ଦକ୍ଷିଣ ଏସୀୟ କ୍ରୀଡ଼ାରେ ରୌପ୍ୟ ପଦକ ଜିତିଲେ ଷ୍ଟିଲ୍ ସିଟିର ଝିଅ

ରାଉରକେଲା, ଡିସେମ୍ବର ୧୧ (ଲୋକାଲ ୱାୟାର): ଦିଲ୍ଲୀସ୍ଥିତ ସ୍ପୋର୍ଟସ୍ ଅଥରିଟି ଅଫ୍ ଇଣ୍ଡିଆ ଛାତ୍ରୀ ନିବାସରେ ରହୁଥିବା ରାଉରକେଲାର ଝିଅ ସ୍ବସ୍ତି ସିଂ ନେପାଳରେ ଅନୁଷ୍ଠିତ ଦକ୍ଷିଣ ଏସୀୟ କ୍ରୀଡ଼ାର ସାଇକେଳଚାଳନା ପ୍ରତିଯୋଗିତାରେ ରୌପ୍ୟ ପଦକ ଜିତିଛନ୍ତି।

ନେପାଳର କାଠମାଣ୍ଡୁ ଓ ପୋଖ୍ରାରେ ଅନୁଷ୍ଠିତ ଏହି ପ୍ରତିଯୋଗିତାର ସପ୍ତମ ଦିନରେ ୧୨୦ କିଲୋମିଟର ଓପନ୍ କାଟାଗୋରିରେ ସତର ବର୍ଷ ବୟସ୍କା ସ୍ବସ୍ତି ଏହି ସଫଳତା ପାଇଛନ୍ତି।

ରାଉରକେଲା ବିଜୁ ପଟ୍ଟନାୟକ ହକି ଷ୍ଟାଡିୟମରେ କୋଚ୍ ସୁଶିଲ ଦାସଙ୍କଠାରୁ ସାଇକୋଲ ଚାଳନା ପ୍ରଶିକ୍ଷଣ ନେଇଥିବା ସ୍ବସ୍ତି ଅନେକ ପ୍ରତିଯୋଗିତାରେ ମେଡାଲ୍ ଜିତି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ।

ଜାତୀୟ ଓ ଅନ୍ତର୍ଜାତୀୟ ପ୍ରତିଯୋଗିତାରେ ମଧ୍ୟ ତାଙ୍କ ସଫଳତା କମ୍ ନୁହେଁ।

କିଛିଦିନ ତଳେ ଜୟପୁରଠାରେ ଅନୁଷ୍ଠିତ ନ୍ୟାସନାଲ୍ ରୋଡ୍ ସାଇକେଲିଂ ଚାମ୍ପିୟନସିପର ଦୁଇଟି ଇଭେଣ୍ଟରେ ଭାଗ ନେଇ ସେ ଏକ ସ୍ବର୍ଣ୍ଣ ଓ ଏକ ବ୍ରୋଞ୍ଜ ପଦକ ଜିତିଥିଲେ।

ଏହା ପୂର୍ବରୁ ଚଳିତ ବର୍ଷ ନୂଆଦିଲ୍ଲୀରେ ଅନୁଷ୍ଠିତ ଏସିଆ କପ୍ ସାଇକେଲିଂ ଚାମ୍ପିୟନସିପରେ ତାଙ୍କୁ ବ୍ରୋଞ୍ଜ ମେଡାଲ୍ ମିଳିଥିଲା।

ଉମାଦେବୀ ଓ ରାଉରକେଲା ଷ୍ଟିଲ୍ କାରଖାନା ପରିସରରେ ଥିବା ଅକ୍ସିଜେନ୍ ପ୍ଲାଣ୍ଟରେ କାର୍ଯ୍ୟରତ ଅମର ସିଂଙ୍କ ଝିଅ ସ୍ବସ୍ତି ଗତବର୍ଷର ଏସିଆନ୍ ଟ୍ରାକ୍ ସାଇକେଲିଂ ଚାମ୍ପିୟନସିପରେ ମଧ୍ୟ ସ୍ବର୍ଣ୍ଣ ପଦକ ପାଇଥିଲେ।

“ଝିଅର ଏହି ସଫଳତା ପାଇଁ ରାଉରକେଲା ଇସ୍ପାତ କାରଖାନାର ଅନେକ ଅବଦାନ ଅଛି। କୋଚଙ୍କର ପ୍ରେରଣା ଓ ପ୍ରଶିକ୍ଷଣ ବି କମ୍ ନୁହେଁ। ଏବେ ସେ ଦେଶ ପାଇଁ ସାଇକେଲ ଚାଳନା କରୁଛି ଓ ବାପା ହିସାବରେ ମୁଁ ଢେର୍ ଖୁସି”, ବୋଲି କହିଛନ୍ତି ସ୍ବସ୍ତିଙ୍କ ବାପା ଅମର ସିଂ।

ସେହିପରି କୋଚ୍ ସୁଶିଲ ଦାସ କହିଛନ୍ତିତି ଯେ, ସ୍ବସ୍ତି ଦିନେଦିନେ ସାଇକେଲଚାଳନା ପ୍ରତିଯୋଗିତାରେ ସାରା ପୃଥିବୀରେ ନାଁ କରିବେ, ଏହି ଆଶା ତାଙ୍କର ରହିଛି।

ଲୋକାଲ ୱାୟାର