ଜାନୁଆରୀ ୫ରୁ ଚିଲିକାରେ ପକ୍ଷୀ ଗଣନା

ଭୁବନେଶ୍ୱର, ଡିସେମ୍ବର ୧୧(ଲୋକାଲ ୱାୟାର): ଜାନୁଆରୀ ୫ରୁ ଚିଲିକାରେ ଆରମ୍ଭ ହେବ ପକ୍ଷୀ ଗଣନା । ଏଥିପାଇଁ ରାଜ୍ୟ ବନ୍ୟପ୍ରାଣୀ ବିଭାଗ ପ୍ରସ୍ତୁତି ଆରମ୍ଭ କରିଛି ।

କରୋନା ଯୋଗୁଁ ଚଳିତ ବର୍ଷ ପକ୍ଷୀ ଗଣନାରେ ମାତ୍ର ୧୦୦ ଲୋକ ସାମିଲ ହେବେ । ଯାହାକି ପୂର୍ବ ବର୍ଷଗୁଡ଼ିକ ତୁଳନାରେ ଯଥେଷ୍ଟ କମ ।

ଚଳିତ ବର୍ଷ ପରୋନା ଯୋଗୁଁ ପକ୍ଷୀଗଣନା କାମରେ ବେଶୀ ଲୋକ ସାମିଲ ହେବେନି ।

ଭାଗ ନେବାକୁ ଥିବା କର୍ମଚାରୀମାନଙ୍କ ସୁରକ୍ଷାକୁ ଆଖି ଆଗରେ ରଖି ବିଭାଗ ପକ୍ଷରୁ ମାସ୍କ ଓ ସାନିଟାଇଜର ବ୍ୟବସ୍ଥା କରାଯାଉଛି ।

ନିୟମିତ ବ୍ୟବଧାନରେ ସେମାନେ କିପରି ସାନିଟାଇଜ୍ ହୋଇ ପକ୍ଷୀ ଗଣନା କାମରେ ସାମିଲ ହେବେ ସେଥିପ୍ରତି ବିଭାଗ ନଜର ରଖିବ ।

ଚଳିତ ବର୍ଷ ୨୦ଟି ୟୁନିଟରେ ହେବ ପକ୍ଷୀ ଗଣନା କାମ । ପ୍ରତି ୟୁନିଟରେ ୪ ଜଣ ଲେଖାଏଁ କର୍ମଚାରୀ ରହି ଏହି କାମ କରିବେ ।

ସେଥିମଧ୍ୟରୁ ଟାଙ୍ଗୀ ରେଞ୍ଜରେ ୮ଟି ୟୁନିଟ୍, ବାଲୁଗାଁ ରେଞ୍ଜରେ ୬ଟି ୟୁନିଟ୍, ରମ୍ଭାରେ ଗୋଟିଏ ଚିଲିକାରେ ଗୋଟିଏ ଓ ସାତପଡ଼ାରେ ୨ଟି ୟୁନିଟ୍ କରାଯିବ ।

ଜାନୁଆରୀ ୫ ତାରିଖ ସକାଳ ୬ରୁ ଦିନ ୧୧ ଟା ଯାଏଁ ଏହି କାମ ଚାଲିବ । ଏଥିପାଇଁ ଜାନୁଆରୀ ୪ ତାରିଖ ଅଭିଜ୍ଞ ବିଶେଷଜ୍ଞଙ୍କ ଦ୍ୱାରା ଏକ ତାଲିମ କାର୍ଯ୍ୟକ୍ରମ ଆୟୋଜିତ ହେବ ବୋଲି ଅତିରିକ୍ତ ମୁଖ୍ୟ ବନ୍ୟ ସଂରକ୍ଷକ (ଏସିସିଏଫ୍) ଶରତ ମିଶ୍ର ସୂଚନା ଦେଇଛନ୍ତି ।

ଗତବର୍ଷ ଅପେକ୍ଷା ଚଳିତ ବର୍ଷ ସାମାନ୍ୟ ବିଳମ୍ବରେ ବିଦେଶାଗତ ପକ୍ଷୀଙ୍କ ଆଗମନ ହୋଇଥିଲେ ବି ବର୍ତ୍ତମାନ ସୁଦ୍ଧା ୪ ଲକ୍ଷ ୮୭ ହଜାର ପକ୍ଷୀ ଆସିଥିବା ବାଲୁଗାଁ ବନ୍ୟପ୍ରାଣୀ ଡିଭିଜନ୍ ସ୍ପଷ୍ଟ କରିଛି ।

ଚଳିତ ବର୍ଷ ଡିସେମ୍ବର ସୁଦ୍ଧା ନଳବଣରେ ୧ ଲକ୍ଷ ୯୮ ହଜାର ପକ୍ଷୀ ଆସିଥିବା ବେଳେ ମଙ୍ଗଳାଯୋଡ଼ି, ଭୂଷଣ୍ଡପୁର, ନଇରୀ, କାଳୁପଡା ଆଦି ୭ଟି ଗାଁରେ ଆଖାପାଖି ୨ ଲକ୍ଷ ୮୯ ହଜାର ପକ୍ଷୀ ଆସିଛନ୍ତି । ମଙ୍ଗଳାଯୋଡ଼ିରେ ସର୍ବାଧିକ ପକ୍ଷୀ ଆସିଥିବା ବେଳେ ୯୩ ପ୍ରଜାତିର ପକ୍ଷୀ ଆସିଥିବା ବନ ବିଭାଗ ଅଧିକାରୀ କହିଛନ୍ତି ।

ସେଥିମଧ୍ୟରୁ ଗଡୱାଲ, ବ୍ରାହ୍ମିନ ସେଲଡକ, ସୋଭଲର ଭଳି ପ୍ରଜାତି ସର୍ବାଧିକ ଅଛନ୍ତି ।

ଲୋକାଲ ୱାୟାର