ଜନରାଜ୍ୟ ଦିବସରେ ପ୍ରଦର୍ଶିତ ହେବ ଓଡ଼ିଶାର ପ୍ରଜ୍ଞାପନ ମେଢ଼

ଭୁବନେଶ୍ୱର, ଡିସେମ୍ବର ୨୫(ଲୋକାଲ ୱାୟାର): ନୂଆଦିଲ୍ଲୀରେ ଜନରାଜ୍ୟ ଦିବସରେ ଓଡ଼ିଶାର ପ୍ରଜ୍ଞାପନ ମେଢ଼ ଭାବେ ରୁକୁଣା ରଥ ପ୍ରଦର୍ଶନ ହେବ ବୋଲି ସୂଚନା ମିଳିଛି ।

ପ୍ରତିବର୍ଷ କେନ୍ଦ୍ର ସରକାରଙ୍କ ପକ୍ଷରୁ ସମସ୍ତ ରାଜ୍ୟକୁ ଜନରାଜ୍ୟ ଦିବସରେ ପ୍ରଜ୍ଞାପନ ମେଢ଼ ପ୍ରଦର୍ଶନ ନିମନ୍ତେ ପ୍ରସ୍ତାବ ଆହ୍ୱାନ କରାଯାଇଥାଏ ।

ତନ୍ମଧ୍ୟରୁ ଅତ୍ୟନ୍ତ ଉଚ୍ଚକୋଟୀର ପ୍ରଜ୍ଞାପନ ମେଢ଼ଗୁଡ଼ିକ ଜନରାଜ୍ୟ ଦିବସ ପରେଡରେ ସ୍ଥାନିତ ହୋଇଥାଏ । ଚଳିତ ବର୍ଷ ଦେଶର ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳକୁ ପ୍ରସ୍ତାବ ଦିଆଯାଇଥିଲା ।

ସେଥିରୁ ୧୬ଟି ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ପ୍ରଜ୍ଞାପନ ମେଢ଼ ଯୋଗ୍ୟ ବିବେଚିତ ହୋଇଛି ।

ଖୁସିର କଥା ସେଥିରେ ଓଡ଼ିଶାର ପ୍ରଜ୍ଞାପନ ମେଢ଼ ସ୍ଥାନିତ ହୋଇଛି ।

ପ୍ରତିରକ୍ଷା ବିଭାଗ ପକ୍ଷରୁ ଜାରି କରାଯାଇଥିବା ୬ଟି ବିଷୟବସ୍ତୁ ମଧ୍ୟରୁ ଓଡ଼ିଶା ସରକାରଙ୍କ ଦ୍ୱାରା ପ୍ରସ୍ତୁତ ‘ଓଡ଼ିଶାର ସ୍ଥାପତ୍ୟ ଓ ଲୋକ ସଂସ୍କୃତି ଉପରେ ଆଧାରିତ ପର୍ବ’ ଡିଜାଇନଟି ଜାତୀୟସ୍ତରର ବିଚାରକ ମଣ୍ଡଳୀଙ୍କୁ ଆକୃଷ୍ଟ କରିଥିଲା ।

୫ଟି ପର୍ଯ୍ୟାୟରେ ୧୬ଜଣିଆ କମିଟି ଦ୍ୱାରା ମେଢ଼ର ଡିଜାଇନ୍ ଚୟନ କରାଯାଇଛି । ରାଜ୍ୟ ସୂଚନା ଓ ଲୋକସମ୍ପର୍କ ବିଭାଗ ତରଫରୁ ୫ଜଣ ଚିତ୍ରଶିଳ୍ପୀଙ୍କଠାରୁ ୧୫ଟି ଡିଜାଇନ୍ ଯାଇଥିଲା ।

ସେଥିରୁ ଓଡ଼ିଶା ପ୍ରସିଦ୍ଧ ଶିଳ୍ପୀ ଗଜେନ୍ଦ୍ର ପ୍ରସାଦ ସାହୁଙ୍କ ଡିଜାଇନ୍ ମନୋନୀତ ହୋଇଛି । ଚତୁର୍ଥ ଥର ପାଇଁ ଶ୍ରୀ ସାହୁ ଏହି ମେଢ଼ କରିବାର ରେକର୍ଡ କରିବେ ।

ପୂର୍ବରୁ ସେ ତିନି ଥର ଅର୍ଥାତ୍ ୨୦୦୯, ୨୦୧୬, ୨୦୧୭ରେ ମେଢ଼ ତିଆରି କରି ଜାତୀୟସ୍ତରରେ ସମସ୍ତଙ୍କ ଦୃଷ୍ଟି ଆକର୍ଷଣ କରି ଆସିଛନ୍ତି ।

ଶ୍ରୀ ସାହୁ କହିଛନ୍ତି, ମେଢ଼ରେ ଓଡ଼ିଶାର ସ୍ଥାପତ୍ୟର ନିଦର୍ଶନ ଶ୍ରୀଲିଙ୍ଗରାଜ ମନ୍ଦିର ସହ ଅଶୋକାଷ୍ଟମୀରେ ଅନୁଷ୍ଠିତ ହେଉଥିବା ରୁକୁଣା ରଥକୁ ପ୍ରଦର୍ଶନ କରାଯିବ ।

ବିଶ୍ୱ ପ୍ରସିଦ୍ଧ ପଥର କାରୁକାର୍ଯ୍ୟ ସହ ଓଡ଼ିଶାର ବିଭିନ୍ନ ପର୍ବପର୍ବାଣୀର ପ୍ରତିଫଳନ ଦେଖିବାକୁ ମିଳିବ । ମେଢ଼ ଉପରେ ୮ଜଣ ନୃତ୍ୟଶିଳ୍ପୀ ଓଡ଼ିଶୀ ନୃତ୍ୟ ପରିବେଷଣ କରିବେ ।

ମେଢ଼ ତଳେ ଦୁଇପାଶ୍ୱର୍ରେ ୨୦ଜଣ ନୃତ୍ୟଶିଳ୍ପୀ ନୃତ୍ୟ ପରିବେଷଣ କରିବେ । ଏହାର ପରିକଳ୍ପନା ମୋର ନିଜସ୍ୱ ଥିବାବେଳେ ତାକୁ ରୂପରେଖ ଦେଇଛନ୍ତି ଛତ୍ରପତି ବିଶ୍ୱାଳ ଏବଂ ତପନ ମହାରଣା ।

ସେଥିରେ ଯେଉଁ ଓଡ଼ିଶୀ ଗୀତ ସଂଯୋଜନା କରାଯାଇଛି ତା’ର ନିର୍ଦ୍ଦେଶନା ଗୁରୁ ଧନେଶ୍ୱର ସ୍ୱାଇଁ ଏବଂ ଅଜୟ ଚୌଧୁରୀ ଦେଇଛନ୍ତି । ଏଥିରେ କଣ୍ଠଦାନ ମୁଁ ନିଜେ କରିଛି ।

ଲୋକାଲ ୱାୟାର