ଗଜପତିରେ ପ୍ରବଳ ବର୍ଷା, ୬ଶହ ଲୋକ ସ୍ଥାନାନ୍ତରିତ, ସଡ଼କ ବିଚ୍ଛିନ୍ନ

ବ୍ରହ୍ମପୁର, ଅକ୍ଟୋବର ୧୩(ଲୋକାଲ ୱାୟାର): କ୍ରମାଗତ ଦ୍ୱିତୀୟ ଦିନ ପାଇଁ ଗଜପତି ଜିଲ୍ଲାରେ ପ୍ରବଳ ବର୍ଷା ଲାଗି ରହିଥିବାରୁ ରାୟଗଡ଼ ବ୍ଲକର ଦୁଇଟି ସ୍ଥାନରେ ସଡ଼କ ଯୋଗାଯୋଗ ବିଚ୍ଛିନ୍ନ ହୋଇଥିବା ବେଳେ ୬ଶହ ଲୋକଙ୍କୁ ସ୍ଥାନାନ୍ତର କରାଯାଇଛି ।

୭ଟି ବ୍ଲକର ୧୩ଟି ଗ୍ରାମ ଯେଉଁ ଗୁଡ଼ିକ ବିଶେଷ କରି ପାହାଡ଼ିଆ ସ୍ଥାନରେ ଅଛି, ସେଠାରୁ ଲୋକମାନଙ୍କୁ ପାଖ ସ୍କୁଲ କୋଠାକୁ ସ୍ଥାନାନ୍ତର କରାଯାଇଛି ।

ଚାରି ଶହ ଲୋକଙ୍କୁ ରନ୍ଧା ଖାଦ୍ୟ ଯୋଗାଇ ଦିଆଯାଇଛି । ଅନ୍ୟ ଦୁଇ ଶହ ଜଣଙ୍କୁ ନିର୍ମାଣ ହୋଇଥିବା ନୂତନ ଘରକୁ ସ୍ଥାନାନ୍ତର କରାଯାଇଛି ।

୨୦୧୮ ଅକ୍ଟୋବର ୧୧ରେ ଝଡ଼ ତିତଲି ପ୍ରଭାବରେ ପାହାଡ଼ିଆ ଅଞ୍ଚଳରେ ଥିବା ସେମାନଙ୍କ ଘର ନଷ୍ଟ ହୋଇ ଯାଇଥିଲା ।

ଏବେ ବିଜୁ ପକ୍କା ଘର ଯୋଜନାରେ ସେମାନଙ୍କ ପାଇଁ ସମତଳ ଅଞ୍ଚଳରେ ନୂଆ ଘର ତିଆରି କରାଯାଇଛି ।

ତେବେ ଦୁଇ ଦିନର ବର୍ଷାରେ ଏ ପର୍ଯ୍ୟନ୍ତ କେବଳ ଗୋଟିଏ ଘର ଭାଙ୍ଗିଥିବା ଖବର ମିଳିଛି ବୋଲି କହିଛନ୍ତି ଗଜପତି ଜିଲ୍ଲାପାଳ ଅନୁପମ ଶାହା ।

କାଶୀନଗର ବ୍ଳକରେ କଚ୍ଚା ଘରେ ରହୁଥିବା ପ୍ରାୟ ୧୫ ପରିବାରଙ୍କୁ ତାରପୋଲିନ ସିଟ୍ ଯୋଗାଇ ଦିଆଯାଇଛି ।

ବରଘର ଓ କଇନପୁରରେ ଦୁଇଟି ରାସ୍ତା ଧୋଇ ଯାଇଛି । ତହସିଲଦାର ଓ ବିଡିଓମାନଙ୍କୁ କ୍ଷୟକ୍ଷତି ରିପୋର୍ଟ ଦେବାକୁ କୁହାଯାଇଛି ।

ମଙ୍ଗଳବାର ସକାଳ ସାଢ଼େ ୮ଟା ସୁଦ୍ଧା ଶେଷ ହୋଇଥିବା ୨୪ ଘଣ୍ଟା ମଧ୍ୟରେ ଜିଲ୍ଲାରେ ୯୫.୪୮ ମିଲିମିଟର ବର୍ଷା ରେକର୍ଡ କରାଯାଇଛି ।

ମୋହନା ବ୍ଲକରେ ସର୍ବାଧିକ ୧୩୩ ମିଲିମିଟର ବର୍ଷା ହୋଇଥିବା ବେଳେ ପାରଳାଖେମୁଣ୍ଡିରେ ୧୧୭, ରାୟଗଡ଼ରେ ୧୧୪, ଗୋଷାଣୀରେ ୧୦୭, ଗୁମ୍ମାରେ ୯୪, ଆର.ଉଦୟଗିରିରେ ୭୫, ନୂଆପଡ଼ାରେ ୭୨ ଏବଂ କାଶୀନଗରରେ ୫୧ ମିମି ବର୍ଷା ରେକର୍ଡ କରାଯାଇଛି ।

ଲୋକାଲ ୱାୟାର