ଘୋଡ଼ାହାଡ଼ରେ ମଗର ସଂଖ୍ୟା ବୃଦ୍ଧି

ବ୍ରହ୍ମପୁର, ଜାନୁଆରୀ ୧୩ (ଲୋକାଲ ୱାୟାର): ଗଂଜମ ଜିଲ୍ଲା ଦିଗପହଣ୍ଡି ନିକଟ ଘୋଡ଼ାହାଡ଼ ଜଳଭଣ୍ଡାର ସମେତ ଏହାର ଆଖପାଖ ଅଂଚଳରେ ଥିବା ଜଳାଶୟରେ ଲମ୍ବାମୁହଁ ଥିବା ମଗର କୁମ୍ଭୀର ସଂଖ୍ୟା ବୃଦ୍ଧି ପାଇଥିବା ନେଇ ବନ୍ୟପ୍ରାଣୀ ବିଶାରଦମାନେ ଆନନ୍ଦ ପ୍ରକାଶ କରିଛନ୍ତି।

ଗଲା ତିନି ଦିନ ଧରି ହୋଇଥିବା ଗଣନାରୁ ଜଣାପଡ଼ିଛି ଯେ, ଗତବର୍ଷ ଏଠାରେ ମଗର ସଂଖ୍ୟା ୫୮ ଥିବାବେଳେ ଚଳିତ ବର୍ଷ ୬୫ରେ ପହଞ୍ଚିଛି।

ଏଥିରୁ ପାଞ୍ଚ ବର୍ଗ କିଲୋମିଟର ପରିସୀମାବିଶିଷ୍ଟ ଘୋଡ଼ାହାଡ଼ ଜଳଭଣ୍ଡାରରେ ୪୪ଟି ମଗର ଥିବାବେଳେ ଏହାର ଆଖପାଖ ଜଳାଶୟରେ ବାକି ୨୧ଟି ଚିହ୍ନଟ ହୋଇଥିବା ବ୍ରହ୍ମପୁର ଡ.ଏଫ୍.ଓ. ଅମ୍ଲାନ ନାୟକ ସୂଚନା ଦେଇଛନ୍ତି।

ଗତବର୍ଷ ଘୋଡ଼ାହାଡ଼ରେ ୪୩ଟି ଓ ଆଖପାଖ ଜଳାଶୟରେ ୧୫ଟି ମଗର ଥିବା ଜଣାପଡ଼ିଥିଲା।

ଉଲ୍ଲେଖଯୋଗ୍ୟ, ୨୦୧୫ରେ ଏଠାରେ ୪୯ଟି ମିଗର ଥିବାବେଳେ ୨୦୧୬ ଓ ୨୦୧୭ରେ ଏମାନଙ୍କ ସଂଖ୍ୟା ୫୫ ରହିଥିଲା।

ଗତ ଗୁରୁବାରଠାରୁ ୨୦ଟି ଟିମ୍ ଏଠାରେ ମଗର ଗଣନା କାର୍ଯ୍ୟରେ ନିୟୋଜିତ ହୋଇଥିଲେ।

ସୂଚନାଯୋଗ୍ୟ, ରାଜ୍ୟର ସାତକୋଶିଆ ଶିମିଳିପାଳ ପରେ ଘୋଡ଼ାହାଡ଼ରେ କୁମ୍ଭୀର ରହନ୍ତି।

ଏମାନଙ୍କୁ ସୁରକ୍ଷା ଦେବା ଲାଗି ଜାଲ ବ୍ୟବହାର ଉପରେ ଅଂକୁଶ ଲଗାଯାଇଥିବା ଦିଗପହଣ୍ଡି ରେଞ୍ଜ ଅଧିକାରୀ ପି.କେ. ଖଡ଼ଗରାୟ ସୂଚନା ଦେଇଛନ୍ତି।

ଲୋକାଲ୍ ଓ୍ବାୟାର୍