କ୍ୱାକ ଚିକିତ୍ସାରେ ମୃତ କରୋନା ଲକ୍ଷଣ ଥିବା କୋଲକାତା ଫେରନ୍ତା

କେନ୍ଦ୍ରାପଡ଼ା, ଏପ୍ରିଲ ୨୩ (ଲୋକାଲ ୱାୟାର): କେନ୍ଦ୍ରାପଡ଼ା ଜିଲ୍ଲା ରାଜନଗର ଥାନା ଅଧୀ୍ଥ ଭିତରକନିକା ଜାତୀୟ ଉଦ୍ୟାନରେ ଥିବା ରାଜେନ୍ଦ୍ରନାରାୟଣପୁର ଗାଁର ଜଣେ କୋଲକାତା ଫେରନ୍ତା ତଥା କରୋନା ସଂକ୍ରମଣ ଲକ୍ଷଣ ଥିବା ୬୫ ବର୍ଷୀୟା ମହିଳାଙ୍କ ଏପ୍ରିଲ ୧୮ରେ ମୃତୁ୍ୟ ହୋଇଛି । ସେ ଗାଁ କ୍ୱାକ ପାଖରେ ଚିକିତ୍ସିତ ହେଉଥିଲେ ।

ମୃତକଙ୍କ ସ୍ୱାମୀ ପରେଶ ଚନ୍ଦ୍ର ପାତ୍ର ଓ ଅନ୍ୟ ସମ୍ପର୍କୀୟମାନେ କର୍ତ୍ତୃପକ୍ଷଙ୍କୁ ନଜଣାଇ ଗୋପନ ଭାବେ ଦାହ ସଂସ୍କାର କରି ଦେଇଥିଲେ ।

କୋଲକାତା ଫେରନ୍ତାଙ୍କ ମୃତ୍ୟୁ ସମ୍ପର୍କରେ ସ୍ଥାନୀୟ ଲୋକେ କର୍ତ୍ତୃପକ୍ଷଙ୍କୁ ଅଭିଯୋଗ କରିବା ପରେ ବୁଧବାର ଏହି ଘଟଣା ଲୋକଲୋଚନକୁ ଆସିଥିଲା ।

କୋଲକାତା ଫେରନ୍ତାଙ୍କ ମୃତ୍ୟୁ ଖବର ପାଇ ଏକ ଡାକ୍ତରୀ ଦଳ ଗାଁକୁ ଯାଇ ମୃତ ମହିଳାଙ୍କ ସ୍ୱାମୀଙ୍କ ସ୍ୱାବ ନମୁନା ସଂଗ୍ରହ କରି ପରୀକ୍ଷଣ ପାଇଁ ଏସସିବି ମେଡିକାଲ କଲେଜ ଓ ହସ୍ପିଟାଲ, କଟକକୁ ପଠାଇଛି ।

ଜ୍ୱର, ନିଶ୍ୱାସପ୍ରଶ୍ୱାସ ନେବାରେ ଅସୁବିଧା ଯୋଗୁଁ ଏପ୍ରିଲ ୧୩ରୁ ମୃତକ ଗାଁ କ୍ୱାକ ମନୁ ମାଇତି ନିକଟରେ ଚିକିତ୍ସିତ ହେଉଥିଲେ ।

କ୍ୱାକ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ । ମୃତ ମହିଳା ଶ୍ୱାସ ରୋଗରେ ପୀଡିତ ଥିଲେ ବୋଲି ଡାଙ୍ଗମାଳ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରର ଚିକିତ୍ସା ଅଧିକାରୀ ଡା ଆଦିତ୍ୟ ପ୍ରଧାନ କହିଛନ୍ତି ।

ମୃତକ ଓ ତାଙ୍କ ସ୍ୱାମୀ ମାର୍ଚ୍ଚ ୧୩ରେ କୋଲକାତାରୁ ଆମ୍ବୁଲାନ୍ସ ଯୋଗେ ଫେରି ଘରେ କ୍ୱାରେଣ୍ଟାଇନରେ ରହିଥିଲେ ବୋଲି ଡାକ୍ତର ପ୍ରଧାନ କହିଛନ୍ତି ।

ପଶ୍ଚିମବଙ୍ଗ ଫେରନ୍ତା ଓଡ଼ିଶା ସରକାରଙ୍କ ପାଇଁ ଚିନ୍ତାର କାରଣ ପାଲଟିଛନ୍ତି । ରାଜ୍ୟର କୋଭିଡ-୧୯ ରୋଗୀଙ୍କ ମଧ୍ୟରୁ ଅନେକ ପଶ୍ଚିମବଙ୍ଗ ଫେରନ୍ତା, ସେମାନଙ୍କ କୋଲକାତା ଭ୍ରମଣ ଇତିହାସ ରହିଛି କିମ୍ବା ପଶ୍ଚିମବଙ୍ଗରୁ ଫେରିଥିବା ବ୍ୟକ୍ତିଙ୍କ ସଂସ୍ପର୍ଶରେ ଆସିଛନ୍ତି ।

ତେଣୁ କୋଲକାତା ଫେରନ୍ତାଙ୍କ ମୃତୁ୍ୟ ପରେ ଗାଁ ଓ ଆଖପାଖ ଅଞ୍ଚଳରେ ଭୟର ବାତାବରଣ ଖେଳି ଯାଇଛି ।

ଉପକୂଳବର୍ତୀ କେନ୍ଦ୍ରାପଡ଼ା ଜିଲ୍ଲାର ନୀରିହ ଗ୍ରାମବାସୀଙ୍କୁ ଡାକ୍ତରୀ ସୁବିଧା ଯୋଗାଇ ଦେବା ଆଳରେ କ୍ୱାକ ଓ ନକଲି ଔଷଧ ଦୋକାନ ମାଲିକମାନେ ବେଶ ରୋଜଗାର କରୁଛନ୍ତି ।

କର୍ତ୍ତୃପକ୍ଷଙ୍କ ବେପରୱା ମନୋଭାବ ଯୋଗୁଁ ଜିଲ୍ଲାରେ ଛତୁ ଫୁଟିବା ଭଳି ଲାଇସେନ୍ସ ବିହୀନ ଔଷଧ ଦୋକାନ ଓ କ୍ଲିନିକ ଖୋଲୁଛି ।

ଦୁଇ ବର୍ଷ ତଳେ ଗୋଟିଏ ୧୩ ବର୍ଷର ବାଳକର ଚିକିତ୍ସାଧୀନ ଅବସ୍ଥାରେ ମୃତୁ୍ୟ ହେବା ପରେ ବାଲିକଣା ଗାଁର ଜଣେ କ୍ୱାକ୍ ଗିରଫ ହୋଇଥିଲା ବୋଲି କେନ୍ଦ୍ରାପଡ଼ା ନାଗରିକ ଫୋରମ ସଭାପତି ବିଶ୍ୱନାଥ ବେହେରା କହିଛନ୍ତି ।

ଡାକ୍ତରୀ କର୍ମଚାରୀଙ୍କ ଅଭାବ, ଦୁର୍ବଳ ପରିବହନ ବ୍ୟବସ୍ଥା ଓ ଭିତିଭୂମି ଅଭାବରୁ ଦୂରବର୍ତୀ ଉପକୂଳ ଅଂଚଳରେ ସ୍ୱାସ୍ଥ୍ୟସେବା ଭୁଷୁଡି ପଡିଛି ।

ଫଳରେ ବହୁ ଲୋକ ତତ୍କ୍ଷଣାତ ଡାକ୍ତରୀ ସୁବିଧା ପାଇଁ କ୍ୱାକମାନଙ୍କ ଉପରେ ନିର୍ଭର କରି ବିପଦରେ ପଡୁଛନ୍ତି ।

ଆଭ୍ୟନ୍ତରୀଣ ଗାଁରୁ ଦୂର ତଥା ପରିବହନ ବ୍ୟବସ୍ଥା ନଥିବାରୁ ଗର୍ଭବତୀ ମହିଳାମାନେ ସ୍ୱାସ୍ଥ୍ୟ କେନ୍ଦ୍ରରେ ପହଞ୍ଚି ପାରୁନାହାନ୍ତି । ବିଶେଷ କରି ପ୍ରସୂତିକାଳୀନ ଯନ୍ତ୍ରଣା ବେଳେ ଗର୍ଭବତୀମାନେ ସ୍ୱାସ୍ଥ୍ୟ କେନ୍ଦ୍ରରେ ପହଞ୍ଚି ପାରୁନାହାନ୍ତି ବୋଲି ରାଜନଗର ବ୍ଲକର ପୂର୍ବତନ ଅଧ୍ୟକ୍ଷ ଜଗବନ୍ଧୁ ନାୟକ କହିଛନ୍ତି ।

କେନ୍ଦ୍ରାପଡା ଜିଲ୍ଲା ଓ ଆଖପାଖ ଅଞ୍ଚଳରେ ପଶ୍ଚିମବଙ୍ଗ, କେରଳ, ପଞ୍ଜାବ, ଦିଲ୍ଲୀ, ଗୁଜରାଟ, ମହାରାଷ୍ଟ୍ର ଓ ଅନ୍ୟ ରାଜ୍ୟ ତଥା ବିଦେଶରୁ ବହୁ ସଂଖ୍ୟାରେ ପ୍ରବାସୀ ଶ୍ରମିକ ପହଁଚିଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ କରୋନା ସଂକ୍ରମଣ ଭୟ ବୃଦ୍ଧି ପାଇଛି ।

ଶହ ଶହ ପ୍ରବାସୀ ଶ୍ରମିକ ସେମାନଙ୍କ କର୍ମସ୍ଥଳୀରୁ ମାସ୍କ ନପିନ୍ଧି ଆସିଛନ୍ତି । ଅନେକ ପ୍ରବାସୀ ଶ୍ରମିକ ସ୍ୱାସ୍ଥ୍ୟ ପରୀକ୍ଷଣ ନକରି ନିଜ ଗାଁକୁ ଚାଲି ଯାଇଛନ୍ତି । ଫଳରେ ସ୍ଥାନୀୟ ଲୋକେ ଚିନ୍ତିତ ଅଛନ୍ତି ।

କୋଭିଡ-୧୯ ସଂକ୍ରମଣ ରୋକିବା ପାଇଁ ଅଧିକାରୀମାନେ ଗାଁରେ ପହଁଚୁଥିବା ସମସ୍ତ ପ୍ରବାସୀ ଶ୍ରମିକଙ୍କ ସ୍ୱାସ୍ଥ୍ୟ ପରୀକ୍ଷା କରିବା ଦରକାର ।

ସେମାନେ କର୍ମସ୍ଥଳୀରେ ଛୋଟ ଛୋଟ ଘରେ ରହନ୍ତି । ପରିଚ୍ଛନ୍ନତା ଅବଲମ୍ବନ କରାଯାଏ ନାହିଁ, ସ୍ୱଚ୍ଛ ପାନୀୟ ଜଳ ମିଳେ ନାହିଁ ଓ ସ୍ୱାସ୍ଥ୍ୟ ସେବା ହାତପାଆନ୍ତାରେ ନଥାଏ ।

ଯଦି କରୋନା ସଂକ୍ରମଣ ହୁଏ ତେବେ ଏହା ସେମାନଙ୍କ ପାଇଁ ଖୁବ ବିପଜ୍ଜନକ ହେବ ବୋଲି ଶ୍ରମିକ ନେତା ଜଗଜ୍ଜୀବନ ଦାସ କହିଛନ୍ତି ।

ଲୋକାଲ ୱାୟାର

—