ଡଙ୍ଗାରୁ ଖସି ସମୁଦ୍ରରେ ମତ୍ସ୍ୟଜୀବୀ ନିଖୋଜ

କେନ୍ଦ୍ରାପରା, ଅକ୍ଟୋବର ୮(ଲୋକାଲ ୱାୟାର): ବୁଧବାର ଏକ ଯନ୍ତ୍ରଚାଳିତ ମାଛଧରା ବୋଟରୁ ସମୁଦ୍ରରେ ଖସିପଡ଼ି କେନ୍ଦ୍ରାପଡ଼ା ଜିଲ୍ଲାର ଜଣେ ମତ୍ସ୍ୟଜୀବୀ ନିଖୋଜ ଅଛନ୍ତି । ଘଟଣାଟି ଜମ୍ବୁ ସାମୁଦ୍ରିକ ଥାନା ଅଞ୍ଚଳରେ ଘଟିଛି ।

ମିଳିଥିବା ସୁଚନା ଅନୁସାରେ ସମୁଦ୍ର କୂଳିଆ ଗାଁ ପ୍ରଭାକରପୁରର ନିଶିକାନ୍ତ ବେହେରା (୩୨) ସମୁଦ୍ର ଭିତରକୁ ଯିବା ପାଇଁ ଏକ ଯନ୍ତ୍ରଚାଳିତ ମାଛଧରା ବୋଟରେ ବରଫ ଲୋଡ କରୁଥିବା ବେଳେ ସମୁଦ୍ର ଭିତରେ ନିଜ ଜେଟିରୁ ଖସି ପଡ଼ିଥିଲେ ।

ପରେ ତାଙ୍କର ଆଉ ପତ୍ତା ମିଳିନଥିଲା । ଏ ବାବଦରେ ଜମ୍ବୁ ସାମୁଦ୍ରିକ ପୁଲିସ ଥାନାର ଆଇଆଇସି ମହେଶ୍ୱର ସେଠୀ କହିଛନ୍ତି, ନିଖୋଜ ମତ୍ସ୍ୟଜୀବୀଙ୍କୁ ଖୋଜିବାକୁ ଆମେ ସବୁ ପ୍ରକାର ଚେଷ୍ଟା କରୁଛୁ । ଏହି କାମରେ ଆମକୁ ମତ୍ସ୍ୟ ବିଭାଗ ବି ସବୁ ପ୍ରକାର ସହାୟତା ଯୋଗାଇ ଦେଉଛି ।

ଏନେଇ ଆମେ ଡଙ୍ଗା ମାଲିକଙ୍କ ବିରୋଧରେ ଧାରା ୩୦୪ରେ ଏକ ମାମଲା ରୁଜୁ କରିଛୁ । ଅବହେଳାରୁ ମୃତୁ୍ୟ ହୋଇଥିବା ଆଧାରରେ ଏଭଳି ମାମଲା ରୁଜୁ କରାଯାିଥାଏ ।

ମତ୍ସ୍ୟଜୀବୀମାନେ ଡଙ୍ଗାରେ ଲାଇଫ୍ ଜ୍ୟାକେଟ୍ ପିନ୍ଧିବା ବାଧ୍ୟତାମୂଳକ ଥିବା ବେଳେ ସଂପୃକ୍ତ ମତ୍ସ୍ୟଜୀବୀ କୌଣସି ଲାଇଫ୍ ଜ୍ୟାକେଟ୍ ପିନ୍ଧିନଥିଲେ ।

ଏଥିପାଇଁ ଆମେ ମତ୍ସ୍ୟଜୀବୀ ଜାହାଜ ମାଲିକଙ୍କ ବିରୋଧରେ ଅପରାଧିକ ମାମଲା ପଞ୍ଜିକୃତ କରିଛୁ । ଖୁବ୍ ଶୀଘ୍ର ତାଙ୍କ ବିରୋଧରେ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

ପୂର୍ବରୁ ବିଭାଗୀୟ ଅଧିକାରୀମାନେ ଏନେଇ ମତ୍ସ୍ୟଜୀବୀ ଓ ଡଙ୍ଗା ମାଲିକଙ୍କୁ ବାରମ୍ବାର ସଚେତନ କରିଛନ୍ତି ।

ଏପରିକି ଅଣ ଅନୁମୋଦିତ ଜାହାଜ ଚଳାଚଳ ଉପରେ ବି ପ୍ରତିବନ୍ଧକ ରହିଛି । ଲାଇଫ୍ ଜ୍ୟାକେଟ୍ ବିନା ମତ୍ସ୍ୟଜୀବୀ ଡଙ୍ଗା ଚଳାଚଳ କରି ପାରିବେ ନାହିଁ ବୋଲି ନିଷେଧାଦେଶ ସତ୍ତ୍ୱେ ଏହି ନିୟମର ଉଲ୍ଲଂଘନ କରାଯାଇଛି ।

ତେଣୁ ଉଲ୍ଲଂଘନକାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଅଧିକାରୀ କହିଛନ୍ତି ।

ବିଭାଗୀୟ ଥାନାଧିକାରୀ ଆହୁରି କହିଛନ୍ତି, ମତ୍ସ୍ୟଜୀବୀ, ଡଙ୍ଗା ଓ ଟ୍ରଲରମାନଙ୍କୁ ଡଙ୍ଗାର କ୍ଷମତାଠାରୁ ଅଧିକ ଲୋକଙ୍କୁ ନ ନେବାକୁ ବି ବାରମ୍ବାର ତାଗିଦ୍ କରାଯାଇଛି ।

ତାଛଡା ବର୍ତ୍ତମାନ ପାଣିପାଗ ଭଳ ନଥିବାରୁ ଓ ଲଘୁଚାପ ସୃଷ୍ଟି ହୋଇଥିବାରୁ ସମୁଦ୍ର ଭିତରକୁ ନଯିବାକୁ ମତ୍ସ୍ୟଜୀବୀମାନଙ୍କୁ କୁହାଯାଇଛି ।

ହେଲେ ଅଧିକାରୀଙ୍କ ଆଦେଶକୁ ଅଣଦେଖା କରି ଅନେକ ମତ୍ସ୍ୟଜୀବୀ ସମୁଦ୍ର ଭିତରକୁ ଯାଇଥିବା ବେଳେ ଏହି ଦୁର୍ଘଟଣା ଘଟିଛି ।

ଏ ବାବଦରେ ଓଡ଼ିଶା ମତ୍ସ୍ୟଜୀବୀ ଫୋରମ୍ ସଭାପତି ନାରାୟଣ ହଲଦାର କହିଛନ୍ତି ଦୁର୍ଘଟଣା ଓ ଜୀବନ ହାନି ଏଠାକାର ଏକ ନିତିଦିନିଆ ଘଟଣା ।

ଏଠାରେ ଅନେକ ମତ୍ସ୍ୟଜୀବୀ ଅଛନ୍ତି ଯେଉଁମାନେ କି ତାଲିମ୍ ନେଇ ନାହାନ୍ତି । ଯୁବ ମତ୍ସ୍ୟଜୀବୀମାନଙ୍କର ଖାମଖିଆଲି ମନୋଭାବ ଯୋଗୁଁ ଏଭଳି ପରିସ୍ଥିତି ସୃଷ୍ଟି ହୋଇଛି ।

ଲୋକାଲ ୱାୟାର