଚାକିରି, ଆୟକର ଦାତା, ୫ ଏକରରୁ ଅଧିକ ଜମି, ରାସନ କାର୍ଡ ନଥିବା ଭଳି ମାନଦଣ୍ଡକୁ ବିଚାର କରି ୩୨୪୦ ଅଯୋଗ୍ୟ ଚାଷୀଙ୍କୁ ବିଭାଗ ନୋଟିସ ଜାରି କରିଛି ।

ଏଥିରୁ ଜଗତସିଂହପୁର ବ୍ଲକରେ ୩୭୫, ନାଉଗାଁ ବ୍ଲକରେ ୨୦୩, ବାଲିକୁଦା ବ୍ଲକ ୫୨୯, ବିରିଡି ବ୍ଲକ ୨୮୨, ରଘୁନାଥପୁର ବ୍ଲକ ୩୧୩, ତିର୍ତ୍ତୋଲ ବ୍ଲକ ୪୬୮, କୁଜଙ୍ଗ ବ୍ଲକ ୬୮୪ ଓ ଏରସମା ବ୍ଲକରେ ୩୮୧ ଚାଷୀ ଅଛନ୍ତି ।

ଗତବର୍ଷ ପ୍ରଥମ ଓ ଦ୍ୱିତୀୟ ପର୍ଯ୍ୟାୟରେ ୧.୧୯ ଲକ୍ଷ ଚାଷୀଙ୍କୁ କାଳିଆ ଯୋଜନାରେ ଆର୍ଥିକ ସହାୟତା ପ୍ରଦାନ କରା ଯାଇଥିଲା ।

ରାସନ କାର୍ଡ ଓ ଅନ୍ୟ ଯୋଗ୍ୟତାକୁ ବିଚାରକୁ ନେଇ ବିଭାଗ ୩୨୪୦ ଅଯୋଗ୍ୟ ଚାଷୀଙ୍କୁ ନୋଟିସ ଜାରି କରିଛି । ଟଙ୍କା ଫେରାଇବାକୁ ଆମେ ଚାଷୀଙ୍କୁ ବୁଝାଉଛୁ ବୋଲି ଜିଲ୍ଲା କୃଷି ଅଧିକାରୀ ରବି ନାରାୟଣ ମହାପାତ୍ର କହିଛନ୍ତି ।

ଲୋକାଲ ୱାୟାର