ଜାଗା ମିଶନ୍ ପାଇଁ ଓଡ଼ିଶା ଓ ଟାଟା ଟ୍ରଷ୍ଟ ପୁରସ୍କୃତ, ମୁଖ୍ୟମନ୍ତ୍ରୀଙ୍କ ଶୁଭେଚ୍ଛା

ଭୁବନେଶ୍ୱର, ଡିସେମ୍ବର ୪(ଲୋକାଲ ୱାୟାର): ‘ଜାଗା ମିଶନ୍’ ଜରିଆରେ ସହରୀ ଗରିବଙ୍କୁ ଜମି ଯୋଗାଣରେ ସଫଳତା ପାଇଁ ହାଇଦ୍ରାବାଦରେ ଜିଓସ୍ମାର୍ଟ ମିଡିଆ ଆଣ୍ଡ କମ୍ୟୁନିକେସନ୍ ଦ୍ୱାରା ଆୟୋଜିତ ଦ ଇଣ୍ଡିଆ ଜିଓସ୍ପାଟିଆଲ୍ ଏକ୍ସିଲେନ୍ସ ଆୱାର୍ଡ଼ ଉତ୍ସବରେ ଓଡ଼ିଶା ଓ ଟାଟା ଟ୍ରଷ୍ଟକୁ ପୁରସ୍କାର ପ୍ରଦାନ କରାଯାଇଛି ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟୁଇଟ୍ କରି ରାଜ୍ୟ ଗୃହ ଓ ନଗର ଉନ୍ନୟନ ବିଭାଗକୁ ଏଥିପାଇଁ ଶୁଭେଚ୍ଛା ଜଣାଇଛନ୍ତି ।

ସେ କହିଛନ୍ତି, ଏହି ପୁରସ୍କାର ବସ୍ତିବାସିନ୍ଦାଙ୍କ ଜୀବନ ଶୈଳୀରେ ପରିବର୍ତ୍ତନର ସଂକଳ୍ପକୁ ଅଧିକ ମଜବୁତ କରିବ ।

ଏହି ପୁରସ୍କାର ପରିବେଶ, କୃଷି, ଖଣି ସନ୍ଧାନ, ପରିବହନ, ବିପର୍ଯ୍ୟୟ ପ୍ରଶମନ ପରିଚାଳନା, ସ୍ମାର୍ଟ ସିଟି, ଭିତ୍ତିଭୂମି ବିକାଶ, ସାଧାରଣ ନିରାପତ୍ତା, ଜରୁରୀକାଳୀନ ବ୍ୟବସ୍ଥା ପରିଚାଳନା, ଜମି ସୂଚନା, ଜଙ୍ଗଲ ଓ ଜଳ ସମ୍ପଦ ପରିଚାଳନା କ୍ଷେତ୍ରରେ ବୈଷୟିକ ଜ୍ଞାନ କୌଶଳ ବ୍ୟବହାର କରୁଥିବା ସଂସ୍ଥାକୁ ଦିଆଯାଏ ।

ଉଲ୍ଲେଖଯୋଗ୍ୟ, ରାଜ୍ୟରେ ଜାଗା ମିଶନରେ ଡ୍ରୋନ୍ ଦ୍ୱାରା ମାତ୍ର ୪ ମାସ ମଧ୍ୟରେ ୧୦୯ଟି ସହରର ୧୮୮୬ଟି ବସ୍ତିରେ ସର୍ଭେ କରାଯାଇପାରିଥିବା ନଗର ଉନ୍ନୟନ ବିଭାଗ ପକ୍ଷରୁ କୁହାଯାଇଛି ।

ଲୋକାଲ ୱାୟାର