ଜୁପିଟର କଲେଜରେ ଡିଗ୍ରୀ ଛାତ୍ରଛାତ୍ରୀଙ୍କୁ ବିଦାୟ ସମ୍ବର୍ଦ୍ଧନା

ଭୁବନେଶ୍ୱର, ମାର୍ଚ୍ଚ ୧୫(ଲୋକାଲ ୱାୟାର): ଭୁବନେଶ୍ୱରସ୍ଥିତ ଜୁପିଟର ଡିଗ୍ରୀ କଲେଜର ଶେଷ ବର୍ଷ ଛାତ୍ରଛାତ୍ରୀମାନଙ୍କର ବିଦାୟକାଳୀନ ଉତ୍ସବ କଲେଜ ଅଡିଟୋରିୟମରେ ଶୁକ୍ରବାର ଅନୁଷ୍ଠିତ ହୋଇଯାଇଛି ।

ପ୍ରଥମ ଓ ଦ୍ୱିତୀୟ ବର୍ଷର ଛାତ୍ରଛାତ୍ରୀମାନଙ୍କ ଦ୍ୱାରା ଆୟୋଜିତ ଏହି ଉତ୍ସବରେ କଲେଜ ଅଧ୍ୟକ୍ଷ ଡ. ବିକାଶ ରଞ୍ଜନ ଦେବ ପୌରହିତ୍ୟ କରିଥିଲେ । ବିଦାୟୀ ଛାତ୍ରଛାତ୍ରୀମାନେ ସେମାନଙ୍କ ଅଭିଜ୍ଞତା ବର୍ଣ୍ଣନା କରିବା ସହ କଲେଜରେ ହେଉଥିବା ପାଠପଢ଼ାର ପ୍ରଶଂସା କରିଥିଲେ ।

ଶିକ୍ଷକ ଶିକ୍ଷୟିତ୍ରୀମାନେ ଛାତ୍ରଛାତ୍ରୀଙ୍କ ଉଜ୍ୱଳ ଭବିଷ୍ୟତ କାମନା କରିବା ସହ ସେମାନଙ୍କୁ ଉପାଦେୟ ପରାମର୍ଶ ଦେଇଥିଲେ । ଶେଷରେ ଛାତ୍ରଛାତ୍ରୀଙ୍କ ଦ୍ୱାରା ମନୋରଞ୍ଜନ କାର୍ଯ୍ୟକ୍ରମ ପରିବେଷଣ କରାଯାଇଥିଲା ।

ଉତ୍ସବକୁ ସଂଯୋଜନା କରିଥିଲେ ପ୍ରାଣୀବିଜ୍ଞାନ ସମ୍ମାନର ଯୁକ୍ତ ତିନି ଦ୍ୱିତୀୟ ବର୍ଷର ଛାତ୍ରୀ କୁମାରୀ ସନ୍ତୋଷୀ ମୌସୁମୀ ମଲ୍ଲିକ । କଲେଜର ଉପାଧ୍ୟକ୍ଷ ଦୀପକ ତ୍ରିପାଠୀ ଏବଂ ସଂଯୋଜକ ସଞ୍ଜୟ କୁମାର ରାୟ ଉତ୍ସବରେ ଉପସ୍ଥିତି ରହି ଛାତ୍ରଛାତ୍ରୀଙ୍କୁ ପ୍ରୋତ୍ସାହିତ କରିଥିଲେ ।

ଲୋକାଲ ୱାୟାର