କେନ୍ଦ୍ରାପଡ଼ା ଜିଲ୍ଲାରେ କମୁଛି ଝୋଟ ଚାଷ

କେନ୍ଦ୍ରାପଡ଼ା, ଜୁଲାଇ ୬ (ଲୋକାଲ ୱାୟାର): ଅଧିକାରୀମାନଙ୍କ ଖାମଖିଆଲି ମନୋଭାବ ଯୋଗୁଁ କେନ୍ଦ୍ରାପଡ଼ା ଜିଲ୍ଲାରେ ଝୋଟ ଚାଷ ହ୍ରାସ ପାଇବାରେ ଲାଗିଛି ।

ଦୁଇ ଦଶନ୍ଧି ପୂର୍ବେ ପ୍ରମୁଖ ଅର୍ଥକରୀ ଫସଲ ଭାବେ ଜିଲ୍ଲାରେ ଝୋଟ ଚାଷକୁ ପ୍ରାଧାନ୍ୟ ଦିଆ ଯାଉଥିଲା ।

ସରକାର ଝୋଟ ମଞ୍ଜି ନଯୋଗାଇବା, ଶ୍ରମିକ ସଙ୍କଟ, ଜଳସେଚନ ବ୍ୟବସ୍ଥାର ଅଭାବ ତଥା ବଜାର ସୁବିଧା ନଥିବାରୁ ଜିଲ୍ଲାରେ ଝୋଟ ଚାଷ କମୁଛି ।

ଦିନ ଥିଲା ଆମେ ବଜାରର ଝୋଟ ବିକି ବେଶ ଦିପଇସା ରୋଜଗାର କରୁଥିଲୁ ।

ଝୋଟ ବ୍ୟବସାୟୀମାନେ ଜିଲ୍ଲାର ବିଭିନ୍ନ ସ୍ଥାନରେ ଗୋଦାମ ଖୋଲି ଅମଳ ବେଳେ ଝୋଟ ସଂଗ୍ରହ କରନ୍ତି । ପ୍ରତିବର୍ଷ ଝୋଟ ଚାଷ କମିଚାଲିଛି ।

ଏପରି ସ୍ଥିତି ଜାରି ରହିଲେ ଆଗାମୀ ୧୦ ବର୍ଷ ମଧ୍ୟରେ ଜିଲ୍ଲାର କୃଷି ମାନଚିତ୍ରରୁ ଝୋଟ ଚାଷ ଲୋପ ପାଇଯିବ ।

ବହୁ ଝୋଟ ଚାଷୀ ଅନ୍ୟ ଚାଷ କଲେଣି ବୋଲି କହିଛନ୍ତି ଗରଦପୁରର ଝୋଟ ଚାଷୀ ରବୀନ୍ଦ୍ର ସାମଲ ।

କେନ୍ଦ୍ରାପଡ଼ା ଜିଲ୍ଲାର ଗରଦପୁର, ମାର୍ଶାଘାଇ, ଡେରାବିଶ, ପଟ୍ଟାମୁଣ୍ଡାଇ ଓ ମହାକାଳପଡ଼ା ବ୍ଲକରେ ଝୋଟ ଚାଷ ହୁଏ ।

ଏକ ଦଶନ୍ଧି ପୂର୍ବେ ୧୦ ହଜାର ହେକ୍ଟର ଜମିରେ ଝୋଟ ଚାଷ ହେଉଥିବା ବେଳେ ଚଳିତ ବର୍ଷ ମାତ୍ର ୨ ହଜାର ହେକ୍ଟର ଜମିରେ ଝୋଟ ଚାଷ ହୋଇଛି ।

୨୦୦୭ରେ ପଡ଼ୋଶୀ ଯାଜପୁର ଜିଲ୍ଲାର ଧାନମଣ୍ଡଳରେ ଥିବା ଏକମାତ୍ର ଝୋଟ କଳ ବନ୍ଦ ହୋଇଯିବା ପରେ କେନ୍ଦ୍ରାପଡ଼ା ଜିଲ୍ଲାରେ ଝୋଟ ଚାଷ କମି ଯାଇଥିଲା ।

ଯାଜପୁର, କେନ୍ଦ୍ରାପଡ଼ା ଓ ଜଗତସିଂହପୁର ଜିଲ୍ଲାର ଝୋଟ ଚାଷୀଙ୍କୁ ସହାୟତା କରିବା ପାଇଁ ୧୯୭୪ରେ ରାଜ୍ୟ ସରକାର ଧାନମଣ୍ଡଳରେ ୮୪ ଏକର ଜମିରେ ଝୋଟ କଳ ପ୍ରତିଷ୍ଠା କରିଥିଲେ ।

ତେବେ ପରିଚାଳନାଗତ ଅନିୟମିତତା ଓ ବ୍ୟାପକ ଦୁର୍ନୀତି ଯୋଗୁଁ ୨୦୦୭ରେ କର୍ତ୍ତୃପକ୍ଷ ଝୋଟ କଳ ବନ୍ଦ ହୋଇ ଯାଇଥିଲା ।

ଝୋଟ କଳ ବନ୍ଦ ହୋଇଯିବାରୁ ଚାଷୀମାନେ ବେଶ ପ୍ରଭାବିତ ହୋଇଥିଲେ ।

ସେହିପରି ପଲିଥିନ ଓ ପ୍ଲାଷ୍ଟିକ ଉଦ୍ୟୋଗର ବିକାଶ ଝୋଟ ଉତ୍ପାଦନ ହ୍ରାସ ପାଇବାର କାରଣ ପାଲଟିଛି ।

ବହୁ ଉଦ୍ୟୋଗ ଓ ଶିଳ୍ପ ସଂସ୍ଥା ଏବେ ବ୍ୟାଗ ତିଆରି ପାଇଁ ପଲିଥିନ, ପ୍ଲାଷ୍ଟିକ ଓ ସିନ୍ଥେଟିକ ଫାଇବର ବ୍ୟବହାର କରୁଥିବାରୁ ରାଜ୍ୟରେ ଝୋଟର ଚାହିଦା କମିଛି ।

ସରକାର ପ୍ଲାଷ୍ଟିକ ଓ ପଲିଥିନ ବ୍ୟବହାର ନିଷିଦ୍ଧ କରିଥିଲେ ମଧ୍ୟ ଅଧିକାରୀମାନେ ଏପର୍ଯ୍ୟନ୍ତ ଇକୋ- ଫ୍ରେଣ୍ଡଲି ଝୋଟ ଉତ୍ପାଦ ପାଇଁ ଝୋଟ ଚାଷକୁ ପ୍ରୋତ୍ସାହନ ଦେବା ପାଇଁ ବିସ୍ତୃତ ଯୋଜନା ପ୍ରସ୍ତୁତ କରି ପାରିନାହାନ୍ତି ବୋଲି କୃଷକ ନେତା ତଥା କୃଷକ ସଭାର ଜିଲ୍ଲା ଶାଖା ସଭାପତି ଉମେଶ ଚନ୍ଦ୍ର ସିଂହ କହିଛନ୍ତି ।

ଏ ସମ୍ପର୍କରେ ଜିଲ୍ଲା କୃଷି ଅଧିକାରୀ ସାରଦା ପ୍ରସନ୍ନ ମିଶ୍ର କହିଛନ୍ତି, ଭାରତ ସରକାର କପା, ଝୋଟ ଓ ଆଖୁ ଉତ୍ପାଦନ ତଥା ଉତ୍ପାଦକତା ବୃଦ୍ଧି ପାଇଁ ଜାତୀୟ ଖାଦ୍ୟ ସୁରକ୍ଷା ମିଶନ- ଅର୍ଥକରୀ ଫସଲ (ଏନଏଫଏସଏମ-ସିସି) ଯୋଜନାରେ ଝୋଟ ଚାଷୀଙ୍କୁ ସହାୟତା କରୁଛନ୍ତି ।

ଏହି ଯୋଜନାରେ ଝୋଟ ଚାଷୀଙ୍କୁ ବୈଷୟିକ ଜ୍ଞାନକୌଶଳ ବ୍ୟବହାର କରି ଉନ୍ନତ ଚାଷ ପ୍ରଣାଳୀ ଓ ତାଲିମ ପ୍ରଦାନ କରାଯାଉଛି ।

ଝୋଟ ଚାଷ କମି ଚାଲିଥିବାରୁ ଏନଏଫଏସଏମ-ସିସି କାର୍ଯ୍ୟକ୍ରମରେ ଚାଷୀଙ୍କୁ ମଞ୍ଜି, ଜୈବିକ ସାର ଓ ମାଇକ୍ରୋ ନୁ୍ୟଟ୍ରିଏଣ୍ଟ ପ୍ରଦାନ କରି ଜିଲ୍ଲାରେ ଝୋଟ ଚାଷର ପୁନରୁଦ୍ଧାର ପାଇଁ ଉଦ୍ୟମ ହେଉଛି ।

ଲୋକାଲ ୱାୟାର