ଗଞ୍ଜାମ ପାଇଁ ଆଶ୍ବସ୍ତି- ଏଡ୍ସ ଆକ୍ରାନ୍ତ ମାଆ ଜନ୍ମ ଦେଉଛନ୍ତି ସୁସ୍ଥ ନବଜାତ

ବ୍ରହ୍ମପୁର, ଡିସେମ୍ବର ୦୧ (ଲୋକାଲ ୱାୟାର): ରାଜ୍ୟର ସବୁଠାରୁ ଅଧିକ ଏଚ୍.ଆଇ.ଭି. ଆକ୍ରାନ୍ତ ଥିବା ଗଂଜାମ ଜିଲ୍ଲାରେ ଗତ ଦୁଇ ବର୍ଷ ମଧ୍ୟରେ କୌଣସି ଏଡ୍ସ ଆକ୍ରାନ୍ତ ମା ସଂକ୍ରମିତ ଶିଶୁଙ୍କୁ ଜନ୍ମ ଦେଇନଥିବା ସୂଚନା ମିଳିଛି।

ଗଂଜାମ ଜିଲ୍ଲାରେ ୨୦୧୮ରେ ୩୪ ଜଣ ଓ ୨୦୧୯ର ଅକ୍ଟୋବର ସୁଦ୍ଧା ୨୩ ଜଣ ଏଡ୍ସ ଆକ୍ରାନ୍ତ ମହିଳା ଛୁଆ ଜନ୍ମ ଦେଇଛନ୍ତି ଓ ଏମାନଙ୍କ ମଧ୍ୟରୁ ସମସ୍ତ ନବଜାତ ଏଚ୍.ଆଇ.ଭି. ନେଗେଟିଭ୍ ଥିବା ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି।

ଜିଲ୍ଲାରେ ଏଡ୍ସ ନିରାକରଣ କାର୍ଯ୍ୟକ୍ରମର ଏହା ସଫଳତା ବୋଲି ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡାକ୍ତର ବିଜୟ ଚନ୍ଦ୍ର ପାଣିଗ୍ରାହୀ ଦାବି କରିଛନ୍ତି।

ପୂର୍ବରୁ ଏଡ୍ସ ଆକ୍ରାନ୍ତ ପ୍ରସୂତିଙ୍କ ଛୁଆଙ୍କ ରକ୍ତ ନମୁନାରେ ଏଚ୍.ଆଇ.ଭି. ପଜିଟିଭ୍ ବାହାରୁଥିଲା ଓ ପରେ ଏଥିରେ ସୁଧାର ଦେଖାଦେଇଛି।

ପରେ ପରେ ଏହି ଧାରା କମିବାର ଦେଖାଯାଉଛି।

ତଥ୍ୟ ଅନୁସାରେ, ୨୦୧୪ରେ ୫୮ ଜଣ ମହିଳାଙ୍କ ମଧ୍ୟରୁ ୫ ଜଣ ଏଭଳି ଶିଶୁଙ୍କୁ ଜନ୍ମଦେଇଥିବାବେଳେ ୨୦୧୬ରେ ୬୭ ଜଣ ମହିଳା ୪ ଜଣ ଓ ୨୦୧୭ରେ ୪୯ ଜଣ ମହିଳାଙ୍କ ମଧ୍ୟରୁ ମାତ୍ର ଜଣେ ଏଚ୍.ଆଇ.ଭି. ପଜିଟିଭ୍ ଶିଶୁକୁ ଜନ୍ମ ଦେଇଥିଲେ।

ଜାତୀୟ ଏଡ୍ସ ନିୟନ୍ତ୍ରଣ ସଂସ୍ଥା (ନାକୋ) ଏଦିଗରେ କାର୍ଯ୍ୟ କରି ସଫଳ ହୋଇଥିବା କୁହାଯାଉଛି।

୨୦୧୪ରେ ଗଂଜାମ ଜିଲ୍ଲାରେ ଏଡ୍ସ ଆକ୍ରାନ୍ର ମାଆମାନଙ୍କର ଶିଶୁଙ୍କ ସୁରକ୍ଷା ଦିଗରେ କାର୍ଯ୍ୟ ଆରମ୍ଭ ହୋଇଥିବା ବିଭାଗୀୟ ଅଧିକାରୀ ହେମନ୍ତ ଦାସ ସୂଚନା ଦେଇଛନ୍ତି।

ଗର୍ଭବତୀ ଏଡ୍ସ ଆକ୍ରାନ୍ତଙ୍କ ପାଇଁ ଅଙ୍ଗନବାଡି କେନ୍ଦ୍ର ଓ ସ୍ଥାନୀୟ ଡାକ୍ତରଖାନାରେ ସବୁ ପ୍ରକାର ସହଯୋଗ ଓ ସଚେତନତା ପହଞ୍ଚିପାରିବାରୁ ଏହା ସମ୍ଭବ ହୋଇଥିବା ସେ କହିଛନ୍ତି।

ଏଥିପାଇଁ ଜିଲ୍ଲାର ଗୋଷ୍ଟୀ ସ୍ବାସ୍ଥ୍ୟ କେନ୍ଦ୍ର, ସବଡିଭିଜନାଲ୍ ହସ୍ପିଟାଲ୍, ଜିଲ୍ଲା ମୁଖ୍ୟ ଚିକିତ୍ସାଳୟ, ବ୍ରହ୍ମପୁର ବଡ଼ ଡାକ୍ତରଖାନା ଓ ଅନ୍ୟ ଘରୋଇ ଡାକ୍ତରଖାନାଗୁଡ଼ିକରେ ୨୫ଟି ସମନ୍ବିତ ପରାମର୍ଶ ଓ ପରୀକ୍ଷା କେନ୍ଦ୍ର (ଆଇସିଟିସି) ଖୋଲାଯାଇଛି।

ପୂର୍ବରୁ ଏଚ୍.ଆଇ.ଭି. ଆକ୍ରାନ୍ତ ମହିଳାମାନେ ସେମାନଙ୍କ ପରୀକ୍ଷା କରାଇବାକୁ ରାଜି ହେଉନଥିଲେ, ହେଲେ ଏବେ ଏହି ଧାରା ବଦଳିଥିବା ଏ ଦିଗରେ କାର୍ଯ୍ୟ କରୁଥିବା ଅରୁଣା ସଂଗଠନର ନିର୍ଦ୍ଦେଶକ ଲୋକନାଥ ମିଶ୍ର କହିଛନ୍ତି।

ସୂଚନାଯୋଗ୍ୟ, ଚଳିତ ବର୍ଷ ଅକ୍ଟୋବର ସେଷ ସୁଦ୍ଧା ଗଂଜାମ ଜିଲ୍ଲାରେ ୧୬ ହଜାର ୧୧ ଜଣ ଏଚ୍.ଆଇ.ଭି. ପଜିଟିଭ୍ ଆକ୍ରାନ୍ତ ଥିବାବାବେଳେ ଏମାନଙ୍କ ମଧ୍ୟରେ ୮୮୭ ଜଣ ଗର୍ଭବତୀ ଅଛନ୍ତି।

ଲୋକାଲ ୱାୟାର