ଗ୍ରାମବାସୀଙ୍କ ନିଆରା ପ୍ରୟାସ: ନିଜସ୍ୱ ଉଦ୍ୟମରେ ନିର୍ମାଣ କଲେ ବାଉଁଶ ପୋଲ

କେନ୍ଦ୍ରାପଡା, ଡିସେମ୍ବର ୧୯ (ଲୋକାଲ ୱାୟାର): କେନ୍ଦ୍ରାପଡ଼ା ଜିଲ୍ଲା ଆଳି ବ୍ଲକ ଅନ୍ତର୍ଗତ ଦୈତାରୀପୁର, ପଦନିପାଳ, ଶାସନ, ଖରଖରା, କାଲାମୋଡାଶାସନ, ଲେଙ୍କାପଡା ଗ୍ରାମବାସୀମାନେ ଖରସ୍ରୋତା ନଦୀରେ ବାଉଁଶ ପୋଲ ନିର୍ମାଣ କରି ଉଦାହରଣ ସୃଷ୍ଟି କରିଛନ୍ତି ।

ଗାଁଗୁଡିକର ସାମାଜିକ ଓ ଆର୍ଥିକ ସ୍ଥିତିରେ କିଛିଟା ପରିବର୍ତନ ଆସିଥିଲେ ମଧ୍ୟ ପୋଲ ନଥିବାରୁ ସର୍ବାଙ୍ଗୀନ ଉନ୍ନତି ହୋଇ ପାରିନାହିଁ ।

ଦୁଇ ମାସ ପୂର୍ବେ ଗ୍ରାମବାସୀମାନେ ପୋଲ ନିର୍ମାଣ ପାଇଁ ଅଂଟା ଭିଡିଥିଲେ । ଏଥିପାଇଁ ୫୦ ହଜାର ଟଙ୍କା ଓ ୨ ହଜାର ବାଉଁଶ ଆଦାୟ ହୋଇଥିଲା ।

୫୦ ଗ୍ରାମବାସୀ ବିନା ମଜୁରୀରେ ୧୮୦ ମିଟରର ପୋଲଟିକୁ ମାତ୍ର ୨୫ ଦିନରେ ତିଆରି କରି ପାରିଛନ୍ତି ବୋଲି ପଦନିପାଳ ଗାଁର ପୂର୍ଣ୍ଣଚନ୍ଦ୍ର ମଲ୍ଲିକ କହିଛନ୍ତି ।

ପୋଲ ନିର୍ମାଣ କରି ଅଞ୍ଚଳବାସୀ ଏକତାର ପରିଚୟ ଦେଇଛନ୍ତି । କର୍ତୃପକ୍ଷଙ୍କ ନିକଟରେ ବାରମ୍ବାର ଗୁହାରି କରିଥିଲେ ମଧ୍ୟ ସମସ୍ୟା ସମାଧାନ ହୋଇନଥିଲା ବୋଲି କହିଛନ୍ତି ଦୈତାରୀପୁର ଗାଁର ରମାକାନ୍ତ ଦାସ ।

ଗ୍ରାମବାସୀଙ୍କ ଏହି ଉଦ୍ୟମ ଜିଲ୍ଲା ପ୍ରଶାସନ ଓ ନେତାମାନଙ୍କ ଆଖି ଖୋଲିବା ପାଇଁ ଯଥେଷ୍ଟ । ଅନ୍ୟ ଗ୍ରାମବାସୀମାନେ ମଧ୍ୟ ଏକାଠି ହୋଇ ସମସ୍ୟା ସମାଧାନ କରିବା ଉଚିତ ବୋଲି ଶାସନ ଗାଁର ସ୍କୁଲ ଶିକ୍ଷକ ମୃତୁ୍ୟଞ୍ଜୟ ସାମଲ କହିଛନ୍ତି ।

ପ୍ରତିଶ୍ରୁତି ସତ୍ତ୍ୱେ ସରକାର ଓ ନେତାମାନେ ପୋଲଟିଏ ନିର୍ମାଣ କରିନଥିଲେ । ତେଣୁ ଆମେ ନିଜସ୍ୱ ଉଦ୍ୟମରେ ପୋଲ ତିଆରି କରିଛୁ ।

ଏହାଦ୍ୱାରା ଆମର ଅନେକ ସମସ୍ୟା ଦୂର ହେବ ବୋଲି କହିଛନ୍ତି ପଦନିପାଳ ଗାଁର ଦାମୋଦର ଦାସ ।

ଲୋକାଲ ୱାୟାର