ତିର୍ତ୍ତୋଲ ଉପନିର୍ବାଚନ ପୂର୍ବରୁ ବିଜେପିରେ ଅସନ୍ତୋଷ, ପୂର୍ବ ପ୍ରାର୍ଥୀଙ୍କୁ ଟିକେଟ ଦାବି

ଜଗତସିଂହପୁର, ସେପ୍ଟେମ୍ବର ୨୦ (ଲୋକାଲ ୱାୟାର): ତିର୍ତ୍ତୋଲ ଉପନିର୍ବାଚନ ପୂର୍ବରୁ ଜିଲ୍ଲା ବିଜେପିରେ ପ୍ରାର୍ଥୀତ୍ୱକୁ ନେଇ ବିବାଦ ଆରମ୍ଭ ହୋଇଯାଇଛି ।

ବିରିଡି ବ୍ଲକର ଉତ୍ତ୍ୟକ୍ତ ବିଜେପି ସମର୍ଥକମାନେ ଗତଥରର ପ୍ରାର୍ଥୀ ରମାକାନ୍ତ ଭୋଇଙ୍କୁ ଏଥର ପ୍ରାର୍ଥୀ କରାନଗଲେ ଭୋଟ ବର୍ଜନ କରିବାକୁ ଧମକ ଦେଇଛନ୍ତି ।

ପୂର୍ବତନ କଂଗ୍ରେସ ନେତା ରାଜକିଶୋର ବେହେରା ବିଜେପିରେ ମିଶିବା ପରେ ଉପନିର୍ବାଚନରେ ତାଙ୍କୁ ଦଳୀୟ ପ୍ରାର୍ଥୀ କରାଯିବା ନେଇ ଚର୍ଚ୍ଚା ହେଉଥିବାରୁ ବିବାଦର ସୂତ୍ରପାତ ହୋଇଛି ।

ତିର୍ତ୍ତୋଲ ନିର୍ବାଚନ ମଣ୍ଡଳୀରେ ବିଜେପିର ସାଂଗଠନିକ ସ୍ଥିତି ସେତେଟା ସୁଦୃଢ଼ ନୁହେଁ । ୨୦୦୯ ନିର୍ବାଚନରେ ବିଜେପି ପ୍ରାର୍ଥୀ ଲତାମଣି ଦାସ ୪,୫୧୪ (୩.୨୨ ପ୍ରତିଶତ) ଭୋଟ ପାଇଥିଲେ ।

୨୦୧୪ରେ ରମାକାନ୍ତ ଭୋଇ ପ୍ରଥମ ଥର ବିଜେପି ପ୍ରାର୍ଥୀ ହୋଇ ୧୪,୫୧୬ (୯.୦୧ ପ୍ରତିଶତ) ଭୋଟ ପାଇଥିଲେ । ୨୦୧୯ ନିର୍ବାଚନରେ ବିଜେପି ପ୍ରାର୍ଥୀ ଭୋଇ ୫୩,୫୮୧ (୩୦.୯୦ ପ୍ରତିଶତ) ଭୋଟ ପାଇଥିଲେ ।

ସ୍ଥାନୀୟ ଲୋକଙ୍କ ସମସ୍ୟା ସମାଧାନ ପ୍ରତି ଭୋଇଙ୍କ ପ୍ରତିଶ୍ରୁତିବଦ୍ଧତା, ଲୋକଙ୍କ ସୁଖଦୁଃଖରେ ସକ୍ରିୟ ଅଂଶଗ୍ରହଣ, ଦୃଢ ନେତୃତ୍ୱ, ଭୋଟରଙ୍କ ସହ ସମ୍ପର୍କ, ବନ୍ୟା ବେଳେ ରିଲିଫ ବଣ୍ଟନ, କରୋନା ବେଳେ ମାସ୍କ ଓ ସାନିଟାଇଜର ବଣ୍ଟନ ଯୋଗୁଁ ତିର୍ତ୍ତୋଲ ନିର୍ବାଚନ ମଣ୍ଡଳୀରେ ଦଳୀୟ ସ୍ଥିତି ମଜବୁତ ହୋଇଛି ।

୧୦ ବର୍ଷରେ ବିଜେପିର ଭୋଟ ହାର ୩ ପ୍ରତିଶତରୁ ୩୦ ପ୍ରତିଶତରେ ପହଞ୍ଚିବା ଦଳୀୟ କାର୍ଯ୍ୟକ୍ରମ ପ୍ରତି ଭୋଇଙ୍କ ନିଷ୍ଠାକୁ ଦର୍ଶାଉଛି ।

ପୂର୍ବତନ କଂଗ୍ରେସ ନେତା ରାଜକିଶୋର ବେହେରା ବିଜେପିରେ ଯୋଗ ଦେବା ପରେ ରାଜ୍ୟର ବରିଷ୍ଠ ବିଜେପି ନେତାମାନେ ଯୁବ ତଥା ନିଷ୍ଠାପର ବିଧାୟକ ପ୍ରାର୍ଥୀ ଭୋଇଙ୍କୁ ଅବହେଳା କରୁଥିବାରୁ କର୍ମୀମାନେ ଅସନ୍ତୋଷ ବ୍ୟକ୍ତ କରିଛନ୍ତି ।

ଭୋଇଙ୍କ ବଦଳରେ ବିଜେପି ବେହେରାଙ୍କୁ ଆଗାମୀ ଉପନିର୍ବାଚନରେ ପ୍ରାର୍ଥୀ କରିପାରେ ବୋଲି କଳ୍ପନାଜଳ୍ପନା ଆରମ୍ଭ ହୋଇଛି ।

ପୂର୍ବରୁ ରାଜକିଶୋର ବେହେରା କଂଗ୍ରେସ ଟିକେଟରେ ଲଢି ୨୦୦୯ରେ ୪୮,୧୦୦ ଭୋଟ ଓ ୨୦୧୪ରେ ୫୩,୫୦୫ ଭୋଟ ପାଇ ବିଜେଡି ପ୍ରାର୍ଥୀଙ୍କ ଠାରୁ ପରାଜିତ ହୋଇଥିଲେ ।

ବିଜେପି ନେତୃବୃନ୍ଦ ଭୋଇଙ୍କୁ ଅବହେଳା କରୁଥିବାରୁ ଏଥର ତାଙ୍କୁ ବିଜେପି ଟିକେଟ ମିଳିବା ନେଇ ସନେ୍ଦହ ରହିଛି ।

ବିଜେପି ନେତା କ୍ଷୀରୋଦ ଚନ୍ଦ୍ର ପାଲଙ୍କ ନେତୃତ୍ୱରେ ଉତ୍ୟକ୍ତ ବିଜେପି କର୍ମୀମାନେ ଏକାଠି ହୋଇ ଭୋଇଙ୍କ ପ୍ରତି ହେଉଥିବା ଅବହେଳାକୁ ବିରୋଧ କରିଥିଲେ ।

ତୃଣମୂଳ ସ୍ତରରେ ଦଳୀୟ ସ୍ଥିତି ମଜବୁତ କରିବାରେ ନିଜକୁ ଉତ୍ସର୍ଗ କରିଥିବା ନେତାଙ୍କୁ ବିଜେପି ଗୁରୁତ୍ୱ ଦେଉନାହିଁ ବୋଲି ସେମାନେ ଅଭିଯୋଗ କରିଛନ୍ତି ।

ସ୍ଥାନୀୟ ବିଜେପି ନେତା ପ୍ରିୟରଞ୍ଜନ ମଲ୍ଲିକ, ବିଶ୍ୱଭୂଷଣ ମଲ୍ଲିକ, ଲକ୍ଷ୍ମୀଧର ସାହୁ, ବିଭୂତି ଭୂଷଣ ଭୂୟାଁ ପ୍ରମୁଖ ଏହି ପ୍ରତିବାଦ ବୈଠକରେ ଭାଗ ନେଇଥିଲେ ।

ଆଗାମୀ ଉପନିର୍ବାଚନରେ ଭୋଇଙ୍କ ପ୍ରତି ଅବହେଳା ପ୍ରଦର୍ଶନ ନକରି ତାଙ୍କୁ ଟିକେଟ ଦେବାକୁ ବିଜେପି ନେତାମାନେ ମଣ୍ଡଳ ସଭାପତିଙ୍କ ମାଧ୍ୟମରେ ରାଜ୍ୟ ସଭାପତିଙ୍କ ନିକଟକୁ ଦାବିପତ୍ର ପଠାଇଛନ୍ତି ।

ବେହେରା ବିଜେପିରେ ଯୋଗ ଦେବା ପରେ ଦଳୀୟ କନ୍ଦଳ ଆରମ୍ଭ ହୋଇଛି । ଏହା ନିର୍ବାଚନମଣ୍ଡଳୀରେ ଦଳର ସ୍ଥିତିକୁ ଦୁର୍ବଳ କରିବ । ବିଜେଡି ଏହାର ଫାଇଦା ନେବ ବୋଲି ରାଜନୈତିକ ବିଶ୍ଳେଷକମାନେ ମତ ଦେଇଛନ୍ତି ।

ଲୋକାଲ ୱାୟାର