କୋଭିଡ-୧୯ ରୋଗୀଙ୍କ ତଥ୍ୟ ସଂଗ୍ରହ କରିବାରୁ ଆଶା କର୍ମୀଙ୍କୁ ଆକ୍ରମଣ

ଭୁବନେଶ୍ୱର, ଏପ୍ରିଲ ୨୫ (ଲୋକାଲ ୱାୟାର): ଆଶା କର୍ମୀ ଓ ତାଙ୍କ ପରିବାର ସଦସ୍ୟଙ୍କୁ ଆକ୍ରମଣ କରିଥିବା ଅଭିଯୋଗରେ ବାଲେଶ୍ୱର ସହରର ଜଣେ ବ୍ୟକ୍ତିଙ୍କୁ ଗିରଫ କରାଯାଇଛି ।

କରୋନା ବିରୋଧୀ ଲଢ଼େଇର ସମ୍ମୁଖ ଭାଗରେ କାମ କରୁଥିବା ସ୍ୱାସ୍ଥ୍ୟ କର୍ମୀଙ୍କ ଉପରେ ହେଉଥିବା ଆକ୍ରମଣରୁ ସୁରକ୍ଷା ଦେବା ପାଇଁ କେନ୍ଦ୍ର ସରକାର ଅଧ୍ୟାଦେଶ ଜାରି କରିବାର କିଛି ଦିନ ମଧ୍ୟରେ ଏହି ଆକ୍ରମଣ ହୋଇଛି । ଗିରଫ ବ୍ୟକ୍ତି ହେଲେ ନିଲିଆବାଗ ଅଞ୍ଚଳର ରମେଶ ମହାଳିକ ।

ଉଲ୍ଲେଖଯୋଗ୍ୟ ଯେ, ନିଳିଆବାଗରେ ଗତ ସପ୍ତାହକ ମଧ୍ୟରେ ୫ କରୋନା ପଜିଟିଭ ରୋଗୀ ଚିହ୍ନଟ ହେଲେଣି ।

ଆଶା କର୍ମୀ ସୁଭଦ୍ରାଙ୍କୁ ତାଙ୍କ ଘରେ ଆକ୍ରମଣ ହୋଇଥିଲା । ନିଳିଆବାଗ କଣ୍ଟେନମେଣ୍ଟ ଜୋନରୁ କୋଭିଡ-୧୯ ଲକ୍ଷଣ ଥିବା ଲୋକଙ୍କ ଠାରୁ ତଥ୍ୟ ସଂଗ୍ରହ କରୁଥିବା ବେଳେ ରମେଶ ଆଶା କର୍ମୀଙ୍କୁ ଆପତ୍ତିଜନକ କଥା କହିଥିଲା ।

ଆଶା କର୍ମୀ ଘରକୁ ଫେରିବା ପରେ, ଅଭିଯୁକ୍ତ ନିଜ ପରିବାର ସଦସ୍ୟଙ୍କ ସହ ତାଙ୍କ ଘରେ ଜୋର ଜବରଦସ୍ତ ପଶି ତାଙ୍କୁ ଓ ତାଙ୍କ ପରିବାରକୁ ଆକ୍ରମଣ କରିଥିଲେ ।

ଆଶାକର୍ମୀଙ୍କ ଝିଅ ଓ ଶାଶୂ ମଧ୍ୟ ଆକ୍ରମଣରୁ ବାଦ ପଡ଼ିନଥିଲେ ବୋଲି ବାଲେଶ୍ୱର ଏସପି ବି ଯୁଗଳ କିଶୋର କହିଛନ୍ତି ।

ପଡ଼ୋଶୀମାନେ ଆଶା କର୍ମୀ ଓ ତାଙ୍କ ପରିବାର ସଦସ୍ୟଙ୍କୁ ଉଦ୍ଧାର କରିଥିଲେ ।

ବୁଧବାର ଯାଜପୁର ଜିଲ୍ଲାର ଏକ କରୋନା ହଟସ୍ପଟ ଜୋନରେ କିଛି ପଶ୍ଚିମବଙ୍ଗ ଫେରନ୍ତାଙ୍କୁ କ୍ୱାରେଣ୍ଟାଇନରେ ରହିବାକୁ ପରାମର୍ଶ ଦେବାରୁ ସେମାନେ ଆଶା, ଅଙ୍ଗନବାଡ଼ି କର୍ମୀ ଓ ସ୍ଥାନୀୟ ସରପଞ୍ଚଙ୍କୁ ଆକ୍ରମଣ କରିଥିଲେ ।

ଆଶା କର୍ମୀ ରମା ପରମାଣିକ, ଅଙ୍ଗନବାଡ଼ି କର୍ମୀ ରମା ସୁନ୍ଦରୀ ପଣ୍ଡା, ରାହାସୋଳ ଗ୍ରାମ ପଞ୍ଚାୟତର ସରପଞ୍ଚ ମାଧବ ମଲ୍ଲିକ ପାଞ୍ଚ ଜଣ ବ୍ୟକ୍ତିଙ୍କୁ କ୍ୱାରେଣ୍ଟାଇନରେ ରହିବାକୁ ପରାମର୍ଶ ଦେଉଥିବା ବେଳେ ସେମାନେ ଆକ୍ରମଣ କରିଥିଲେ ।

ଏହି ପାଞ୍ଚ ଜଣ ନିକଟରେ କୋଲକାତାରୁ ଫେରିଛନ୍ତି । ହେଲେ କୌଣସି ଲକ୍ଷଣ ନଥିବାରୁ କ୍ୱାରେଣ୍ଟାଇନରେ ରହିବାକୁ ମନା କରୁଥିଲେ ।
ସୋମବାର ସକାଳେ ନୟାଗଡ଼ ଜିଲ୍ଲାର ଆଶା କର୍ମୀ ମାଧୁରୀ ନାୟକ କରୋନା ଭୂତାଣୁ ସମ୍ପର୍କରେ ସଚେତନତା ସୃଷ୍ଟି ପାଇଁ ନୂଆଗାଁ ଯାଉଥିବା ବେଳେ ପଡ଼ୋଶୀ ତାଙ୍କ ମୁହଁ ଉପରେ ଗରମ ପେଜ ଢାଳି ଦେଇଥିଲେ ।

ଚିକିତ୍ସା ପାଇଁ ନାୟକଙ୍କୁ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତି କରାଯାଇଛି । ପୁଲିସ ଅଭିଯୁକ୍ତ ମନୁଆକୁ ଗିରଫ କରିଛି ।

ଓଡ଼ିଶାରେ କରୋନା ପଜିଟିଭଙ୍କ ସଂଖ୍ୟା ୯୪ରେ ପହଞ୍ଚିଲାଣି । ସଦ୍ୟତମ ପଜିଟିଭ ନମୁନାଗୁଡିକର ପଶ୍ଚିମବଙ୍ଗ ଭ୍ରମଣ ଇତିହାସ ରହିଛି ।
୯୪ କରୋନା ରୋଗୀଙ୍କ ମଧ୍ୟରୁ ୩୮ ଜଣଙ୍କ ପଶ୍ଚିମବଙ୍ଗ ଭ୍ରମଣ ଇତିହାସ ଥିବାରୁ ରାଜ୍ୟ ସରକାର ଓଡ଼ିଶାକୁ ପଶ୍ଚିମବଙ୍ଗ ସହ ସଂଯୋଗ କରୁଥିବା ୫୭ଟି ରାସ୍ତାକୁ ସିଲ୍ କରିଛି । ଏପରିକି ଆମ୍ବୁଲାନ୍ସକୁ ମଧ୍ୟ ଅଟକା ଯାଉଛି ।

ଡାକ୍ତର, ନର୍ସ, ପାରାମେଡିକ ଓ ଅନ୍ୟ ସ୍ୱାସ୍ଥ୍ୟ ସେବା କର୍ମଚାରୀଙ୍କ ବିରୋଧରେ ହିଂସା ତଥା ଅସଦାଚରଣ ପ୍ରଦର୍ଶନକାରୀଙ୍କ ପ୍ରତି ଜିରୋ ଟଲେରାନ୍ସ ଆଭିମୁଖ୍ୟ ପ୍ରଦର୍ଶନ କରିବାକୁ କେନ୍ଦ୍ର ସରକାର ନିଦେ୍ର୍ଦଶ ଦେଇଛନ୍ତି ।

ଲୋକାଲ ୱାୟାର