ଜଗତସିଂହପୁର ଜିଲ୍ଲାରେ ସ୍ୱଚ୍ଛ ଭାରତ ମିଶନ ବାଟବଣା

ଜଗତସିଂହପୁର, ଜାନୁଆରୀ ୨୪ (ଲୋକାଲ ୱାୟାର): ସ୍ୱଚ୍ଛ ଭାରତ ମିଶନରେ ହିତାଧିକାରୀଙ୍କୁ ଶୌଚାଳୟ ମିଳିନଥିଲେ ମଧ୍ୟ ପଂଚାୟତିରାଜ ଓ ପାନୀୟ ଜଳ ବିଭାଗ ଜଗତସିଂହପୁର ଜିଲ୍ଲାର ବହୁ ଗାଁକୁ ଖୋଲା ମଳତ୍ୟାଗ ମୁକ୍ତ (ଓଡିଏଫ) ଘୋଷଣା କରିଛନ୍ତି ।

ସ୍ୱଚ୍ଛ ଭାରତ ମିଶନ ଅନୁଯାୟୀ ଶୌଚାଳୟ ନିର୍ମାଣ ପାଇଁ ପ୍ରତି ହିତାଧିକାରୀଙ୍କୁ ୧୨ ହଜାର ଟଙ୍କା ଲେଖାଏଁ ସହାୟତା ପ୍ରଦାନ କରା ଯାଉଥିଲା । ଅକ୍ଟୋବର ୨, ୨୦୧୯ ଯାଏଁ ଏହି ମିଶନ ଜାରି ଥିଲା ।

ତେବେ ତଳପଦା ଗାଁର ଜଗବନ୍ଧୁ ସ୍ୱାଇଁ, ଅଲେଖ ସାହୁ, ବୃନ୍ଦାବନ ସ୍ୱାଇଁ ପ୍ରମୁଖ ଗତମାସରେ କୁଜଙ୍ଗ ବିଡିଓଙ୍କୁ ଭେଟି ୨୦୧୮-୧୯ରେ ଶୌଚାଳୟ ନପାଇ ମଧ୍ୟ ସେମାନଙ୍କ ନାମରେ ଅନୁଦାନ ଉଠାଯାଇଥିବା ଅଭିଯୋଗ କରିଥିଲେ ।

୨୦୧୮-୧୯ ଓ ୧୯-୨୦ ଆର୍ଥିକ ବର୍ଷରେ ମିଥ୍ୟା ବିଲ ଦ୍ୱାରା ୫ ଶହରୁ ଅଧିକ ହିତାଧିକାରୀଙ୍କ ଅର୍ଥ ହରିଲୁଟ ହୋଇଥିବା ସେମାନେ ଅଭିଯୋଗ କରିଥିଲେ ।

ସେହିପରି ୨ ହଜାର ଟଙ୍କା ଲାଞ୍ଚ ଦେବା ପରେ ମିଳିଥିବା ଶୌଚାଳୟ ଅଧା ନିର୍ମିତ ହୋଇ ପଡିଥିବାରୁ ବାଧ୍ୟ ହୋଇ ବାହାରେ ମଳତ୍ୟାଗ କରୁଛୁ ବୋଲି ତଳପଦା ଗାଁର ଦୁଇ ମହିଳା କହିଥିଲେ ।

ଅନଲାଇନରୁ ମିଳିଥିବା ତଥ୍ୟ ଅନୁଯାୟୀ ଗତ ୨୦୧୮-୧୯ ଓ ୨୦୧୯-୨୦ରେ ଅନୁଦାନ ପାଇଥିବା ଶହ ଶହ ହିତାଧିକାରୀ ଏଯାଏଁ ଶୌଚାଳୟ ପାଇନାହାନ୍ତି ବୋଲି ତଳପଦାର ପୂର୍ବତନ ସରପଞ୍ଚ ଆଶୁତୋଷ ଲେଙ୍କା କହିଛନ୍ତି ।

ହିତାଧିକାରୀ ଚୟନରେ ହୋଇଥିବା ତ୍ରୁଟିକୁ କୁଜଙ୍ଗ ବିଡିଓ ଅମୀୟ ପଣ୍ଡା ସ୍ୱୀକାର କରିଥିବା ବେଳେ ଏହାକୁ ସୁଧାରିବାକୁ ଉଦ୍ୟମ ଜାରି ରହିଥିବା କହିଛନ୍ତି ।

ଢିଙ୍କିଆ ପଞ୍ଚାୟତ ଅନ୍ତର୍ଗତ ଗୋବିନ୍ଦପୁର ଗ୍ରାମବାସୀମାନେ ମଧ୍ୟ ଶୌଚାଳୟ ପାଇନଥିବା ଅଭିଯୋଗ କରିଛନ୍ତି ।

ପଂଚାୟତର ୨୪୭୫ ପରିବାର ରହୁଥିବା ବେଳେ ମାତ୍ର ୬୨୦ଟି ଶୌଚାଳୟ ନିର୍ମିତ ହୋଇଥିବା ଢିଙ୍କିଆ ସରପଞ୍ଚ କିଶୋର ପରିଡା କହିଛନ୍ତି ।

ଜିଲ୍ଲାର ୧୯୮ ପଂଚାୟତ ଓ ୧୨୧୯ ଗାଁରେ ୨.୬୧ ଲକ୍ଷ ଶୌଚାଳୟ ନିର୍ମିତ ହୋଇଛି ।

ବାଦ ପଡ଼ିଥିବା ହିତାଧିକାରୀମାନେ ସ୍ୱଚ୍ଛ ଭାରତ ମିଶନରେ ଆବେଦନ କରିନଥିବା କହିଛନ୍ତି ପଂଚାୟତିରାଜ ଓ ପାନୀୟ ଜଳ ବିଭାଗର ଜଣେ ବରିଷ୍ଠ ଅଧିକାରୀ ।

ଲୋକାଲ ୱାୟାର