ଛାତ୍ରଙ୍କୁ ମାଡ ମାରି ଟ୍ୟୁସନ ଶିକ୍ଷକ ଗିରଫ

କେନ୍ଦ୍ରାପଡ଼ା, ମାର୍ଚ୍ଚ ୧୫ (ଲୋକାଲ ୱାୟାର): ତୃତୀୟ ଶ୍ରେଣୀ ଛାତ୍ରଙ୍କୁ ମାଡ଼ ମାରିବା ଅଭିଯୋଗରେ ମାର୍ଶାଘାଇ ପୁଲିସ ରବିବାର ଜଣେ ଟ୍ୟୁସନ ଶିକ୍ଷକଙ୍କୁ ଗିରଫ କରିଛି ।

ମାର୍ଶାଘାଇ ଥାନା ଅନ୍ତର୍ଗତ ପୁରୁଷୋତ୍ତମପୁର ଗାଁର ଜଣେ ତୃତୀୟ ଶ୍ରେଣୀ ଛାତ୍ର ଟ୍ୟୁସନରେ କିଛି ପ୍ରଶ୍ନର ଉତ୍ତର ଦେଇ ନପାରିବାରୁ ଟୁ୍ୟସନ ଶିକ୍ଷକ ତାଙ୍କୁ ପ୍ରବଳ ମାଡ଼ ମାରିଥିଲେ ।

ଛାତ୍ରଙ୍କ ବାପା ଏ ନେଇ ଟ୍ୟୁସନ ମାର୍ଶାଘାଇ ଥାନାରେ ଶିକ୍ଷକଙ୍କ ବିରୋଧରେ ଏଫଆଇଆର ଦେଇଥିଲେ ।

ଏଫଆଇଆରକୁ ଭିତ୍ତି କରି ପୁଲିସ ଟୁ୍ୟସନ ଶିକ୍ଷକଙ୍କୁ ଗିରଫ କରିଛି । ତାଙ୍କ ବିରୋଧରେ ଆଇପିସିର ଧାରା ୨୯୪, ୩୨୫ ଓ ୫୦୬ ରୁଜୁ କରାଯାଇଛି ।

ସୋମବାର ଗିରଫ ଶିକ୍ଷକଙ୍କୁ ଅଦାଲତରେ ହାଜର କରାଯାଇଥିଲା । ଅଦାଲତ ତାଙ୍କ ଜାମିନ ନାମଞ୍ଜୁର କରି ଜେଲକୁ ପଠାଇ ଦେଇଛନ୍ତି ।

ପୁଲିସ ତଦନ୍ତ ଜାରି ରହିଛି । ଆହତ ଛାତ୍ର ଏବେ କେନ୍ଦ୍ରାପଡ଼ା ଜିଲ୍ଲା ଡାକ୍ତରଖାନାରେ ଚିକିତ୍ସିତ ହେଉଛି ବୋଲି ମାର୍ଶାଘାଇ ଥାନା ଆଇଆଇସି କାଳିନ୍ଦୀ ବେହେରା କହିଛନ୍ତି ।

ପୂର୍ବରୁ ମଧ୍ୟ ଟ୍ୟୁସନ ଶିକ୍ଷକ ଜଣକ ପ୍ରଶ୍ନର ଉତ୍ତର ଦେଇ ପାରୁନଥିବା ପିଲାଙ୍କୁ ଏପରି ମାଡ଼ ମାରୁଥିଲେ ବୋଲି ଆହତ ଛାତ୍ରଙ୍କ ବାପା ଅଭିଯୋଗ କରିଛନ୍ତି ।

ସ୍କୁଲ ଓ ଅନ୍ୟ ସ୍ଥାନରେ ମାଡ ଯୋଗୁଁ ପିଲାମାନେ ଶାରୀରିକ ଓ ମାନସିକ ଆଘାତ ପାଇଥାନ୍ତି ।

ଏହା ସେମାନଙ୍କ ପାଠପଢାକୁ ପ୍ରଭାବିତ କରିଥାଏ ଓ ସେମାନେ ସ୍କୁଲ ଯିବା ବନ୍ଦ କରି ଦେଇଥାନ୍ତି ବୋଲି କେନ୍ଦ୍ରାପଡ଼ାର ସମାଜସେବୀ ବିରଜା ପତି କହିଛନ୍ତି ।

ଲୋକାଲ ୱାୟାର