କେନ୍ଦ୍ରୀୟ କମିଟିକୁ ରାଜ୍ୟ ଦେଲା ୧୧ଶହ କୋଟିର ବନ୍ୟା କ୍ଷୟକ୍ଷତି ରିପୋର୍ଟ

ଭୁବନେଶ୍ୱର, ସେପ୍ଟେମ୍ବର ୧୭(ଲୋକାଲ ୱାୟାର): ବନ୍ୟା କ୍ଷୟକ୍ଷତି ଅନୁଧ୍ୟାନ ପାଇଁ ଓଡ଼ିଶା ଗସ୍ତରେ ଆସିଥିବା ୫ ଜଣିଆ କେନ୍ଦ୍ରୀୟ କମିଟିକୁ ଗୁରୁବାର ରାଜ୍ୟ ସରକାର ୧୧ଶହ କୋଟି ଟଙ୍କାର ବନ୍ୟା କ୍ଷୟକ୍ଷତି ରିପୋର୍ଟ ଦେଇଥିବା ଜଣେ ବରିଷ୍ଠ ଅଧିକାରୀ କହିଛନ୍ତି ।

ବନ୍ୟାଞ୍ଚଳରେ ଏବେ ଥଇଥାନ କାର୍ଯ୍ୟ ସହ କ୍ଷୟକ୍ଷତିର ଅନୁଧ୍ୟାନ ବି ଚାଲିଛି । ଶୀଘ୍ର ଚୂଡ଼ାନ୍ତ ରିପୋର୍ଟ ପ୍ରଦାନ କରାଯିବ ବୋଲି କେନ୍ଦ୍ରୀୟ କମିଟିକୁ ରାଜ୍ୟ ସରକାର କହିଛନ୍ତି ।

ସ୍ୱରାଷ୍ଟ୍ର ବିଭାଗ ଯୁଗ୍ମ ସଚିବ ପ୍ରବୀଶ ବଶିଷ୍ଠଙ୍କ ନେତୃତ୍ୱରେ ଆସିଥିବା ଏହି ଟିମ୍ ଦୁୁଇ ଦିନ ଧରି ୪ଟି ବନ୍ୟା ପ୍ରଭାବିତ ଜିଲ୍ଲା ବୁଲିବା ପରେ ଗୁରୁବାର ସନ୍ଧ୍ୟାରେ ଲୋକସେବା ଭବନରେ ମୁଖ୍ୟ ଶାସନ ସଚିବ ଅସିତ କୁମାର ତ୍ରିପାଠୀ ଓ ଅନ୍ୟାନ୍ୟ ବରିଷ୍ଠ ଅଧିକାରୀମାନଙ୍କ ସହ ଆଲୋଚନା କରିଥିଲେ ।

କେନ୍ଦ୍ରୀୟ କମିଟିକୁ ମୁଖ୍ୟ ସଚିବ ଶ୍ରୀ ତ୍ରିପାଠୀ କହିଥିଲେ, ବନ୍ୟାରେ ୨.୨୫ ଲକ୍ଷ ହେକ୍ଟର ଚାଷ ଜମିରେ ଶସ୍ୟ ୩୩%ରୁ ଅଧିକ କ୍ଷତି ହୋଇଛି ।

୧,୨୦,୦୦୦ ଘର ଊଣାଅଧିକେ କ୍ଷତିଗ୍ରସ୍ତ ହୋଇଛି । ନଦୀବନ୍ଧ, ରାସ୍ତା ଏବଂ ଅନ୍ୟାନ୍ୟ ମୌଳିକ ଭିତ୍ତିଭୂମି ମଧ୍ୟ କ୍ଷତିଗ୍ରସ୍ତ ହୋଇଛି ।

ବନ୍ୟାଞ୍ଚଳରେ ରାଜ୍ୟ ସରକାର କରିଥିବା ଉଦ୍ଧାର ଓ ଥଇଥାନ ଏବଂ ପରବର୍ତ୍ତୀ ଭିତ୍ତିଭୂମି ସଜଡ଼ା କାର୍ଯ୍ୟ ତଥା ବିପର୍ଯ୍ୟୟ ପରିଚାଳନାକୁ କେନ୍ଦ୍ରୀୟ କମିଟି ପ୍ରଶଂସା କରିଥିଲେ ।

ଏସଡିଆରଏଫ ଫଣ୍ଡ ବାଦ ରାଜ୍ୟ ପାଇଁ ଅଧିକ ସହାୟତାର ଆବଶ୍ୟକ ଥିବା କମିଟି କହିଥିଲେ ।

ଲୋକାଲ ୱାୟାର