ବିଶେଷ : ଚଳଚ୍ଚିତ୍ର ନିର୍ମାତା ମନମୋହନ ମହାପାତ୍ରଙ୍କ ସମ୍ପର୍କରେ କିଛି କଥା

ଭୁବନେଶ୍ୱର, ଜାନୁଆରୀ ୧୪(ଲୋକାଲ ୱାୟାର): ଓଡ଼ିଆ ଚଳଚ୍ଚିତ୍ର ଜଗତର ବିଶିଷ୍ଟ ନିର୍ମାତା, ନିର୍ଦ୍ଦେଶକ, ପ୍ରଯୋଜକ ଓ ଲେଖକ ମନମୋହନ ମହାପାତ୍ରଙ୍କର ସୋମବାର ୬୯ ବର୍ଷ ବୟସରେ ପରଲୋକ ହୋଇଯାଇଛି । ଆସନ୍ତା ଜାଣିବା ତାଙ୍କ ସମ୍ପର୍କରେ କିଛି କଥା.. ..

-ଶେଷ ସିନେମା ‘ଭିଜା ମାଟିର ସ୍ୱର୍ଗ’

ଭିଜାଇଦେଲା ଭିଜା ମାଟିର ସ୍ୱର୍ଗ । କିଏ ଜାଣିଥିଲା ଏହା ହେବ ତାଙ୍କର ଶେଷ ସିନେମା ।

୩୦ତମ ରାଜ୍ୟ ଚଳଚ୍ଚିତ୍ର ପୁରସ୍କାରରେ ସ୍ୱର୍ଗତ ମହାପାତ୍ରଙ୍କ ନିର୍ଦ୍ଦେଶିତ ଚଳଚ୍ଚିତ୍ର ‘ଭିଜା ମାଟିର ସ୍ୱର୍ଗ’ ଶ୍ରେଷ୍ଠ ସିନେମା, ଶ୍ରେଷ୍ଠ ନିର୍ଦ୍ଦେଶନା, ସହ ମୋଟ୍ ୬ଟି ବର୍ଗରେ ପୁରସ୍କାର ପାଇ ବିଚାରକଙ୍କ ମନ ଜିଣି ନେଇଥିଲା ।

ଏହି ସିନେମା ପାଇଁ ଶ୍ରେଷ୍ଠ ଅଭିନେତା ଭାବେ ମିହିର ଦାସ, ଶ୍ରେଷ୍ଠ ଚିତ୍ରଗହଣ(ପ୍ରମୋଦ ପତି ସମ୍ମାନ) ଦିଲ୍ଲୀପ ରାୟ, ଶ୍ରେଷ୍ଠ ଚିତ୍ରନାଟ୍ୟ ଆଶୁତୋଷ ମହାପାତ୍ର ଏବଂ ଶ୍ରେଷ୍ଠ ସଂଳାପ ଲେଖକ ଭାବେ ନନ୍ଦଲାଲ ମହାପାତ୍ର ପୁରସ୍କାର ପାଇଥିଲେ ।

ନିର୍ଦ୍ଦେଶକ ଭାବେ ସ୍ୱର୍ଗତ ମହାପାତ୍ର ଏବଂ ପ୍ରଯୋଜକ ଭାବେ ଅକ୍ଷୟ ପରିଜା ପୁରସ୍କାର ଗ୍ରହଣ କରିଥିଲେ ।

ଏହି ପୁରସ୍କାର ଗ୍ରହଣ କରି ହ୍ୟାଟ୍ରିକ୍ ମାରିଥିଲେ ଅକ୍ଷୟ ପରିଜା । ସେ ଏକମାତ୍ର ପ୍ରଯୋଜକ ଭାବେ ତିନିଥର ରାଜ୍ୟ ଶ୍ରେଷ୍ଠ ଚଳଚ୍ଚିତ୍ର ପୁରସ୍କାର ପାଇଛନ୍ତି ।

ତାଙ୍କୁ ହ୍ୟାଟ୍ରିକ୍ ମାରିବାର ସୁଯୋଗ ଦେଇଥିଲେ ସ୍ୱର୍ଗତ ମହାପାତ୍ର । ଯାହା ବି ହେଉ ଏ ସିନେମା ରିଲିଜ୍ ସହ ତାକୁ ନେଇ ଅନେକ କିଛି ଯୋଜନା ହୋଇଥିଲା ।

କିନ୍ତୁ ସବୁ କିଛି ଅଧାରେ ରହିଗଲା । ଏଥିରେ କାମ କରିଥିବା ପୂରା ଟିମ୍ ଆଜି ଝୁରି ହେଉଛି ତାଙ୍କୁ ।

-ମୁନ୍ନା ଭାଇ ନାଁରେ ପରିଚିତ ଥିଲେ

ମନମୋହନ ମହାପାତ୍ର ଯେତିକି ଏହି ନାଁରେ ପରିଚିତ ଥିଲେ ତା’ଠାରୁ ଅଧିକ ପରିଚିତ ଥିଲେ ମୁନ୍ନା ଭାଇ ନାଁରେ ।

ତାଙ୍କ ସହିତ କାମ କରୁଥିବା ସମସ୍ତ ସହକର୍ମୀ ଓ ସାଙ୍ଗସାଥୀ ତାଙ୍କୁ ମୁନ୍ନା ଭାଇ ନାଁରେ ଡାକୁଥିଲେ ।

ତେଣୁ ନିର୍ଦ୍ଦେଶକ ମନମୋହନ ମହାପାତ୍ର ବାହାରେ ମୁନ୍ନା ଭାଇ ପରିଚୟରେ ବଞ୍ଚିଥିଲେ ।

‘ଶୀତ ରାତି’ ଏକ ସଂଯୋଗ…

ସ୍ୱର୍ଗତ ମହାପାତ୍ରଙ୍କ ପ୍ରଥମ ଓଡ଼ିଆ ଫିଚର୍ ଫିଲ୍ମ ଥିଲା ‘ଶୀତ ରାତି’ । ଯାହା ୧୯୭୬ରେ ଆରମ୍ଭ ହୋଇ ୧୯୮୨ରେ ରିଲିଜ୍ ହୋଇଥିଲା ।

ଏହା ପ୍ରଥମ ଓଡ଼ିଆ ଚଳଚ୍ଚିତ୍ର ଭାବେ ଇଣ୍ଟରନ୍ୟାସନାଲ ଫିଲ୍ମ ଫେଷ୍ଟିଭାଲରେ ରିଲିଜ୍ ହୋଇଥିଲା ।

ଖୁସିର କଥା ଏହି ସିନେମା ଶ୍ରେଷ୍ଠ ଫିଚର୍ ଫିଲ୍ମ ଭାବେ ଜାତୀୟ ପୁରସ୍କାର ପାଇଥିଲା ।

ଅନେକ କହିଛନ୍ତି ଏହି ଶୀତ ରାତି ତାଙ୍କ ପାଇଁ ଏକ ସଂଯୋଗ ଥିଲା । ସେ ତାଙ୍କ କ୍ୟାରିଅର ଆରମ୍ଭ କରିଥିଲେ ଆଉ ଯେଉଁ ସିନେମା ତାଙ୍କୁ ଏତେ ସ୍ୱୀକୃତି ଦେଇଥିଲା ସେହି ଶୀତ ରାତିରେ ଆଜି ସେ ନିରବିଗଲେ ।

ତେଣୁ ଶୀତ ରାତି ଓ ତାଙ୍କ ଭିତରେ ଥିବା ସମ୍ପର୍କ ଏଇଥିରୁ ଅନୁଭବ କରିପାରୁଥିବେ ।

ସେ ବି ବିଭିନ୍ନ ସାକ୍ଷାତକାରରେ କହିଛନ୍ତି ଏହି ସିନେମା ତାଙ୍କ ପସନ୍ଦର ସିନେମା ଥିଲା ।

-‘ଶୀତ ରାତି’ ସୁଟିଂ ସ୍ଥଳରୁ ‘ନିରବ ଝଡ଼’

ଚଳଚ୍ଚିତ୍ର ‘ଶୀତ ରାତି’ର ସୁଟିଂ ପାଇଁ ସେ କାଳୁପଡ଼ା ଷ୍ଟେସନ୍ ଯାଇଥାନ୍ତି । ସେଠାରେ ଦେଖିଲେ ବହୁ ସଂଖ୍ୟକ ଲୋକେ କାମ ଅନ୍ୱେଷଣରେ ଅନ୍ୟ ରାଜ୍ୟକୁ ଦାଦନ ଖଟିବାକୁ ଯାଉଛନ୍ତି ।

କିନ୍ତୁ କେହି ଖୁସି ନଥିଲେ । ସେହିମାନଙ୍କୁ ଦେଖି ସ୍ୱର୍ଗତ ମହାପାତ୍ର ଚିନ୍ତା କଲେ ନିର୍ମାଣ କରିବେ ସିନେମା ‘ନିରବ ଝଡ଼’ ।

ଅନ୍ୟତମ ଚଳଚ୍ଚିତ୍ର ‘ଅଗ୍ନିବୀଣା’ ବି ଦାଦନ ଉପରେ ପର୍ଯ୍ୟବେସିତ । ମଣିଷର ମନକୁ ଚିହ୍ନି ଚଳଚ୍ଚିତ୍ର ନିର୍ମାଣ କରୁଥିବା ଜଣେ ଭିନ୍ନ ନିର୍ଦ୍ଦେଶକ ଥିଲେ ।

‘ଭିନ୍ନ ସମୟ’ ଚଳଚ୍ଚିତ୍ରରେ ସେହିଭଳି ଜଣେ ବ୍ୟକ୍ତିଙ୍କ ଚଞ୍ଚଳ ମନକୁ ନେଇ ଚଳଚ୍ଚିତ୍ର ନିର୍ମାଣ କରିଥିଲେ ।

-ପ୍ରଭାବିତ କରିଥିଲା ସତ୍ୟଜିତ ରାୟଙ୍କ ସିନେମା

ସ୍ୱର୍ଗତ ମହାପାତ୍ର ସତୁରି ଦଶକରେ ବାପାଙ୍କ ସହ କୋଲକାତାରେ ରହୁଥିଲେ । ଘର ପାଖରେ ଏକ ଷ୍ଟୁଡିଓ ଥିଲା ।

ସେତେବେଳେ ସେଠାକୁ ସେ ଥିଏଟର ଓ ସିନେମା ସୁଟିଂ ଦେଖିବାକୁ ମଝିରେ ମଝିରେ ଚାଲିଯାଉଥିଲେ ।

ଧୀରେ ଧୀରେ ଚଳଚ୍ଚିତ୍ର ପ୍ରତି ତାଙ୍କର ଆକର୍ଷଣ ବଢ଼ୁଥିବାବେଳେ ସତ୍ୟଜିତ ରାୟଙ୍କ ନିର୍ମିତ ‘ଅଶନୀ ସଙ୍କେତ’ ତାଙ୍କୁ ବେଶ୍ ପ୍ରଭାବିତ କରିଥିଲା ।

ଫଳରେ ସେ ଚଳଚ୍ଚିତ୍ର ଜଗତକୁ ନିଜର କର୍ମଭୂମି ଭାବେ ବାଛି ନେଇଥିଲେ । ସେହିଦିନଠାରୁ ସେ ପଛକୁ ଫେରିନଥିଲେ ।

-ସ୍ୱପ୍ନରେ ରହିଲା ୫ ଚଳଚ୍ଚିତ୍ର

ଅସୁସ୍ଥତା ଯୋଗୁ ସେ ବାରମ୍ବାର ଡାକ୍ତରଖାନା ଯାଉଥିଲେ ସୁଦ୍ଧା ମନ ଥିଲା ସିନେମାରେ ।

କେତେବେଳେ ଚିକିତ୍ସା ସମୟର ଅନୁଭୂତିକୁ ନେଇ କାହାଣୀ ଲେଖିବି ବୋଲି କହୁଥିଲେ ତ ଆଉ କେତେବେଳେ ଘରେ ବସି ସିନେମାର ପରିକଳ୍ପନା କରୁଥିଲେ ବୋଲି ସିନେମାଟୋଗ୍ରାଫର ଦିଲ୍ଲୀପ ରାୟ କହିଛନ୍ତି ।

ସବୁବେଳେ ମୋତେ କାହାଣୀ କହୁଥିଲେ । ଗତ ସୋମବାର ତାଙ୍କ ଘରକୁ ଯାଇଥିବା ବରିଷ୍ଠ ସାମ୍ବାଦିକ ତଥା ଜାକିର ଖାନ ସୁଦର୍ଶନ କହିଛନ୍ତି, ସ୍ୱର୍ଗତ ମହାପାତ୍ର ଆହୁରି ୫ଟା ସିନେମା କରିବେ ବୋଲି କହୁଥିଲେ ।

ଏହା କଲା ପରେ ଯାଇ ଖୁସି ମିଳିବ ବୋଲି କହୁଥିଲେ, ଯାହା ଅଧୁରା ରହିଗଲା ।

ଲୋକାଲ ୱାୟାର