ବିଶେଷ : ଖାଆନ୍ତୁ କୋରାଖଇ, ଜାଣନ୍ତୁ ଏହାର ମିଠା କାହାଣୀ

ଭୁବନେଶ୍ବର, ଜାନୁଆରୀ ୧୯ (ଲୋକାଲ ୱାୟାର): ବହୁ ଧାରାର ସଂସ୍କୃତି, ଲୋକକଥା ଆଉ ଇତିହାସକୁ ନେଇ ମନ୍ଦିରମାଳିନୀ ସହର ଭୁବନେଶ୍ବର ଯେତେ ପ୍ରସିଦ୍ଧ, ସେତିକି ପ୍ରସିଦ୍ଧ ଏଠାକାର ସ୍ବତନ୍ତ୍ର ଖାଦ୍ୟ ସଂସ୍କୃତି ପାଇଁ।

ରାଜଧାନୀ ଭୁବନେଶ୍ବରର କଳେବର ବଢ଼ିବା ସାଙ୍ଗକୁ ଏହା ଏବେ ସ୍ମାର୍ଟ ସିଟିରେ ପରିଣତ ହୋଇଛି ଆଉ ସାମ୍ନାକୁ ଏକ ଆକର୍ଷଣୀୟ ଚେହେରା ଆସିବା ସହ ଅନ୍ତର୍ଜାତୀୟ ମାନର ଖାଦ୍ୟ ବି ଏଠାରେ ମିଳୁଛି।

ହେଲେ ଏଭଳି କିଛି ସ୍ବତନ୍ତ୍ର ଖାଦ୍ୟ ଭୁବନେଶ୍ବରକୁ ସ୍ବତନ୍ତ୍ର କରିରଖିଛି ଆଉ ସେଥିରୁ ଗୋଟିଏ ହେଲା ସୁସ୍ବାଦୁ କୋରାଖଇ।

ପୁରୀରେ ଯେମିତି ନୀଳାଦ୍ରିବିଜେ ଅବସରରେ ମହାଲକ୍ଷ୍ମୀଙ୍କ ମାନଭଂଜନ ଲାଗି ଶ୍ରୀଜଗନ୍ନାଥ ତାଙ୍କୁ ରସଗୋଲା ଦିଅନ୍ତି, ସେହିପରି ଏକାମ୍ର କ୍ଷେତ୍ର ଭୁବନେଶ୍ବରରେ ପ୍ରଭୁ ଲିଙ୍ଗରାଜଙ୍କ ଆଗରେ କୋରାଖଇ ଲାଗି ହେବାର ପରମ୍ପରା ରହିଛି।

ଶ୍ରଦ୍ଧାଳୁଙ୍କ କହିବା ଅନୁସାରେ, କୋରାଖଇ ଲାଗି କଲେ ପ୍ରଭୁ ଲିଙ୍ଗରାଜ ବେଶ୍ ଖୁସି ହୁଅନ୍ତି।

କେମିତି ତିଆରି ହୁଏ କୋରାଖଇ?

ରାଜଧାନୀ ଭୁବନେଶ୍ବରରେ କୋରାଖଇର ତିଆରି ପରମ୍ପରା ବେଶ୍ ପ୍ରାଚୀନ।

ପୁରୁଣା ଭୁବନେଶ୍ବର ଅଞ୍ଚଳର ଅନେକ ସ୍ଥାନରେ ଏହା ତିଆରି ହୁଏ।

କୋରାଖଇ ପ୍ରସ୍ତୁତ କରିବା ପାଇଁ ଚାରିଟି ଉପଦାନ ଦରକାର- ଖଇ, ଚିନି ବା ଗୁଡ଼, ନଡ଼ିଆ ଏବଂ ଗୋଲମରିଚ, ଗୁଜରାତି, ଜାଇଫଳ ଓ ପାନମଧୁରୀରୁ ପ୍ରସ୍ତୁତ ଏକ ସ୍ବତନ୍ତ୍ର ପ୍ରକାର ମସଲା।

ଏହାର ପ୍ରସ୍ତୁତ ପ୍ରଣାଳୀ ପାରମ୍ପରିକ ଆଉ ଖୁବ୍ ସହଜ।

 

ପ୍ରଥମେ ପାଣିରେ ଗୁଡ଼ ବା ଚିନିକୁ ମିଶାଇ ଶିରା ପ୍ରସ୍ତୁତ କରାଯିବା ପରେ ସେଥିରେ ନଡ଼ିଆ ଖଣ୍ଡଗୁଡ଼ିକୁ ଏବଂ ମସଲା ପକାଇ ଭଲ ଭାବେ ଘାଣ୍ଟି ଦିଆଯାଏ।

ଏହା ପ୍ରସ୍ତୁତ ହେବା ପରେ ସେଥିରେ ଖଇ ମିଶାଇ ଘାଣ୍ଟି ଦିଆଯାଏ, ଯେମିତି ସବୁ ଖଇରେ ଶିରା ଲାଗିବ।

ଏହାକୁ ସୁବାସିତ କରିବା ପାଇଁ ଏଥିରେ ସାମାନ୍ୟ ଦେଶୀ ଘିଅ ପକାଯାଇଥାଏ।

ମୁଆଁ ପ୍ରସ୍ତୁତ ହୋଇସାରିବା ପରେ ତାକୁ ଆବଶ୍ୟକତା ଅନୁସାରେ ଖଣ୍ଡ ଖଣ୍ଡ କରିଦିଆଯାଏ।

ପୁରୁଣା ଭୁବନେଶ୍ବରରେ ଏମିତି ଅନେକ ପରିବାର ଅଛନ୍ତି, ଯେଉଁମାନେ ପୁରୁଷ ପୁରୁଷ ଧରି କୋରାଖଇ ତିଆରି କରିଆସୁଛନ୍ତି।

ଏହି ଅଂଚଳରେ ଏମିତି କେତେକ କୋରାଖଇ ଦୋକାନ ରହିଛି, ଯେଉଁ ଦୋକାନକୁ ବିଭିନ୍ନ ସମୟରେ ଭୁବନେଶ୍ବର ଆସୁଥିବା ରାଜ୍ୟର ଅନ୍ୟ ପ୍ରାନ୍ତର ଲୋକ ମଧ୍ୟ ଜାଣନ୍ତି।

କେଉଁଠାରୁ ପାଇବେ କୋରାଖଇ?

କୋରାଖଇର ଲୋକପ୍ରିୟତା ବେଶ୍ ଅଧିକ ଥିବାରୁ କେବଳ ପୁରୁଣା ଭୁବନେଶ୍ବର ଅଂଚଳ ନୁହେଁ, ରାଜଧାନୀର ବିଭିନ୍ନ ଅଂଚଳରେ ଥିବା ଦୋକାନଗୁଡ଼ିକରେ ମଧ୍ୟ ଏହା ବିକ୍ରି ହେଉଛି।

ଏପରିକି ରାଜ୍ୟର ଅନ୍ୟ ଅଂଚଳକୁ ମଧ୍ୟ କୋରାଖଇ ବ୍ୟବସାୟ ପହଞ୍ଚିସାରିଲାଣି।

ପୁରୁଣା ଭୁବନେଶ୍ବରରେ ଏଭଲି ୨୫ରୁ ଅଧିକ ଦୋକାନ ରହିଛି, ଯେଉଁ ଦୋକାନଗୁଡ଼ିକ ସେମାନଙ୍କ ଦ୍ବାରା ପ୍ରସ୍ତୁତ ସ୍ବତନ୍ତ୍ର ସ୍ବାଦର କୋରାଖଇ ପାଇଁ ପ୍ରସିଦ୍ଧ।

ଏହିସବୁ ଦୋକାନ ପ୍ରଭୁ ଲିଙ୍ଗରାଜଙ୍କ ପୂଜା ପରମ୍ପରା ସହ ଜଡ଼ିତ।

ଏଭଳି ଏକ ଦୋକାନ ହେଉଛି ‘ବାୟାବାବା କୋରାଖଇ ଦୋକାନ’।

ସ୍ଥାନୀୟ ଲୋକଙ୍କ କହିବା ଅନୁସାରେ, ଏହାର ପ୍ରତିଷ୍ଠାତା ରାମ ସାହୁ ହୋଇଥିବାବେଳେ ଏହା ରାଜଧାନୀର ସବୁଠାରୁ ପୁରୁଣା ଦୋକାନ।

ଭୁବନେଶ୍ବର ବାହାରୁ ଆସୁଥିବା ପର୍ଯ୍ୟଟକଙ୍କ ପାଇଁ ଏହି ଦୋକାନ ଏକ ଆକର୍ଷଣ ଭଳି ଏବଂ ବାୟାବାବା କୋରାଖଇକୁ ପ୍ରାୟ ସମସ୍ତେ ଜାଣନ୍ତି।

ପୁରୁଣା ଭୁବନେଶ୍ବର ଅଞ୍ଚଳରେ ଏଭଳି ଅନେକ ପରିବାର ଅଛନ୍ତି, ଯେଉଁମାନଙ୍କ ପେସା ହେଉଛି କୋରାଖଇ ପ୍ରସ୍ତୁତି ଓ ତାର ବ୍ୟବସାୟ କରିବା।

ଏହି ଅଂଚଳକୁ ଗଲେ ଆପଣ ଏହିଭଳି ଅନେକ ଦୋକାନ ଦେଖିବାକୁ ପାଇବେ, କେଉଁଠି ଭାରତ ବିଖ୍ୟାତ କୋରାଖଇ ଲେଖାହୋଇଥିବ ତ କେଉଁଠି ଜଗତ ବିଖ୍ୟାତ କୋରାଖଇ, ପୁଣି କେଉଁଠି ଓଡ଼ିଶା ପ୍ରସିଦ୍ଧ କୋରାଖଇ ଲେଖା ହୋଇଥିବ।

ଯୁଗ ରୁଚି ଅନୁସାରେ ଏବେ ବିଭିନ୍ନ କିସମର କୋରାଖଇ ବଜାରକୁ ଆସିଲାଣି।

ଓଡ଼ିଶାକୁ ଆଉ ଏକ ପରିଚିତି ଦେଇଥିବା ଏହି କୋରାଖଇର କିଲୋ ପିଛା ଦର ୧୮୦ରୁ ୨୨୦ ଟଙ୍କା।

ଲୋକାଲ୍ ଓ୍ବାୟାର୍