ଚିିଲିକାର ଜୈବ ବିବିଧତା ସର୍ବେକ୍ଷଣ, ଦୃଶ୍ୟ ହେଲେ ୧୫୬ ଇରାୱାଡି ଡଲଫିନ୍

ଭୁବନେଶ୍ୱର,ଜାନୁଆରୀ ୧୫(ଲୋକାଲ ୱାୟାର): ଚିଲିକାର ଜୈବବିବିଧତାକୁ ଆକଳନ କରିବା ପାଇଁ ଚିଲିକା ବିକାଶ କର୍ତ୍ତୃପକ୍ଷଙ୍କ ଦ୍ୱାରା ଶୁକ୍ରବାର ଚିଲିକାର ସର୍ବେକ୍ଷଣ କରାଯାଇଛି ।

ଚଳିତ ବର୍ଷ ଚିଲିକା ସର୍ବେକ୍ଷଣ ପାଇଁ ୧୮ଟି ଦଳ ଗଠନ କରାଯାଇଥିବା ବେଳେ ଏଥିରେ ୧୦୦ ଜଣ ଅଧିକାରୀ ସାମିଲ ହୋଇଥିଲେ ।

ସକାଳ ୬ରୁ ଦିନ ୧୨ଟା ଯାଏଁ ଏହି ସର୍ବେକ୍ଷଣ ଚାଲିଥିଲା । ଯେଉଁଥିରେ ସରକାରୀ ଅଧିକାରୀ ଓ ଚିଲିକା ଉନ୍ନୟନ କର୍ତ୍ତୃପକ୍ଷ ସାମିଲ ହୋଇଥିଲେ ।

ଟ୍ରାନ୍ସଆକ୍ଟ ସର୍ଭେ ପଦ୍ଧତିରେ କରାଯାଇଥିବା ଏହି ସର୍ବେକ୍ଷଣ ସାଧାରଣତଃ ଜଳଚର ଜୀବମାନଙ୍କ ସର୍ବେକ୍ଷଣ ପାଇଁ ବ୍ୟବହାର କରାଯାଇଥାଏ ।

ଆଜିର ସର୍ବେକ୍ଷଣରେ ପ୍ରତି ଦଳକୁ ବିଭାଗ ତରଫରୁ ବାଇନାକୁଲର, ଜିପିଏସ୍, ରେଞ୍ଜ ଫାଇଣ୍ଡର ଓ ତଥ୍ୟ ସଂଗ୍ରହ ସିଟ୍ ଆଦି ପ୍ରଦାନ କରାଯାଇଥିଲା ।

ଏହି ସର୍ବେକ୍ଷଣରେ ଇରାୱାଡି ଡଲଫିନର ଆକଳନ କରାଯାଇଛି । ଯଦିଓ ରବିବାର ଏନେଇ ସ୍ୱତନ୍ତ୍ର ଗଣନା ହେବ ତଥାପି ଆଜିର ଚିଲିକା ସର୍ବେକ୍ଷଣ ସମୟରେ ଦଳ ୧୫୬ଟି ଇରାୱାଡି ଡଲଫିନକୁ ଦେଖିବାକୁ ପାଇଛନ୍ତି ।

୨୦୦୩ ମସିହାରେ ପ୍ରଥମ ଥର ପାଇଁ ଚିଲିକାରେ ଇରାୱାଡି ଡଲଫିନ୍ ଗଣନା ହୋଇଥିଲା ।

୨୦୧୩ରେ ଜଙ୍ଗଲ ବିଭାଗ ଚିଲିକାରୁ ୧୫୨ଟି ଇରାୱାଡି ଡଲଫିନ୍ ପାଇଥିବା ବେଳେ ୨୦୧୪ରେ ୧୫୮,୨୦୧୫ରେ ୧୬୦, ୨୦୧୭ରେ ୧୨୧, ୨୦୧୮ରେ ୧୫୫, ୨୦୧୯ରେ ୧୫୦ ଓ ୨୦୨୦ରେ ୧୫୬ଟି ଡଲଫିନ୍ ମିଳିଥିବା ଜଣାଯାଇଛି ।

ଜଙ୍ଗଲ ବିଭାଗ ଦ୍ୱାରା ପରିଚାଳିତ ରାଜ୍ୟ ବନ୍ୟଜନ୍ତୁ ୱିଙ୍ଗ୍ ଓ ଚିଲିକା ଉନ୍ନୟନ କର୍ତ୍ତୃପକ୍ଷଙ୍କ ମିଳିତ ସହଯୋଗରେ ଚିଲିକାରେ ଇରାୱାଡି ଡଲଫିନ୍ ସଂରକ୍ଷଣ ପାଇଁ ଅନେକ ପଦକ୍ଷେପ ଗ୍ରହଣ କରାଯାଇଛି ।

ଡଲଫିନମାନଙ୍କ ପରିଚାଳନାକୁ ସୁରକ୍ଷିତ କରିବା ପାଇଁ ପୂର୍ବରୁ ଚିଲିକା ଭିତରେ ଡଲଫିନ୍ ରହୁଥିବା ସ୍ଥାନକୁ ଚିହ୍ନଟ କରାଯାଇ ପାରିଛି ।

ଡଲଫିନ୍ ଦେଖିବାର ନିୟମ ବି ପ୍ରଣୟନ ହେବା ସହ ଏଦିଗରେ ବୋଟ ମାଲିକମାନଙ୍କୁ ସଚେତନ କରାଯାଇଛି ।

ମଗରମୁଖ ଚ୍ୟାନେଲ୍ ଡଲଫିନମାନଙ୍କ କରିଡର ଥିବା ବେଳେ ଏହି ରାସ୍ତାରେ ସେମାନେ ସୁରକ୍ଷିତ ଭାବେ ବିଚରଣ କରିଥାନ୍ତି ।

ସେହିପରି ଆଜିର ସର୍ବେକ୍ଷଣରେ ଚିଲିକା ଉନ୍ନୟନ କର୍ତ୍ତୃପକ୍ଷଙ୍କୁ ଏକ ନିୟୁତରୁ ଅଧିକ ପକ୍ଷୀଙ୍କୁ ଦେଖିବାକୁ ମିଳିଛି ।

ସେହିପରି ଚିଲିକାରେ ଅଳ୍ପ କିଛି ଘେରି ପୁଣିଥରେ ଆରମ୍ଭ ହୋଇଥିବା ସର୍ବେକ୍ଷଣ ବେଳେ ଜଣାଯାଇଛି ।

ଏହାକୁ ଉଚ୍ଛେଦ କରିବା ପାଇଁ ଖୁବ୍ ଶୀଘ୍ର ଜିଲ୍ଲା ପ୍ରଶାସନ ସହାୟତାରେ ପଦକ୍ଷେପ ନିଆଯିବ ।

ଲୋକାଲ ୱାୟାର