ତିର୍ତ୍ତୋଲ ଉପନିର୍ବାଚନ: ବିଶ୍ୱାଳ ପରିବାର ପାଇଁ ସମ୍ମାନର ପ୍ରଶ୍ନ

ଜଗତସିଂହପୁର, ଅକ୍ଟୋବର ୧୬ (ଲୋକାଲ ୱାୟାର): ପୂର୍ବତନ ମୁଖ୍ୟମନ୍ତ୍ରୀ ବସନ୍ତ ବିଶ୍ୱାଳ ଓ ତାଙ୍କର ଦୁଇ ପୁଅ ପୂର୍ବତନ ବିଧାୟକ ତଥା କଂଗ୍ରେସ ନେତା ଚିରଞ୍ଜିବୀ ବିଶ୍ୱାଳ ଓ ପୂର୍ବତନ ସାଂସଦ ତଥା କଂଗ୍ରେସ ରଞ୍ଜୀବ ବିଶ୍ୱାଳଙ୍କ ପୈତୃକ ଗାଁ ତୁଳଙ୍ଗ ପଞ୍ଚାୟତ ଦିନେ ତିର୍ତ୍ତୋଲ ନିର୍ବାଚନ ମଣ୍ଡଳୀରେ କଂଗ୍ରେସ ଗଡ ଭାବେ ପରିଚିତ ଥିଲା ।

ହେଲେ ବସନ୍ତ ବିଶ୍ୱାଳଙ୍କ ମୃତ୍ୟୁ ପରେ ବିଶ୍ୱାଳ ପରିବାରର ପ୍ରଭାବ ଏହି ପଞ୍ଚାୟତରୁ କମିବାରେ ଲାଗିଛି ।

ତେଣୁ ଏଥର ଉପନିର୍ବାଚନରେ ତୁଳଙ୍ଗ ପଞ୍ଚାୟତରୁ କଂଗ୍ରେସକୁ ସମ୍ମାନଜନକ ଭୋଟ ମିଳିବା ନେଇ ଆଶଙ୍କା ସୃଷ୍ଟି ହୋଇଛି ।

ବିଶ୍ୱାଳ ପରିବାରର ଟାଣୁଆ ସମର୍ଥକମାନେ ବିଜେପି ଓ ବିଜେଡିରେ ଯୋଗ ଦେଇ ସାରିଲେଣି ।

ବିଶ୍ୱାଳ ପରିବାରର ଘନିଷ୍ଠ ଭାବେ ଜଣାଶୁଣା ପୂର୍ବତନ କଂଗ୍ରେସ ନେତା କୃଷ୍ଣଚନ୍ଦ୍ର ମଲ୍ଲିକ ସମର୍ଥକମାନଙ୍କ ସହ ଗତ ମାସରେ ବିଜେଡିରେ ଯୋଗ ଦେଇଛନ୍ତି ।

ବିଶ୍ୱାଳ ସମର୍ଥକ ପୂର୍ବତନ ସରପଞ୍ଚ ରଶ୍ମି ରଞ୍ଜନ ଦାସ ମଧ୍ୟ ସମର୍ଥକଙ୍କ ସହ ବିଜେଡିରେ ଯୋଗ ଦେଇଛନ୍ତି । କହିବାକୁ ଗଲେ ତୁଳଙ୍ଗ ପଞ୍ଚାୟତ ଏବେ କଂଗ୍ରେସ ନେତା ଶୂନ୍ୟ ହୋଇଯାଇଛି ।

ଗତ ପଞ୍ଚାୟତ ନିର୍ବାଚନରେ କଂଗ୍ରେସ ସମର୍ଥିତ ସରପଞ୍ଚ ପ୍ରାର୍ଥୀ ନିକଟତମ ପ୍ରତିଦ୍ୱନ୍ଦ୍ୱୀଙ୍କୁ ୨୨୦ ଭୋଟ ବ୍ୟବଧାନରେ ହରାଇଥିଲେ ମଧ୍ୟ ସମିତି ସଭ୍ୟ ନିର୍ବାଚନରେ ବିଜେଡି ବାଜି ମାରି ନେଇଥିଲା ।

ରାଜନୈତିକ ସମୀକରଣରୁ ଜଣାପଡୁଛି ଯେ, ପଞ୍ଚାୟତରେ କେବଳ କଂଗ୍ରେସ ଦୁର୍ବଳ ହୋଇନାହିଁ ବରଂ ବିଶ୍ୱାଳ ପରିବାରର ଦୁର୍ଗ ଭୁଶୁଡ଼ିଛି ।

ବିଶ୍ୱାଳ ପରିବାର ପାଇଁ ନିଜ ପଞ୍ଚାୟତରୁ ଅଧିକ ଭୋଟ ସମ୍ମାନର ପ୍ରଶ୍ନ ହୋଇଥିବାରୁ କଂଗ୍ରେସ ବିଧାୟକ ସୁର ରାଉତରାୟ, କଂଗ୍ରେସ ନେତା ରଞ୍ଜୀବ ବିଶ୍ୱାଳ ଓ ଶୁଭେନ୍ଦୁ ମହାନ୍ତି ପ୍ରମୁଖ ସ୍ଥାନୀୟ ନେତାଙ୍କ ସହ ବୈଠକ କରି ଭୋଟରଙ୍କୁ ଆକୃଷ୍ଟ କରିବାକୁ ଉଦ୍ୟମ ଆରମ୍ଭ କରିଛନ୍ତି ।

ବିଶ୍ୱାଳ ଭାଇମାନଙ୍କ ପଞ୍ଚାୟତରେ ପତିଆରା ହ୍ରାସ ଖବର ତିର୍ତୋଲ ନିର୍ବାଚନୀ ମଣ୍ଡଳୀର କଂଗ୍ରେସ କର୍ମୀଙ୍କ ମନୋବଳ ଦୁର୍ବଳ କରିଛି ।

ତୁଳଙ୍ଗ ପଞ୍ଚାୟତରେ ଦଳର ସ୍ଥିତି ଏପରି ଥିବା ବେଳେ କଂଗ୍ରେସ ଦଳର ସଂଗଠନ ନଥିବା ପଞ୍ଚାୟତରୁ କିପରି ଭୋଟ ମିଳିବ ସେ ନେଇ ଦଳରେ ଚିନ୍ତା ବଢି ଯାଇଛି ।

ପୂର୍ବତନ ସାଂସଦ ରଞ୍ଜୀବ ବିଶ୍ୱାଳ ତିର୍ତ୍ତୋଲ ବ୍ଲକର ବିଭିନ୍ନ ପଞ୍ଚାୟତର କଂଗ୍ରେସ କର୍ମୀଙ୍କ ସହ ଆଲୋଚନା କରି ବୁଥ ସ୍ତରରୁ ପ୍ରଚାର ଅଭିଯାନ ଜୋରଦାର କରିବାକୁ ଆହ୍ୱାନ ଦେଇଛନ୍ତି ।

ତିର୍ତ୍ତୋଲ ବ୍ଲକରେ ଥିବା ତରଜଙ୍ଗ ପଞ୍ଚାୟତରେ ବ୍ଲକ କଂଗ୍ରେସ ସଭାପତି ଅକ୍ଷୟ ଦାସ ଓ ଅନ୍ୟମାନଙ୍କ ଉପସ୍ଥିତିରେ ରଞ୍ଜୀବ ପାର୍ଟି ଅଫିସ ଉଦଘାଟନ କରିଛନ୍ତି ।

ଲୋକାଲ ୱାୟାର