ଚାନ୍ଦିପୁର ବେଳାଭୂମିରେ ସଫେଇ କଲେ ଛାତ୍ରଛାତ୍ରୀ, ବୁଦ୍ଧିଜୀବୀ ଓ ଲୋକପ୍ରତିନିଧି

ବାଲେଶ୍ବର, ଡିସେମ୍ବର ୨୩ (ଲୋକାଲ ୱାୟାର): ପର୍ଯ୍ୟଟନ ଋତୁରେ ସ୍କୁଲ୍ କଲେଜ ଛାତ୍ରଛାତ୍ରୀଙ୍କ ସମେତ ବୁଦ୍ଧିଜୀବୀ, ସ୍ବେଚ୍ଛାସେବୀ ଓ ସ୍ଥାନୀୟ ଲୋକପ୍ରତିନିଧିମାନେ ଏକାଠି ହୋଇ ଚାନ୍ଦିପୁର ବେଳାଭୂମିରେ ସଫେଇ କାର୍ଯ୍ୟ କରିଛନ୍ତି।

ବାଲେଶ୍ବର ଜିଲ୍ଲା ପ୍ରଶାସନ ଓ ହୋଟେଲ ସଂଘର ସହଯୋଗରେ ରବିବାର ଶତାଧିକ ଲୋକ ବେଳାଭୂମିର ପ୍ରାୟ ପାଞ୍ଚ କିଲୋମିଟର ଯାଏ ସଫେଇ କରିଥିଲେ।

ଏହି ସଫେଇ କାର୍ଯ୍ୟରେ ୧୪ଟି ସ୍କୁଲ ଓ କଲେଜର ପ୍ରାୟ ୧୦୭୦ ଜଣ ଛାତ୍ରଛାତ୍ରୀ ଏଥିରେ ସାମିଲ ହୋଇଥିଲେ।

କେବଳ ବେଳାଭୂମି ନୁହେଁ, ପରିବେଶକୁ ସବୁଜ ଓ ସ୍ବଚ୍ଛ କରି ରଖିବା ଆମ ସମସ୍ତଙ୍କର କର୍ତ୍ତବ୍ୟ ବୋଲି ଏହି ଅବସରରେ ବାଲେଶ୍ବର ଜିଲ୍ଲାପାଳ କେ. ସୁଦର୍ଶନ ଚକ୍ରବର୍ତ୍ତୀ କହିଛନ୍ତି।

ବାଲେଶ୍ବର ଏସ୍.ପି. ବି. ଯୁଗଳ କିଶୋର, ଅତିରିକ୍ତ ଜିଲ୍ଲାପାଳ ସମ୍ବିତ ନାୟକ, ଡି.ଆର୍.ଡି.ଏ. ପ୍ରକଳ୍ପ ନିର୍ଦ୍ଦେଶକ ରାମଚନ୍ଦ୍ର ଜେନା, ଜିଲ୍ଲା ପର୍ଯ୍ୟଟନ ଅଧିକାରୀ ଗଗନ ସାହୁ ଓ କ୍ରୀଡ଼ା ଅଧିକାରୀ ପୂର୍ଣ୍ଣଚନ୍ଦ୍ର ଜେନା ପ୍ରମୁଖ ମଧ୍ୟ ସଫେଇ କାର୍ଯ୍ୟକ୍ରମରେ ସାମିଲ ହୋଇଥିଲେ।

ଲୋକାଲ ୱାୟାର