ଗୋପାଳପୁର ବନ୍ଦରରେ ଅଧିକ ନିବେଶ ଓ ପରିକଳ୍ପିତ ପ୍ରକଳ୍ପକୁ ଅନୁମୋଦନ

ଭୁବନେଶ୍ୱର, ଅଗଷ୍ଟ ୩୦(ଲୋକାଲ ୱାୟାର): ଆଗାମୀ ବର୍ଷଗୁଡ଼ିକରେ ଅଧିକ ନିବେଶ ତଥା ପ୍ରକଳ୍ପ ସ୍ଥାପନ ପାଇଁ ଗୋପାଳପୁର ବନ୍ଦର କର୍ତୃପକ୍ଷଙ୍କ ଯୋଜନାକୁ ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ପ୍ରଶଂସା କରିଛନ୍ତି ।

ଗୋପାଳପୁର ବନ୍ଦର ଉନ୍ନୟନ କାର୍ଯ୍ୟବିଧି ସମ୍ପର୍କରେ ମୁଖ୍ୟ ଶାସନ ସଚିବ ସମୀକ୍ଷା କରିଥିଲେ ।

ବାଣିଜ୍ୟ ଓ ପରିବହନ ବିଭାଗର ପ୍ରମୁଖ ସଚିବ ମଧୁସୂଦନ ପାଢୀ, ଅର୍ଥ ବିଭାଗର ପ୍ରମୁଖ ସଚିବ ଅଶୋକ କୁମାର ମୀନା, ରାଜସ୍ୱ ଓ ବିପର୍ଯ୍ୟୟ ପ୍ରବନ୍ଧନ ବିଭାଗର ପ୍ରମୁଖ ସଚିବ ବିଷ୍ଣୁପଦ ସେଠି, ନିର୍ମାଣ ସଚିବ, ମତ୍ସ୍ୟ ଓ ପଶୁପାଳନ ସଚିବ, ବାଣିଜ୍ୟ ଓ ପରିବହନ ବିଭାଗର ସ୍ୱତନ୍ତ୍ର ସଚିବ, ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ ଓ ଅନ୍ୟ ବରିଷ୍ଠ ଅଧିକାରୀମାନେ ଭିଡିଓ କନଫରେନ୍ସିଂ ମାଧ୍ୟମରେ ଏହି ସମୀକ୍ଷା ବୈଠକରେ ଭାଗ ନେଇଥିଲେ ।

ଜିପିଏଲରେ ଚାଲିଥିବା କାମ ଓ ଗୋପାଳପୁର ଆଖପାଖରେ ଶିଳ୍ପାୟନ ପାଇଁ ହେବାକୁ ଥିବା ନିବେଶ ଯୋଜନା ସମ୍ପର୍କରେ ଗୋପାଳପୁର ବନ୍ଦର ଲିମିଟେଡର ପରିଚାଳନା ନିଦେ୍ର୍ଦଶକ ଅମିତ ସାବୁ ମୁଖ୍ୟ ଶାସନ ସଚିବଙ୍କୁ ଅବଗତ କରାଇଥିଲେ ।

ଗୋପାଳପୁର ବନ୍ଦରରେ ଏଲଏନଜି ଟର୍ମିନଲ ନିର୍ମାଣ ପ୍ରସ୍ତାବ ରହିଥିବା ବେଳେ ୨ ହଜାର କୋଟି ଟଙ୍କା ବିନିଯୋଗରେ ସାର କିମ୍ବା ପେଟ୍ରୋକେମିକାଲ ଶିଳ୍ପ ସ୍ଥାପନ ଲକ୍ଷ୍ୟ ରହିଛି ।

ଖାଇବା ତେଲ ରିଫାଇନାରୀ ପ୍ରକଳ୍ପ ସ୍ଥାପନ ଯୋଜନା ମଧ୍ୟ ରହିଛି । ଗୋପାଳପୁର ବନ୍ଦରକୁ ଲୁହା ପଥର ପରିବହନରେ ପ୍ରଚଳିତ କ୍ୟାପିଂ ସମ୍ପର୍କରେ ଆଲୋଚନା ହୋଇଥିଲା ।

ଆର୍ଟିଫିସିଆଲ କ୍ୟାପିଂ ବନ୍ଦ କରିବା ପାଇଁ ମୁଖ୍ୟ ଶାସନ ସଚିବ ଖଣି ଉପନିଦେ୍ର୍ଦଶକଙ୍କୁ ନିର୍ଦ୍ଦେଶ ଦେଇଛନ୍ତି ।

ଉଲ୍ଲେଖେଯାଗ୍ୟ, ରାଜ୍ୟର ଖଣିଗୁଡ଼ିକରୁ ଆନ୍ଧ୍ରପ୍ରଦେଶର ବିଶାଖାପଟ୍ଟନମ ଓ ଗଙ୍ଗାଭରମ ବନ୍ଦରକୁ ଟ୍ରକ ଲୋଡିଂ ଉପରେ କୌଣସି ପ୍ରତିବନ୍ଧକ ନାହିଁ ।

ଇସ୍ପାତ ଓ ଖଣି ବିଭାଗ ସହିତ ଏ ନେଇ ଆଲୋଚନା କରିବାକୁ ମୁଖ୍ୟ ଶାସନ ସଚିବ ନିଦେ୍ର୍ଦଶ ଦେଇଛନ୍ତି ।

ମହାମାରୀ ସମୟରେ ଗୋପାଳପୁର ବନ୍ଦରର କାର୍ଯ୍ୟଶୈଳୀ ଓ ପ୍ରସ୍ତାବିତ ପ୍ରକଳ୍ପ ସମ୍ପର୍କରେ ଗୋପାଳପୁର ବନ୍ଦରର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସନ୍ଦୀପ ଅଗ୍ରୱାଲ ପାୱାର ପଏଣ୍ଟ ପ୍ରେଜେଣ୍ଟେସନ ଦେଖାଇଥିଲେ ।

ଜିପିଏଲ ୧୨ ଶହ ଏକର ଜମି ଆବଶ୍ୟକ କରୁଥିବା ବେଳେ ଏଯାଏଁ ୩୯୩ ଏକର ଜମି ପ୍ରଦାନ କରାଯାଇଛି । ବାକି ୮ ଶହ ଏକର ଜମି ଯୋଗାଇ ଦେବାକୁ ଅନୁରୋଧ କରାଯାଇଛି ।

ନିକଟରେ ରାଜସ୍ୱ ଓ ବିପର୍ଯ୍ୟୟ ପ୍ରବନ୍ଧନ ବିଭାଗ ଚିହ୍ନଟ କରିଥିବା ୧୧୯ ଏକର ଜମି ଜିପିଏଲକୁ ଶୀଘ୍ର ହସ୍ତାନ୍ତର କରାଯିବ ।

ରେଳ ଓ ରାସ୍ତା ଯୋଗାଯୋଗ ପ୍ରସଙ୍ଗରେ ମଧ୍ୟ ବିସ୍ତୃତ ଆଲୋଚନା ହୋଇଛି । ବାଣିଜ୍ୟ ଓ ପରିବହନ ବିଭାଗର ସ୍ୱତନ୍ତ୍ର ସଚିବ ମନୋଜ କୁମାର ମିଶ୍ର ବିସ୍ତୃତ ବିବରଣୀ ପ୍ରଦାନ କରିଥିଲେ ।

ରାଜ୍ୟରୁ ରପ୍ତାନୀ ବଢ଼ାଇବାରେ ଜିପିଏଲର ଉଦ୍ୟମକୁ ମୁଖ୍ୟ ଶାସନ ସଚିବ ପ୍ରଶଂସା କରିବା ସହ ରାଜ୍ୟ ରପ୍ତାନୀ ବିକାଶ କମିଟିର ଅଧ୍ୟକ୍ଷ ଭାବେ ୨୦୨୫ ସୁଦ୍ଧା ଏକ ଲକ୍ଷ କୋଟି ଟଙ୍କାର ରପ୍ତାନୀ କାରବାର ଲକ୍ଷ୍ୟ ଥିବା ନୂତନ ରପ୍ତାନୀ ନୀତି ପ୍ରଣୟନ କରାଯାଉଛି ବୋଲି କହିଥିଲେ ।

ରପ୍ତାନୀ ବୃଦ୍ଧି ତ୍ୱରାନ୍ୱିତ କରିବା ଉପରେ ଗୁରୁତ୍ୱ ଦେବା ସହ ଅଗ୍ରାଧିକାର ଭିତ୍ତିରେ ବନ୍ଦରର ବିକାଶ ସମ୍ପର୍କିତ ପ୍ରସଙ୍ଗଗୁଡ଼ିକ ସମାଧାନ କରିବାକୁ ପରାମର୍ଶ ଦେଇଥିଲେ ।

ଲୋକାଲ ୱାୟାର