ଗୋଲ୍ଡେନ ଜୁରୀ ଫିଲ୍ମ ଫେଷ୍ଟିଭାଲରେ ‘ରଜ’କୁ ଶ୍ରେଷ୍ଠ ନିର୍ଦ୍ଦେଶନା ପୁରସ୍କାର

ଭୁବନେଶ୍ୱର, ଡିସେମ୍ବର ୨୪(ଲୋକାଲ ୱାୟାର): ମୁମ୍ବାଇରେ ଅନୁଷ୍ଠିତ ଗୋଲ୍ଡେନ ଜୁରୀ ଫିଲ୍ମ ଫେଷ୍ଟିଭାଲରେ ଓଡ଼ିଆ ପ୍ରାମାଣିକ ଚଳଚ୍ଚିତ୍ର ‘ରଜ’କୁ ଶ୍ରେଷ୍ଠ ନିର୍ଦ୍ଦେଶନା ପୁରସ୍କାର ପ୍ରଦାନ କରାଯାଇଛି ।

ଏହି ପୁରସ୍କାର ଗ୍ରହଣ କରିଛନ୍ତି ନିର୍ଦ୍ଦେଶକ ଶିଶିର କୁମାର ସାହୁ । ଚଳଚ୍ଚିତ୍ର ସମ୍ପର୍କରେ ଶ୍ରୀ ସାହୁ କହିଛନ୍ତି, ଓଡ଼ିଆ ସଂସ୍କୃତି, ପରମ୍ପରାର ପର୍ବ ରଜ ।

ଏଥିରେ ରଜ ପଛରେ ରହିଥିବା ଇତିହାସ, ବୈଜ୍ଞାନିକ ତତ୍ତ୍ୱକୁ ବି ଦେଖାଯାଇଛି । ପୂର୍ବରୁ ରଜ ଗୀତ ବା ଶୀର୍ଷକକୁ ନେଇ ବିଭିନ୍ନ ଫିଲ୍ମ ହୋଇଛି ଆମେ କିନ୍ତୁ ରଜକୁ ନେଇ ଫିଲ୍ମ କରିଛୁ । ପୂର୍ବରୁ ଏହା ବିଭିନ୍ନ ମହୋତ୍ସବରେ ପ୍ରଦର୍ଶିତ ହୋଇ ପ୍ରଶଂସା ସାଉଁଟିଛି ।

ତେଣୁ ଏ ପୁରସ୍କାର ଆହୁରି ଉତ୍ସାହିତ କରିଛି । ପିଏସ୍ ମୋସନ୍ ପିକଚର୍ସ ପ୍ରଯୋଜିତ ଏ ସିନେମାର ପ୍ରଯୋଜନା ଏବଂ ସମ୍ପାଦନାରେ ପିନାକୀ ସିଂହ ରହିଛନ୍ତି ।

କାହାଣୀ ରଚନା ଦେବସ୍ରିତା ସିଂହ, ଶୁଭେନ୍ଦୁ ମହାନ୍ତି, ବର୍ଣ୍ଣନା ଡ. ଜିତ୍ ରାୟ, ଫଟୋଗ୍ରାଫିରେ ସିଦ୍ଧାର୍ଥ, ଲୋକେସନ୍ ସାଉଣ୍ଡ ସତ୍ୟବ୍ରତ ମହାନ୍ତି, ଚିନ୍ମୟ ବିଦ୍ୟାଦାତା, ଡିଜାଇନ୍ ଏବଂ ମିକ୍ସିଂ ସଞ୍ଜୟ କୁମାର ମହାରଣା, ସହଯୋଗୀ ସମ୍ପାଦକ ନୈବେଦ୍ୟ ସାମଲ, କାର୍ଯ୍ୟକାରୀ ପ୍ରଯୋଜକ ଚିତ୍ତରଞ୍ଜନ ପ୍ରଧାନ, ଆସୋସିଏଟ୍ ସିନେମାଟୋଗ୍ରାଫର ସର୍ବେଶ୍ୱର ଦାଶ ଏବଂ ଚିଲୁ, ଡିଜିଟାଲ କଲରିଷ୍ଟ ବିଶ୍ୱଜିତ ସ୍ୱାଇଁ ଏବଂ ପବ୍ଲିସିଟି ଡିଜାଇନର ପୁରୁଷୋତ୍ତମ ସାହୁ ପ୍ରମୁଖ ସହଯୋଗ କରି ବିଭିନ୍ନ ଦିଗରୁ ଏହାକୁ ବଳିଷ୍ଠ କରିବାକୁ ଚେଷ୍ଟା କରିଛନ୍ତି ।

ଖୁସିର କଥା ଶ୍ରୀ ସାହୁଙ୍କ ଅନ୍ୟତମ ଚଳଚ୍ଚିତ୍ର ‘ସ୍ୱାହା’ ବି ଏହି ଫେଷ୍ଟିଭାଲକୁ ମନୋନୀତ ହୋଇଥିଲା ।

ଲୋକାଲ ୱାୟାର