ଡବଲ ମର୍ଡରକୁ ନେଇ ରାଜନୀତି; ପ୍ରତାପଙ୍କୁ ଘେରିଲା ବିଜେପି, ମନ୍ତ୍ରୀ କହିଲେ ତଦନ୍ତ ହେଉ

ଭୁବନେଶ୍ୱର, ଜାନୁଆରୀ ୪(ଲୋକାଲ ୱାୟାର): କଟକ ଜିଲ୍ଲା ମାହାଙ୍ଗାରେ ଦୁଇ ଦିନ ତଳେ ହୋଇଥିବା ଡବଲ ମର୍ଡର ଘଟଣାରେ ରାଜନୀତି ତେଜିବାରେ ଲାଗିଛି ।

ଏହି ଘଟଣାରେ ଆଇନ ମନ୍ତ୍ରୀ ତଥା ସ୍ଥାନୀୟ ବିଧାୟକ ପ୍ରତାପ ଜେନାଙ୍କୁ ବିରୋଧୀ ଦଳ କଂଗ୍ରେସ ଓ ବିଜେପି ଘେରିଥିବା ବେଳେ ଘଟଣାର ତଦନ୍ତ ପରେ ସବୁକିଛି ସ୍ପଷ୍ଟ ହୋଇଯିବ ବୋଲି କହିଛନ୍ତି ନିଜେ ମନ୍ତ୍ରୀ ପ୍ରତାପ ଜେନା ।

ଉଲ୍ଲେଖଯୋଗ୍ୟ, ଗତ ଶନିବାର ସନ୍ଧ୍ୟାରେ ବିଜେପି ନେତା ତଥା ମାହାଙ୍ଗା ବ୍ଲକର ପୂର୍ବତନ ଅଧ୍ୟକ୍ଷ କୁଳମଣି ବରାଳ ଏବଂ ତାଙ୍କର ଜନୈକ ସହଯୋଗୀ ଦିବ୍ୟସିଂହ ବରାଳ ଏକ ବାଇକରେ ଯାଉଥିବା ବେଳେ କେତେକ ଦୁର୍ବୃତ୍ତ ସେମାନଙ୍କୁ ଆକ୍ରମଣ କରିଥିଲେ ।

ଆକ୍ରମଣରେ ଉଭୟଙ୍କର ମୃତୁ୍ୟ ହୋଇଥିଲା । ଅଞ୍ଚଳରେ ହେଉଥିବା ଦୁର୍ନୀତିକୁ ବିରୋଧ କରିବାରୁ କୁଳମଣିଙ୍କୁ ମନ୍ତ୍ରୀ ପ୍ରତାପ ଜେନାଙ୍କ ସମର୍ଥକମାନେ ହତ୍ୟା କରିଥବା ବିଜେପି ନେତାମାନେ ଅଭିଯୋଗ କରିଛନ୍ତି ।

ଗତକାଲି ଥାନାରେ ମନ୍ତ୍ରୀଙ୍କ ସସମେତ ମୋଟ ୧୩ ଜଣଙ୍କ ନାମରେ ଏତଲା ହେବା ପରେ ମାମଲା ରୁଜୁ ହୋଇଛି ଏବଂ ତଦନ୍ତ ଚାଲିଥିବା କହିଛନ୍ତି କଟକ ଗ୍ରାମାଞ୍ଚଳ ଏସପି ବି. ଯୁଗଳ କିଶୋର ।

ଅପରପକ୍ଷରେ ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରିବା ଦାବିରେ ବିଜେପି ପକ୍ଷରୁ ଆଜି କଟକ ଜିଲ୍ଲାର ବିଭିନ୍ନ ବ୍ଲକ ଅଞ୍ଚଳରେ ବିକ୍ଷୋଭ କରାଯିବା ସହ ମନ୍ତ୍ରୀ ଶ୍ରୀ ଜେନାଙ୍କ କୁଶ ପୁତ୍ତଳିକା ଦାହ କରାଯାଇଛି ।

ଏହି ଡବଲ ମର୍ଡର ଘଟଣାକୁ ତୀବ୍ର ସମାଲୋଚନା କରିଛନ୍ତି ଭୁବନେଶ୍ୱରର ବିଜେପି ସାଂସଦ ଅପରାଜିତା ଷଡ଼ଙ୍ଗୀ ।

ସେ ସିଧାସଳଖ ମୁଖ୍ୟମନ୍ତ୍ରୀଙ୍କ ଦାୟିତ୍ୱରେ ଥିବା ଗୃହ ବିଭାଗକୁ ଟାର୍ଗେଟ କରିଛନ୍ତି । ପ୍ରଧାନମନ୍ତ୍ରୀ ଆବାସ ଯୋଜନା ଦୁର୍ନୀତି ଲୁଚାଇବାକୁ ଏହି ହତ୍ୟାକାଣ୍ଡ ହୋଇଛି ।

ସେ କହିଛନ୍ତି, ବିଗତ ଦିନରେ ମାହାଙ୍ଗା ଡବଲ ମର୍ଡରକୁ ମିଶାଇ ରାଜ୍ୟରେ ମୋଟ ୧୭ଟି ରାଜନୈତିକ ହତ୍ୟାକାଣ୍ଡ ହେଲାଣି ।

ସେଥିରୁ ୧୪ଟି କେବଳ ପଞ୍ଚାୟତ ନିର୍ବାଚନ ସମୟରେ ହୋଇଛି । ତାଙ୍କ ନିର୍ବାଚନମଣ୍ଡଳୀରେ ସାଧାରଣ ନିର୍ବାଚନ ସମୟରେ ମଧ୍ୟ ଗୋଟିଏ ରାଜନୈତିକ ହତ୍ୟାକାଣ୍ଡ ହୋଇଛି ।

ରାଜ୍ୟ ସରକାର ହତ୍ୟା ଘଟଣା ଗୁଡ଼ିକର ଚାର୍ଜସିଟ ଦେବାରେ ଏବଂ ଦୋଷୀଙ୍କୁ ଦଣ୍ଡ ଦେବାରେ ବିଫଳ ହୋଇଛି ।

ଆସନ୍ତା ୧୫ ଦିନରେ ସେ ପ୍ରତ୍ୟେକ ଥାନାକୁ ଯାଇ ରାଜନୈତିକ ହତ୍ୟାକାଣ୍ଡ ଗୁଡ଼ିକର ତଦନ୍ତ ସ୍ଥିତି କ’ଣ ରହିଛି ତାହା ତଦାରଖ କରିବେ ଏବଂ ଲୋକଙ୍କୁ ଏ ସମ୍ପର୍କରେ ଅବଗତ କରାଇବେ ବୋଲି କହିଛନ୍ତି ।

ବିଜେପିର ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର ମଧ୍ୟ ରାଜ୍ୟ ସରକାରଙ୍କୁ ଏହି ଘଟଣାରେ ସମାଲୋଚନା କରିଛନ୍ତି ।

ସେ କହିଛନ୍ତି, ମନ୍ତ୍ରୀ ପ୍ରତାପ ଜେନାଙ୍କ ଦୁର୍ନୀତିର ବିରୋଧ କରିବାରୁ କୁଳମଣି ବରାଳଙ୍କୁ ହତ୍ୟା କରାଯାଇଛି । ଏବେ ଓଡ଼ିଶାରେ ଏତଲାରେ ମନ୍ତ୍ରୀମାନଙ୍କୁ ନାମ ଦେଖିବାକୁ ମିଳୁଛି । ଏହାର ଅର୍ଥ କ’ଣ ଓଡ଼ିଶା ପଶ୍ଚିମବଙ୍ଗ ରାସ୍ତାରେ ଯାଉଛି କି ବୋଲି ସେ ପ୍ରଶ୍ନ କରିଛନ୍ତି ।

ରାଜ୍ୟ ବିଜେପିର ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ କହିଛନ୍ତି, ପୂର୍ବରୁ କଂଗ୍ରେସ ସରକାର ଅମଳରେ ଏଭଳି ହତ୍ୟାକାଣ୍ଡ ହେଉଥିଲା, ଏବେ ବିଜେଡି ଏଭଳି କରୁଛି ।

ବିଜେଡି ସମର୍ଥିକ ଗୁଣ୍ଡାମାନେ ମାହାଙ୍ଗାରେ ହତ୍ୟାକାଣ୍ଡ ଭିଆଇଛନ୍ତି । ଆସନ୍ତା ୪୮ ଘଣ୍ଟା ମଧ୍ୟରେ ଦୋଷୀମାନଙ୍କୁ ଗିରଫ କରା ନଗଲେ ରାଜ୍ୟବ୍ୟାପୀ ପ୍ରତିବାଦ କରାଯିବ । ମୁଖ୍ୟମନ୍ତ୍ରୀ ଓ ଅନ୍ୟାନ୍ୟ ମନ୍ତ୍ରୀମାନଙ୍କୁ ସାଧାରଣ ସଭାରେ ବିରୋଧ କରାଯିବ ବୋଲି ସେ ଚେତାବନୀ ଦେଇଛନ୍ତି ।

ତେବେ ଆଇନ ମନ୍ତ୍ରୀ ପ୍ରତାପ ଜେନା ତାଙ୍କ ପ୍ରତିକ୍ରିୟାରେ କହିଛନ୍ତି, ଜଗନ୍ନାଥଙ୍କ ରାଇଜରେ ଏଭଳି ଘଟଣା ଘୃଣ୍ୟ ।

ସେ ନିଜେ କୌଣସି ପ୍ରକାର ହିଂସାକୁ ନିନ୍ଦା କରି ଆସୁଛନ୍ତି । ଏହି ଘଟଣାରେ ତାଙ୍କ ନାମରେ ଏତଲା ହୋଇଛି ।

ତଦନ୍ତ ପରେ ସବୁ ସ୍ପଷ୍ଟ ହୋଇଯିବ । ଏହି ଘଟଣାରେ ଦୋଷୀମାନେ ଯେପରି ଆଇନ ଭିତରକୁ ଆସିବେ ସେ ବ୍ୟକ୍ତିଗତ ଭାବେ ମଧ୍ୟ ଉଦ୍ୟମ କରିବେ ।

ତେବେ ଓଡ଼ିଶାରେ ଏବେ କୌଣସି ଅପରାଧ ହେଲେ ଦୋଶୀ ଦଣ୍ଡ ପାଇବା ବୋଧହୁଏ ବିରୋଧ ଦଳ ଚାହୁଁନାହାନ୍ତି । ତେଣୁ ସେମାନେ ସବୁ ଘଟଣାରେ ରାଜନୀତି ଆରମ୍ଭ କରି ଦେଉଛନ୍ତି ।

ଇତି ମଧ୍ୟରେ ଏହି ଘଟଣା ପରେ ମନ୍ତ୍ରୀ ଶ୍ରୀ ଜେନା ଓ ଅନ୍ୟାନ୍ୟ ବିଜେଡି ନେତାମାନଙ୍କ ସହ ଅଭିଯୁକ୍ତମାନଙ୍କୁ ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।

ଲୋକାଲ ୱାୟାର