ଖାଦ୍ୟର ମାନ ଉପରେ ମହାନଗର ନିଗମର ନଜର, ଚାଲିଛି ଘନ ଘନ ଯାଞ୍ଚ

ରାଉରକେଲା, ଡିସେମ୍ବର ୦୩ (ଲୋକାଲ ୱାୟାର): ଗଲା କିଛିଦିନ ହେଲା ସହରର ରାସ୍ତାକଡ଼ରେ ଖାଦ୍ୟ ବିକ୍ରି କରୁଥିବା ଉଠାଦୋକାନ ସମେତ ରେଷ୍ଟୁରାଣ୍ଟ ଓ ହୋଟେଲଗୁଡ଼ିକ ଉପରେ ରାଉରକେଲା ମହାନଗର ନିଗମ (ଆର୍.ଏମ୍.ସି)ର ଖାଦ୍ୟ ନିରାପତ୍ତା ବିଭାଗ ଘନ ଘନ ଚଢ଼ାଉ ଚଳାଇଛି।

“ପୂର୍ବରୁ ମଧ୍ୟ ମହାନଗର ନିଗମ ପକ୍ଷରୁ ଏଭଳି ଚଢ଼ାଉ ହେଉଥିଲା। ହେଲେ ଏବେ ନିମ୍ନମାନର ଖାଦ୍ୟ ବିକ୍ରି ହେବା ନେଇ ଲୋକଙ୍କ ଅଭିଯୋଗ ପରେ ଏହାର ମାତ୍ରା ଆହୁରି ବଢ଼ାଇଦିଆଯାଇଛି।

ବୋଲି କହିଛନ୍ତି ଆର୍.ଏମ୍.ସି.ର ଖାଦ୍ୟ ନିରାପତ୍ତା ଅଧିକାରୀ ସ୍ବାଗତିକା ବେହେରା।

ସେ କହିଛନ୍ତି, “ଆମେ ବାରମ୍ବାର ରେଡ୍ କରିବାର କାରଣ ହେଉଛି ଦୋକାନୀମାନେ ସତର୍କ ହେବେ ଏବଂ ଭେଜାଲ୍ ଖାଦ୍ୟ ଉପରେ ଅଙ୍କୁଶ ଲାଗିବା ସହ ଲୋକେ ଭଲ ଖାଇବା ପାଇପାରିବେ।”

ବାସିଖାଦ୍ୟ, ତେଲ ସମେତ ଖାଦ୍ୟରେ ବ୍ୟବହୃତ ହେଉଥିବା ଅନ୍ୟ ସାମଗ୍ରୀ ଠିକ୍ ଅଛି ନା ନାହିଁ ଏସବୁ ଉପରେ ନଜର ଦିଆଯାଉଥିବା ସ୍ବାଗତିକା ସୂଚନା ଦେଇଛନ୍ତି।

ସେହିପରି ସଫାସୁତୁରା ପରିବେଶରେ ଦୋକାନ ଖୋଲାଯାଇଛି କି ନାହିଁ, ତା ଉପରେ ମଧ୍ୟ ନଜର ଦିଆଯାଉଛି।

କେବଳ ରାସ୍ତାକଡ଼ ଉଠାଦୋକାନ ନୁହେଁ, ବଡ଼ ବଡ଼ ହୋଟେଲ ଓ ରେଷ୍ଟୁରାଣ୍ଟ ଉପରେ ଓ ଚଢାଉ କରାଯାଉଛି ଓ ନିମ୍ନମାନର ଖାଦ୍ୟ ଅଭିଯୋଗରେ ସାତଜଣ ଦୋକାନ ମାଲିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଆରମ୍ଭ ହୋଇଥିବା ସ୍ବାଗତିକା କହିଛନ୍ତି।

ଅନ୍ୟପକ୍ଷରେ ମହାନଗର ନିଗମର ଏହି ପଦକ୍ଷେପକୁ ସହରର ବିଭିନ୍ନ ମହଲରେ ସ୍ବାଗତ କରାଯାଇଛି।

ପୂର୍ବରୁ ଖାଦ୍ୟକୁ ନେଇ ଡର ରହୁଥିଲା। ଏବେ ତାହା ଆଉ ନାହିଁ ବୋଲି ସ୍ଥାନୀୟ ବାସିନ୍ଦା ଲୁଲୁ ପଣ୍ଡା କହିଛନ୍ତି।

ସେହିପରି ପୂର୍ବରୁ ବର୍ଷାଦିନରେ ଏଭଳି ରେଡ୍ ହେଉଥିବା ଆମେ ଜାଣିଥିଲୁ, ହେଲେ ଏବେ ନିୟମିତ ରେଡ୍ ସ୍ବାଗତଯୋଗ୍ୟ ବୋଲି ଆଉ ଜଣେ ସ୍ଥାନୀୟ ବ୍ୟକ୍ତି କହିଛନ୍ତି।

ସୂଚନାଯୋଗ୍ୟ, ରାଉରକେଲା ସହରର ଛେଣ୍ଡ, ସିଭିଲ୍ ଟାଉନସିପ୍, ଉଦିତ ନଗର ଓ ପ୍ଲାଣ୍ଟ ସାଇଟ୍ ଅଂଚଳରେ ଘନ ଘନ ଚଢ଼ାଉ କରାଯାଉଥିବାବେଳେ ଆଗକୁ ଅନ୍ୟ ଅଞ୍ଚଳରେ ମଧ୍ୟ ଚଢ଼ାଉ କରାଯିବ ବୋଲି ମହାନଗର ନିଗମ ପକ୍ଷରୁ କୁହାଯାଇଛି।

ଲୋକାଲ ୱାୟାର