ତିର୍ତ୍ତୋଲରେ ବିଜେପି କାର୍ଯ୍ୟାଳୟ; ପଦାରେ ପଡ଼ିଲା ଗୋଷ୍ଠୀ କନ୍ଦଳ

ଜଗତସିଂହପୁର, ଅକ୍ଟୋବର ୭(ଲୋକାଲ ୱାୟାର) ତିର୍ତ୍ତୋଲରେ ବିଜେପି କାର୍ଯ୍ୟାଳୟର ଉଦଘାଟନୀ ଅବସରରେ ଏହାର ଦୁଇ ଗୋଷ୍ଠୀ ମଧ୍ୟରେ ଦଳୀୟ କନ୍ଦଳ ସାମ୍ନାକୁ ଆସିଛି ।

ବିଜେପିର ପୂର୍ବତନ ବିଧାୟକ ରମାକାନ୍ତ ଭୋଇଙ୍କୁ ଅଣଦେଖା କରିବା ଅଭିଯୋଗରେ ଏହି ଗୋଷ୍ଠୀ କନ୍ଦଳ ଦେଖାଦେଇଛି ।

ମିଳିଥିବା ସୂଚନା ଅନୁସାରେ ବୁଧବାର ତିର୍ତ୍ତୋଲଠାରେ ବିଜେପି ଏହାର ଦଳୀୟ କାର୍ଯ୍ୟାଳୟର ଉଦଘାଟନ କରିଛି ।

ଏଥିପାଇଁ ରାଜ୍ୟସ୍ତରୀୟ ନେତାମାନେ ସାରଳା ମଣ୍ଡଳ ଓ ରୂପକ ଖୁଣ୍ଟିଆଙ୍କୁ ବୈଠକ ଆୟୋଜନ ପାଇଁ ଦାୟିତ୍ୱ ଦେଇଥିଲେ ।

ଅପରପକ୍ଷେ ତିର୍ତ୍ତୋଲ ମଣ୍ଡଳ ସଭାପତି ପ୍ରମୋଦ ପ୍ରଧାନଙ୍କୁ ଅଣଦେଖା କରି ଅନ୍ୟ ବ୍ୟକ୍ତି ବିଶେଷଙ୍କୁ ଏହି କାର୍ଯ୍ୟକ୍ରମ ଆୟୋଜନର ଦାୟିତ୍ୱ ଦିଆଯାଇଥିବାରୁ ତିର୍ତ୍ତୋଲ ନିର୍ବାଚନମଣ୍ଡଳୀରେ ଦୁଇ ଗୋଷ୍ଠୀ ଭିତରେ ପାତର ଅନ୍ତର ଦେଖାଦେଇଥିଲା ।

ଦଳୀୟ କାର୍ଯ୍ୟାଳୟ ଉଦଘାଟନୀ ଉତ୍ସବରେ ଅତିଥି ଭାବେ ବିଜେପି ରାଜ୍ୟ ସାଧାରଣ ସମ୍ପାଦକ ଭୃଗୁ ବକ୍ସିପାତ୍ର, ଜିଲ୍ଲା ପ୍ରଭାରୀ ସାରଦା ପ୍ରଧାନ, ବିଜେପି ନେତା ଦିଲ୍ଲୀପ କୁମାର ମଲ୍ଲିକ, ଜିଲ୍ଲା ବିଜେପି ସଭାପତି ସତ୍ୟବ୍ରତ ମହାପାତ୍ର ପ୍ରମୁଖ ଯୋଗ ଦେଇଥିଲେ ।

ଏହି ଅବସରରେ ବିଜେଡି ଛାଡିଥିବା ବିଭିନ୍ନ ପଞ୍ଚାୟତର ୮୦ରୁ ଅଧିକ କର୍ମୀ ବିଜେପିରେ ଯୋଗ ଦେଇଥିଲେ ।

ଦଳୀୟ କାର୍ଯ୍ୟାଳୟରେ ଉଦଘାଟନୀ ଉତ୍ସବ ଚାଲିଥିବା ବେଳେ ଗତ ଥରର ବିଜେପି ବିଧାୟକ ପ୍ରାର୍ଥୀ ରମାକାନ୍ତ ଭୋଇଙ୍କ ସମର୍ଥକମାନେ ବିକ୍ଷୋଭ ପ୍ରଦର୍ଶନ କରିବା ସହ ସ୍ଳୋଗାନ୍ ଦେଇଥିଲେ ।

ସେମାନେ ପ୍ରଭାରୀ ବିରୋଧୀ ସ୍ଳୋଗାନ୍ ଦେବା ସହ ବିଜେପି ବଞ୍ଚାଅ ବୋଲି କହିଥିଲେ । ସଭାରେ ସେମାନେ ପ୍ରଭାରୀ ଓ ଅନ୍ୟ ଉପସ୍ଥିତ ଅତିଥିମାନଙ୍କୁ ଅପମାନିତ କରିଥିଲେ ।

ଅପରପକ୍ଷରେ ପ୍ରଭାରୀଙ୍କ ସମର୍ଥକମାନେ ଏହାକୁ ବିରୋଧ କରିଥିଲେ । ଫଳରେ ବିଜେପିର ଦୁଇଗୋଷ୍ଠୀ ମୁହାଁମୁହିଁ ହେବା ଭଳି ପରିସ୍ଥିତି ସୃଷ୍ଟି ହୋଇଥିଲା ।

କିଛି ସମୟ ପାଇଁ ଦଳୀୟ କାର୍ଯ୍ୟାଳୟ ଉଦଘାଟନ ଓ ନୂଆ କର୍ମୀଙ୍କ ବିଜେପିରେ ଯୋଗଦାନରେ ବାଧା ସୃଷ୍ଟି ହୋଇଥିଲା ।

ଏ ବାବଦରେ ତିର୍ତ୍ତୋଲ ଯୁବମୋର୍ଚ୍ଚା ସଭାପତି ସୁଦୀପ୍ତ ନାଥ କହିଛନ୍ତି ଜିଲ୍ଲାରେ ଦଳୀୟ କାର୍ଯ୍ୟାଳୟ ପାଇଁ ଉତ୍ସବ ଆୟୋଜନ ହେବାକୁ ଥିବା ବେଳେ ଏହାକୁ ଭୋଇ ସମର୍ଥକମାନେ ବିରୋଧ କରିଥିଲେ ।

ତିର୍ତ୍ତୋଲ ନିର୍ବାଚନମଣ୍ଡଳୀରୁ ଭୋଇଙ୍କୁ ବିଜେପି ଟିକେଟ ଦେବାକୁ ମନା କରିବାରୁ ସେ ଗତକାଲି ଦଳରୁ ଇସ୍ତଫା ଦେଇଥିଲେ ।

ଭୋଇ ତିର୍ତ୍ତୋଲରେ ବିଜେପିକୁ ସଙ୍ଗଠିତ କରିବା ପାଇଁ ପୂର୍ବରୁ ଅନେକ କାର୍ଯ୍ୟ କରିଛନ୍ତି । ୨୦୦୯ରେ ବିଜେପି ତିର୍ତ୍ତୋଲରୁ ୪୫୧୪ ଭୋଟ ପାଇଥିବା ବେଳେ ଏହା ମାତ୍ର ୩.୨୨ ପ୍ରତିଶତ ଥିଲା ।

ମାତ୍ର ୨୦୧୪ରେ ବିଜେପି ନେତା ଭୋଇ ପ୍ରଥମ ଥର ପାଇଁ ନିର୍ବାଚନ ଲଢ଼ିଥିଲେ ଓ ଦଳ ସେ ସମୟରେ ୧୪ ହଜାର ୫୧୬ ଭୋଟ ପାଇଥିଲା । ଯାହାକି ସମୁଦାୟ ଭୋଟର ୯.୦୧ ପ୍ରତିଶତ ।

ଏହାପରେ ଭୋଇ ୨୦୧୯ରେ ତିର୍ତ୍ତୋଲ ବିଧାନସଭା ଆସନରୁ ପ୍ରତିଦ୍ୱନ୍ଦ୍ୱିତା କରିଥିଲେ । ଯେଉଁଥିରେ ସେ ୫୩ ହଜାର ୫୮୧ ଭୋଟ ପାଇଥିଲେ ।

ମାତ୍ର ଏବେ ଦଳ ତାଙ୍କୁ ଅବହେଳା ଓ ଅଣଦେଖା କରୁଛି । ଏଥିପାଇଁ ଭୋଇଙ୍କ ସମର୍ଥକମାନେ ବିଜେପିର ଏହି କାର୍ଯ୍ୟକୁ ବିରୋଧ କରିଛନ୍ତି ।

ଏ ବାବଦରେ ଜିଲ୍ଲା ସଭାପତି ସତ୍ୟବ୍ରତ ମହାପାତ୍ର କହିଛନ୍ତି ଭୋଇଙ୍କୁ ଅଣଦେଖା କରିବାର ପ୍ରଶ୍ନ ଉଠୁନି ।

ବରଂ ଆସନ୍ତା ନିର୍ବାଚନ ପାଇଁ ଭୋଇଙ୍କ ସହ ଅନ୍ୟ ଦୁଇ ପ୍ରାର୍ଥୀଙ୍କ ନାମ ଦଳୀୟ ଟିକେଟ୍ ପାଇଁ ଆମେ ଦିଲ୍ଲୀ ସ୍ଥିତ କାର୍ଯ୍ୟାଳୟକୁ ପଠାଇଛୁ ।

ଆଜିର ଏହି ଘଟଣାର ତଦନ୍ତ ପାଇଁ ଏକ ସ୍ୱତନ୍ତ୍ର ତଦନ୍ତକାରୀ ଦଳ ଗଠନ କରାଯାଇଛି । ଘଟଣାର ଅନୁସନ୍ଧାନ କରି ଏହି ଦଳ ଏ ସମ୍ପର୍କିତ ରିପୋର୍ଟ ଖୁବ୍ ଶୀଘ୍ର ରାଜ୍ୟ ବିଜେପି ନେତାଙ୍କୁ ପ୍ରଦାନ କରିବ ।

ଆଜିର କାର୍ଯ୍ୟକ୍ରମରେ ପାଖାପାଖି ୮୦ ଜଣ ବିଜେଡି କର୍ମୀ ବିଜେପିରେ ଯୋଗ ଦେଇଛନ୍ତି । ଖୁବ୍ ଶୀଘ୍ର ରଘୁନାଥପୁର ଓ ବିରିଡିରେ ଦଳୀୟ କାର୍ଯ୍ୟାଳୟ ଖୋଲାଯିବାକୁ ଯୋଜନା କରାଯାଉଛି ।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ଆଜିର ଘଟଣା ବିଜେପି ଭିତରେ ଥିବା ଆଭ୍ୟନ୍ତରୀଣ କନ୍ଦଳକୁ ପଦାରେ ପକାଇଛି ।

ଏହି ଘଟଣାକୁ ବିରୋଧ କରି ଅନେକ ଓ ବିଜେପିର ମନମୁଖୀ କାର୍ଯ୍ୟକୁ ପ୍ରତିବାଦ କରି ଅନେକ ଦଳୀୟ କର୍ମୀ ଓ ନେତା ଦଳ ଛାଡ଼ିବାକୁ ନିଷ୍ପତ୍ତି ନେଇଥିବା ଜଣାଯାଇଛି ।

ଲୋକାଲ ୱାୟାର