ଗହୀରମଥାରେ ପ୍ରାୟ ସାଢ଼େ ତିନି ଲକ୍ଷ ଅଲିଭ ରିଡଲେ କଇଁଚଙ୍କ ଅଣ୍ଡାଦାନ

କେନ୍ଦ୍ରାପଡ଼ା, ଏପ୍ରିଲ ୬ (ଲୋକାଲ ୱାୟାର): ଗହୀରମଥା ସାମୁଦ୍ରିକ ଅଭୟାରଣ୍ୟରେ ଅଲିଭ ରିଡଲେ କଇଁଚଙ୍କ ୧୪ ଦିନିଆ ଅଣ୍ଡାଦାନ ପ୍ରକ୍ରିୟା ଶେଷ ହୋଇଛି ।

ମାର୍ଚ୍ଚ ୯ରୁ ୨୩ ମଧ୍ୟରେ ୩,୪୯,୬୯୪ କଇଁଚ ନାସି-୧ ଓ ନାସି-୨ ଦ୍ୱୀପରେ ଅଣ୍ଡା ଦେଇଛନ୍ତି ।

୨୦୨୦ରେ ୪୦୭୧୯୪, ୨୦୧୯ରେ ୪,୫୧,୬୪୮, ୨୦୧୮ରେ ୬,୬୫,୧୮୫ କଇଁଚ ଅଣ୍ଡା ଦେଇଥିବା ବେଳେ ୧୯୮୮, ୧୯୯୭ ଓ ୨୦୧୪ରେ କଇଁଚ ଗହୀରମଥାକୁ ଅଣ୍ଡା ଦେବାକୁ ଆସିନଥିଲେ ।

ବନ୍ୟପ୍ରାଣୀ ସଂରକ୍ଷଣ ଆଇନ, ୧୯୭୨ ଅନ୍ତର୍ଗତ ସୂଚୀ-୧ରେ ଅଲିଭ ରିଡଲେ କଇଁଚ ସ୍ଥାନ ପାଇବା ପରେ ବନ ବିଭାଗ, ଅନ୍ୟ ସରକାରୀ ଓ ବେସରକାରୀ ସଂସ୍ଥା କଇଁଚ ସଂରକ୍ଷଣ ପ୍ରତି ଅଧିକ ଗୁରୁତ୍ୱ ଦେଉଛନ୍ତି ।

କୁକୁର, ବିଲୁଆ, ବାରହା ଭଳି ଜନ୍ତୁ ଠାରୁ ଅଣ୍ଡା ଓ କଇଁଚଙ୍କୁ ସୁରକ୍ଷା ପ୍ରଦାନ ପାଇଁ ବନ ବିଭାଗ ପକ୍ଷରୁ ନାସି-୧ ଓ ନାସି-୨ ଦ୍ୱୀପର ଅଣ୍ଡାଦାନ ଅଂଚଳରେ ବାଡ ଘେରା ଯିବା ସହ ସୁରକ୍ଷା ପାଇଁ ବନ କର୍ମୀ ମୁତୟନ କରାଯାଇଛି ।

୪୫ଦିନରେ ଅଣ୍ଡାରୁ ଛୁଆ ଫୁଟି ସମୁଦ୍ରକୁ ଯିବେ । ପ୍ରତିବର୍ଷ ଶୀତଦିନେ ଅଲିଭ ରିଡଲେ କଇଁଚ ଦୂର ସ୍ଥାନରୁ ଅଣ୍ଡା ଦେବା ପାଇଁ ଆସିଥାନ୍ତି ବୋଲି ଭିତରକନିକା ଡିଏଫଓ ବିକାଶ ରଞ୍ଜନ ଦାଶ କହିଛନ୍ତି ।

ଲୋକାଲ ୱାୟାର