ଜଗତସିଂହପୁରରେ ସ୍ଥଳ ସେନା ଉପମୁଖ୍ୟ

ଜଗତସିଂହପୁର, ଜାନୁଆରୀ ୨୧(ଲୋକାଲ ୱାୟାର): ଭାରତୀୟ ସେନା ଉପମୁଖ୍ୟ ଲେଫ୍ଟନାଣ୍ଟ ଜେନେରାଲ ଚଣ୍ଡିପ୍ରସାଦ ମହାନ୍ତି ଜଗତସିଂହପୁର ମୁ୍ୟନିସିପାଲିଟି ଅନ୍ତର୍ଗତ ପୈତୃକ ଗାଁ ଜୟବଡ଼ ଆସିଥିବା ଅବସରରେ ସ୍ଥାନୀୟ ବିଧାୟକ, ଜିଲ୍ଲାପାଳ, ବନ୍ଧୁମାନଙ୍କୁ ଭେଟି ଥିଲେ । ଏହି ଅବସରରେ ସେ ମା’ ସାରଳାଙ୍କ ମନ୍ଦିରକୁ ଯାଇ ପୂଜାର୍ଚ୍ଚନା କରିଥିଲେ ।

ଲେଫ୍ଟନାଂଟ ଜେନେରାଲ ମହାନ୍ତି ସେନା ଉପମୁଖ୍ୟ ନିଯୁକ୍ତ ହେବା ପରେ ଜୟବଡ଼ ଗାଁରେ ଆନନ୍ଦର ଲହରୀ ଖେଳିଯାଇଛି । ସେ ଜାନୁଆରୀ ୩୧ରେ ଦାୟିତ୍ୱ ଗ୍ରହଣ କରିବେ ।

ଗାଁରେ ପହଁଚି ବେଶ ଖୁସି ଅଛି । ବାପା, ମାଙ୍କ ଆଶୀର୍ବାଦ ଯୋଗୁଁ ଏହା ସମ୍ଭବ ହୋଇଛି । ମା ବଂଚିଥିଲେ ସେ ଖୁବ ଖୁସି ହୋଇଥାନ୍ତେ ।

ଗାଁଲୋକ, ବନ୍ଧୁମାନଙ୍କ ସହ ପିଲାଦିନର କଥା ମନେ ପକାଇ ବେଶ ଖୁସି ଲାଗିଲା ବୋଲି କହିଛନ୍ତି ଲେଫ୍ଟନାଣ୍ଟ ଜେନେରାଲ ମହାନ୍ତି ।

ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ଲେଫ୍ଟନାଂଟ ଜେନେରାଲ ମହାନ୍ତିଙ୍କୁ ଶୁଭେଚ୍ଛା ଜଣାଇବା ସହ ଦାୟିତ୍ୱ ନେବା ପରେ ଆଉ ଥରେ ଜିଲ୍ଲାକୁ ଆସିବା ପାଇଁ ଆମନ୍ତ୍ରଣ ଜଣାଇଥିଲେ ।

ଚଣ୍ଡି ପ୍ରସାଦଙ୍କ ପାଇଁ ଜୟବଡ଼ ଗାଁ ଗର୍ବିତ । ଗାଁ ସହ ସେ ବରାବର ସମ୍ପର୍କ ରଖି ଆସିଛନ୍ତି ।

ସେ ଓ ତାଙ୍କ ପରିବାର ପ୍ରତିବର୍ଷ ଗାଁକୁ ଆସନ୍ତି ବୋଲି ପଡ଼ୋଶୀ ଅମ୍ବିକା ପ୍ରସାଦ ମହାନ୍ତି କହିଛନ୍ତି ।

ଜଗତସିଂହପୁର ମୁ୍ୟନିସିପାଲିଟି ଅନ୍ତର୍ଗତ ଜୟବଡ ଗାଁରେ ଲେଫ୍ଟନାଂଟ ଜେନେରାଲ ଚଣ୍ଡିପ୍ରସାଦ ମହାନ୍ତି ଜନ୍ମ ହୋଇଥିଲେ ।

ତାଙ୍କ ବାପା ଜିତେନ୍ଦ୍ର କିଶୋର ମହାନ୍ତି ସରକାରୀ କର୍ମଚାରୀ ଥିବା ବେଳେ ମା ସାରଦା କୁମାରୀ ମହାନ୍ତି ଏସଭିଏମ କଲେଜର ଓଡିଆ ଅଧ୍ୟାପିକା ଥିଲେ ।

ଭାଇ କାଳିପ୍ରସାଦ ମହାନ୍ତି ପାନିପଥ ରିଫାଇନାରୀରେ ମହାପ୍ରବନ୍ଧକ ଭାବେ କାର୍ଯ୍ୟରତ ଥିବା ବେଳେ ଆଉ ଜଣେ ଭାଇ ଦେବୀ ପ୍ରସାଦ ମହାନ୍ତି ଆଡଭୋକେଟ ଭାବେ କାମ କରୁଛନ୍ତି ।

ଚଣ୍ଡିପ୍ରସାଦ ସ୍ଥାନୀୟ ପ୍ରାକ୍ଟିସିଂ ପ୍ରାଥମିକ ବିଦ୍ୟାଳୟ ଓ ବାଗସାହି ୟୁପି ସ୍କୁଲର ପଢ଼ିବା ପରେ ସୈନିକ ସ୍କୁଲରେ ନାମ ଲେଖାଇଥିଲେ ।

ପରେ ନ୍ୟାସନାଲ ଡିଫେନ୍ସ ଏକାଡେମୀରୁ ପାସ କରି ସେକେଣ୍ଡ ଲେଫ୍ଟନାଣ୍ଟ ଭାବେ ଭାରତୀୟ ସେନାରେ ଯୋଗ ଦେଇଥିଲେ ।

ଲୋକାଲ ୱାୟାର